याकूब 3 - Sirmouri

जीभ आप्णी बंष दे करह्

¹ हे मेरे भाऐ बंईणों, तुँओं मुँझ्षे भहीते शिक्क्षा देणों वाल़े ने बणे, किन्देंखे के तुँओं कैई पता भे असो, के शिक्क्षा देणों वाल़े जादा कसुरबार बाँण्दें।

² आँमें बादे झोणें कैथी ना कैथी किऐ ना किऐ भूल-चूक जरूर करह्, परह् सिद्ध-पाक्का सेजा असो, जू किऐ भे बचन दी भूल-चूक ने करदा, किन्देंखे के सेजा आदमी आप्णी देह्-शरीर दी लगाम आप्णें बष दी थऐ सको।

³ जबे आँमें आप्णे बष दे कर्णो खे घूड़े के मुँहों दे लगाम लाँव, तअ आँमें तेस्का बादा देह्-शरीर जेष्णें हिसाब शी घूमाँणी चाँव आँमें तेष्णी ही घुमाँऐ सको।

⁴ दे:खो, सँमुन्द्रों जहाजो भे बैजाऐ बड़े-बड़े हों, अरह् प्रचंन्ड बागूरी लई से चलाऐं ज़ाँव, तबे भे तिनू ऐकी नहाँन्ड़ी पतवार-फाऊँड़ी लई माँझी आप्णी हिछ़या लई घूमाव चलाँव ऐ।

⁵ ऐष्णी ही अमाँरी जीभ भे, ऐक देह्-शरीर दा नहाँन्ड़ा अंग हों, अरह् बैशुमाँर-बड़ी-बैशुमाँर-बड़ी बातो चूटो दड़ो, अरह् दे:खो, आगी के झूक भे भाव कैती नहाँन्ड़ी हों तबे भे से बादी जाँगल़ो दी आग लाऐ सको।

⁶ तेष्णी ही अमाँरी जीभ भे आग जैष्णी हों, जीभ अमाँरें देह्-शरीर दा ऐक अ-धर्म का खजाना हऐ सको, जू अमाँरी बादी देह्-शरीर दा कंल़क अरह् अशुद्ध करी सको; अरह् आपु भे जीवन की चाल-ढाल नाँष कर्णो वाल़ी अगियाव दे बद्ल़ी ज़ाव, अरह् आपु भे नंरक के कुँन्ड दे तियों आगी लई सिल्गी ज़ाँव।

⁷ किन्देंखे के साँत्त-भाँत्ते जाँगल़ो के बुणेरह्, चंटेटू, अरह् रिंगणों-लोह्कणों वाल़े जींव-जंन्तू अरह् पाँणी संमुन्द्रो मुँझ्ले जींव-जन्तू ऐक नाँम प्रणाँणी आप्णें बष दे करे ज़ाव, अरह् आदमी ऐ ऐक नाँम जींव-जंन्तू आप्णें बष दे भे करी थुऐ।

⁸ परह् जीभ कुँऐं भे आदमी आप्णी बष दे ने करी सक्दा, किन्देंखे के जीब ऐक ऐशी अब्ल़ी अरह् नुकसासन दाऐक असो, जू कदी ने रूक्दे, अरह् जीभ ऐक बीष-जऐरो लई भरा अंदा ऐक नहाँन्ड़ा अंग असो, जू कोद्दी भे चऐंन ने करी सक्दी।

⁹ दे:खो, ईयों ही जीभों लई, आँमें प्रभू अरह् परंम-पिता पंणमिश्वर के स्तुति करह्; अरह् ईयों ही जीभो लई आँमें आदमी खे जिन की रंचणाँ पंणमिश्वरे आप्णें सरूप दी करी थऐ, तिनखे आँमें ईयों ही जीभो के जाँणें श्राँप-फींटकारा दियों; अरह् आशिर्बाद-आशीष दुईनें ईन्दी लई दियों।

¹⁰ हे मेरे प्यारे भाऐ, बंईणों, ऐकी ही ज़ात्ति-मुँह शा अमाँरे आशिर्बाद, अरह् श्राँप-फींटकारा दुईनें नींक्ल़ो! ऐजो आँमों खे गलत असो!

¹¹ कियों ऐकी ही फट्वाँणी के नाल़े शो, मीठो अरह् खरयाल़ो पाँणी दूईन्नै साथी निक्ल़ी सको?

¹² हे मेरे भाऐ बंईणों, कियो तेर्मोल़ो के डाल़ों दे जाँमरह् अरह् जाँमरह् के डाल़ो दे, तेर्मोल़ो कद्दी ने लागदे? तेष्णों ही फट्वाँणी के ऐकी नाल़े दो खरयाल़ो अरह् मीठो पाँणी दुईनें ऐक साथ ने आऐ सक्दो।

स्वर्गदूत्तों का ज्ञाँन

¹³ तुँओं मुँझी ज्ञाँनी अरह् ठगड़ा सम्झदार कुँण असो? जुण्जा ऐशा हों के आप्णे आच्छ़े सभाव अरह् करंम के जाँणें ज्ञाँन पय्दा कर्णो वाल़ी नरमाँऐं आरी पर्गट हों।

¹⁴ परह् जे तुवाँरा मंन-सास डाह्-जल़ण अरह् सुवार्थी हिछ़्या शा भरा अंदा असो, अरह् तिन्दा तुँऐं किऐ धमंन्ड करियों साचे को झूठो बाँणियों ने बुल़े।

¹⁵ ऐजा ज्ञाँन स्वर्गो के ईश्वर का ने परह् संईसारिक, सभाव अरह् दुष्ट-आत्त्मा शैतान का हों।

¹⁶ किन्देंखे के जेथै रीष-मीष, बिरूध अरह् आप्णाँ सुवार्थ हों, तेथै ओका भे बादा कू-कर्म हों;

¹⁷ परह् जुण्जा ज्ञाँन स्वर्गो शा आँव, से आगे तअ पबित्र हों, तबे मिल्नसार, कोमल, मित्रता, दया-रंय्म, अरह् आछ़ै फल़ शा लदा अंदा अरह् बिना अप्णोंट वाल़ा, अरह् बिना कपट का शुद्ध हों।

¹⁸ मिलाप कराँणों वाल़ा, जू धार्मिक्त्ता का फल़ मेल-मिलाप आरी बोंह्।