याकूब 1 - Sirmouri

नंमष्कार

¹ पंणमिश्वर का अरह् प्रभू यीशू मसीया का दास संत्त-याकूब कि ढबे शी बहारी गोह्त्र खे जू खिदर-भिदर हऐयों रंह्, तिनखे नमंष्कार पऊँची चेंई।

बिश्वाष अरह् सम्झदारी

² “हे भाऐ बंईणों, जबे तुँऐं ओकी बातो की परख-अजमाँऐषों दे पड़ो तअ ऐजी बादी बातो मंजे की ही बातो जाणों।

³ ऐजो जाँणियों के तुवाँरे बिश्वाष के पर्खणों के जाँणें ढेठ-हिम्मत बड़ाणों खे सहारा भेंटो।”

⁴ अरह् ईयों ढेठ-हिम्मत दे डटे अंदे रंह्, तबे तुँओं दे कियोंही बातो के कमी-घटी ने रंह्, तअ तुँऐं नीरदोष बंण्ले।

⁵ परह् जे तुँओं मुँझी कोसी दे ज्ञाँन-बुद्धी कि कमी-घटी असो, तअ से पंणमिश्वर कैई शी माँगों, से तेस्खे खुशी शी दया-रंय्म करियों दियों, अरह् से तेस्खे ही देऐ ज़ाली।

⁶ सिर्फ बिश्वाष आरी माँगों। दाँणिक भे षक ने करा चेंई। परह् जिनके षक हो, से संमुन्द्रो की फालो जेष्णाँ हों, जू ढोंढ-बागूरिऐ खिदर-बदर हऐयों जिदो-किदो ज़ाँव।

⁷ ऐष्णा आदमी ईयों ने जाँणें, के मुँह प्रभू कैई शो किऐ भेंट्दो ऐ।

⁸ सेजा आदमी दू-मंना-दू-चीत्ता, असो, अरह् आप्णी बादी बातो दा चंचल असो।

बिश्वाषी गरीब अरह् सैठ-सऊँकार लोगो खे

⁹ गरीब आदमी आप्णें बड़े-पंद् दा खुशी रंह्।

¹⁰ परह् सैठ-सऊँकार आप्णी नींच दषा के तारीफ करह्, किन्देंखे के से घास के फूलो जेष्णें असो, जू ऊल़शाऐयों-झड़दे ज़ाँव।

¹¹ किन्देंखे के सुरूज ऊद्ऐयों जेई बेगै घाँम पड़ो, तेई घास के फूल मुँल़शाऐयों-शुकि ज़ाँव, अरह् तिन्दे का फूल झड़ी ज़ाँव, अरह् तिन्दे के शोभा खत्त्म हऐ ज़ाव, तेष्णें ही सैठ-सऊँकार भे आप्णी बाटो दा ज़ादे-ज़ादे माँटी दा मिली ज़ाँव।

परख-अजमाँऐष अरह् लूभ-लाल़्च

¹² भागोईत असो! सेजा आदमी जू परख दा डटा अंदा रंह्, अरह् से परख दा पास हऐयों सेजो जीवन को मुँकुट-ताज लंह्दा, जिन्दे का बाय्दा प्रभू ऐ आप्णें पियार कर्णो वाल़े आरी करी थुवा।

¹³ जबे कोसी की परख-अजमाँऐष हों, तअ से ऐशों ने बुलो, के मुँह पंणमिश्वरे पर्खी लुवा, किन्देंखे के बुरी बातो के जाँणें पंणमिश्वर कसी के जाँच परख ने करदा, अरह् ना कोसी की जाँच परख से आपु कर्दें।

¹⁴ परह् बादे आदमी आप्णे ही लूभ-लाल़्चो के चकरह् दे फशियों परख-अजमाँऐष दे पढ़ो।

¹⁵ तबे सेजा लूभ-लाल़्च बड़ियों पाप कराँव, अरह् मऊँत्ती के मुँओं दे नींयों।

¹⁶ हे मेरे प्यारें भाऐ बंईणों, धोखे दे रूऐ।

¹⁷ बादे आछै दाँण, अरह् बादे शुद्ध बर्दांण, ऊपरोह् शे मतल्व स्वर्गो के पिता कैई शे भेंटो: जेने सर्गों के त्तैज-प्रकाष बंणाँऐं; अरह् जिदा ना किऐ बद्ल़ाव हंदा, अरह् ना किऐ साटा-बाटा हंदा।

¹⁸ तिन्ऐं आप्णी हिछ़्या पुरी कर्णों खे आँमों सच्चाई के बचनों के जाँणें नुवाँ जीवन दिता, के आँमें तिनके जाँणें बंणाऐं गुऐ, पराँणी मुझ्शे बिश्वाष का आगला फल़ बंणों।

बचन शुण्णा अरह् तिन्दा चालणा

¹⁹ हे मेरे प्यारे भाऐ बंईणों, ऐजी बात जाँणी पाव: के बादे आदमी शुण्णों खे सक्न्नै अरह् बुल्णों खे सबैर, अरह् झोको-गुस्सै खे धीरज-बंन्त्त चेंईं।

²⁰ किन्देंखे के गुस्सै-कुरूध वाल़ा आदमी पंणमिश्वर कि हिछ़या के मुँताबिको शो किऐ करीने संक्दा।

²¹ बिचकी चाल-ढाल अरह् संईसारी कि बादी बुराई शे दुर्के रंह्, अरह् नरमाँऐं वाल़े बचन माँनें, जू तुँवारी सासो दे बऐं थुऐ, सेजे बचन माँनोंं, जू तुँवारी आत्त्मा खे मुँक्त्ति दियों।

²² परह् बचनों गाशी चाल्णों वाल़ें बंणों, सिर्फ शुण्णों वाल़े ही ने बणें जू आप्खे धोखा दियों।

²³ किन्देंखे के जू कुँऐं बचन का शुण्णों वाल़ा हों, अरह् तिदा चाल़णों वाल़ा ने हों, से तेसी आदमी जेष्णाँ असो, जू आप्णों मुँह हार्षी-सिसै दो दे:खो।

²⁴ ईन्देंखे के से आपु-आप्खे हार्षें-सिसै दा दे:खियों, परह् जबे तेथै शा आगू हुटो, तअ से बिस्तोड़ो बिसरी ज़ाँव, के हाँव देख्णों खे केष्णा असो।

²⁵ परह् जू आदमी पंणमिश्वर के बादे ज्ञाँन-निय्म के मुँताबिक नंजीक शे दे:खो, जिन्दे लई तेसी अजादी भेंटो, अरह् तिन्दे गाशी से बिचार भे करिया करह्, अरह् शुणिऐयों बिना भूली-बिसरी तिन्दे के बिचार दा चाल्दा रंह्, सेजो ही आप्णे कर्मों खे आशिर्बाद पाँदा।

²⁶ जे कुँऐं आप्खे भगत्त-संत्त जाँण्ल़ा, अरह् आप्णी जीभों दे लगाम ने लाँव, तअ से आप्णें मंन दा धोखा खाँव; अरह् तेस्की भगत्ति बै-कार असो।

²⁷ परंम-पिता पंणमिश्वर के साम्णें साची अरह् शुद्ध भगत्ति सेजी ही असो, जू अनाँथों अरह् बिधवा के सु:ख-दु:ख दे मंदत करह्, अरह् आपु दा किऐ संईसारिक कल़ंक ने लागणों दियों।