इब्रानियों 9 - Sirmouri

पबित्र ताँम्बू दी सेंवा

¹ तेसी आगले वाचा दे भे पंण्मिश्वर की आरार्धना अरह् संईसारीक देऊँठी के बारे दे निय्म थिऐ।

² किन्देंखे के ऐक ताँम्बू बंणाँया गुआ थिया, जिन्दें के बाईले पड़्दे पाछी ऐक दिअट, अरह् बैदी-पूज हों थी, जिन्दें गाशी पबित्र रोटी थंई ज़ाँव थी, अरह् तेसी ताँम्बू खे पबित्र जागा बुली थी।

³ अरह् दुज़े पड़्दे पाछी सेजा भाग थिया, जिन्देखे सोभीं शी जादा पबित्र जागा बुली ज़ाँव थी।

⁴ तेथै धूप बाल़्णों खे सुन्नें के बैदी, अरह् धंनियाँरो थियों, अरह् सेजी जागा चौऊँ ढबे शे सुन्नें के पत्रें लई मंड़ी अंदी हों थी; अरह् सेजा बाचा का ऐक संनदूक थिया, जिन्दा मंन्ना ऐक बह्ड़े सुन्नें के च़ौरू दा भरा अंदा हों थिया; अरह् याजक-हारून के ढींगीं जिन्दें हमेशा नरंम पाच़ौ लागिया रंह् थिऐ; अरह् बाचा की च़ीरी-पाट्ड़ी भे तिन्दीं ही थंई अंदी रंह् थी।

⁵ अरह् तियों संदूक गाशी दो चंम्कदार बाज थिऐ, जू पंस्ताँवे के आस्णँ गाशी आप्णें पाख्ह लंई छ़या पाँव थिऐ; परह् हेबी ईन सब बातो का सुवाँ करियों बखाँण करणाँ किऐ मुँष्किल असो।

⁶ अरह् जबे ऐजी बादी चींजो तैयार हऐ रंई थी, तअ तेसी ताँम्बू के बाईले भाग दा याजक हर बख्त्ते हाजीर हंऐयों सेंवा का आप्णाँ काँम निप्टाँव थिऐ।

⁷ परह् भित्त्ले भाग दा सिर्फ महाँ-याजक साल्ह दा ऐकी हीं बई ज़ाँव थिया, परह् से भे बंल़ी के लह्ऊँ के बिना ने ज़ाऐ सको थिया; जैथू लह्ऊँ से आप्णीं ताँईऐ, अरह् ओकी लोगों की ताँईऐ अंण्जाँणे भूल-चूक की पाप की बंल़ी खे चड़ाव थिया।

⁸ ईन्दें लई पबित्र-आत्त्मा ऐजो ही देखाँव, के जाँव तोड़ी आगला ताँम्बू खह्ड़ा असो, ताँव-तोड़ी बैजाऐ पबित्र जागा के बाट् खुह्ली ने हंदी।

⁹ ऐजा बाईला ताँम्बू तअ ऐसी ज़ूगौ खे ऐक च़ींह्न असो, जिन्दी भेंट अरह् बंल़ीदाँण चड़ाऐ ज़ाँव थिऐ; जिन्दें लंई आरार्धना कर्णो वाल़े के बीचार सीद्ध ने हंऐ सको थिऐ।

¹⁰ ईन्देंखे से सिर्फ खाँणों-पीणों की चींजो अरह् भाँत्ती-भाँत्ती के नहाँण की बिदी-निय्म के मुँताबिक देह्-शरीर खे अज्ञाँ-निय्म असो; जुण्जे सुधार के बंख्त्तो तोड़ी बंणाँऐ गुऐ थिऐ।

मसीया के लह्ऊँ की शक्त्ति

¹¹ परह् जबे मसीया आणों वाल़ी चींजों के महाँ-याजक के रूप दे पर्गट हुऐ, तअ तिन्ऐ बैजाऐ सीद्ध ताँम्बू दे से जुण्जा के आदमी के हाथै ने बंणायाँ गुवा थिया; मंतल्व से ईयों संईसारी का ने थी।

¹² खाड़ू, अरह् बाकरे के लह्ऊँ के कारण ने, परह् तिन्ऐं आप्णें लह्ऊँ के कारण ही ऐकी बंई पबित्र जागे दे हाजीर हंऐयों, हमेशा खे छ़ुट्कारा देयाया।

¹³ किन्देंखे के जबे खाड़ू, बाकरे को लह्ऊँ अरह् कलोर धनियाँरे को खेऊड़ अ-पबित्र लोगो गाशी छिड़कियों, तिनके देह्-शरीर शुद्ध-शाँख्ल़ी अरह् पबित्र करी दियों थी।

¹⁴ तअ तबे मसीया को लह्ऊँ जिन्ऐं आपु आप्खे सदा अमर रंहणों वाल़ी आत्त्मा के कारण पंण्मिश्वर के सहाँम्णें नीर-दोष बंल़ीदाँण के रूप दा भेंट कंरियों चड़ाया; तअ तबे तुवाँरी अंन्त्तर आत्त्मा के मँरे अंदे कामों शे से कैई ने शुद्ध कर्दी? जू तुऐं जीऊँदें पंण्मिश्वर के सेंवा करी सको।

¹⁵ अरह् ऐसी ही कारण मसीया नुवें वाचा खे ऐक त्रींण चीज बंणा, जू तियों मंऊँत्ती के कारण जुण्जी आगले वाचा के बंख्त्ते अपराधों शा छ़ुट्कारा पाँणों खे कंरा गुवा थिया; जिन्दें लंई बंईदे अंदे लोग तेसी बाय्दे के मुँताबिक सदा खे हंकदार बंणाँऐ ज़ाँदे।

¹⁶ जे आँमें बसिय्त लऐ थंह्, तअ तिन्दा आप्णा हंक-अधिकार करह्, तअ तबे बसिय्त देणों वाल़े की मऊँती का प्रमाण पत्र देणा भे जरूरी हों; तबे ही तुँऐं हंकदार बंणी सको।

¹⁷ किन्देंखे के बाय्दे का बसिय्त-नाँमा सिर्फ तबे ही माँना ज़ाँव जबे जेसा बसिय्त-नाँमा देणों वाल़ा आदमी मँरी ज़ाँव, परह् जे से जीऊँदा हों तअ सेजा बसिय्त-नाँमा माँना ने ज़ाँदा।

¹⁸ ईन्देंखे आगला वाचा भे बिना लह्ऊँ के करा ने गंई।

¹⁹ किन्देंखे के जबे ऋषी-मूसा ऐ बादे लोगो खे अज्ञाँ-निय्म शुँणाऐं पाऐ, तअ तेने खाड़ू-बाकरे को लह्ऊँ करियों, पाँणी, अरह् लाल ऊँन, अरह् भेख्ल़ी की डाल़ी लंऐयों, तियों कताबी, अरह् सोभी लोगों गाशी छ़िड़की दितों।

²⁰ अरह् बुलो, “ऐजो तेसी वाचा को लह्ऊँ असो, जिन्दे के अज्ञाँ पंण्मिश्वर ऐ तुँओं खे पाल़्ण कर्णो खे देऐ थऐ।”

²¹ अरह् ऐष्णों ही तेने पबित्र-ताँम्बू अरह् सेंवा के बादे समाँनो गाशी सेजो लह्ऊँ छिड़काव।

²² अरह् अज्ञा-निय्म के मुँताबिक मंतल्व; ऐक नाँम चींजो लह्ऊँ के छ़िड़कावे के कारण शुद्ध करी गंई; अरह् बल़ीदाँण के लह्ऊँ के बिना पाप खे माँफ़ी भेंट्णीं सुखी ने आथी।

मसीया के बल़ीदाँन के जाँणें पाप माँफ हों

²³ ऐजी बादी चींजों स्वर्गो के चीजो ऊँनरी असो। जे तिन्दे के शुद्धी ऐष्णी बिधी-निय्म के कारण कर्णी जरूरी थीं; तअ स्वर्गों की चींजों खे ऐक खास बल़ीदाँण करणाँ जरूरी असो।

²⁴ किन्देंखे के मसीया तियों आदमी के हाथो की बंणाऐ अंदी पबित्र जागा दे हाजीर ने हंई, जुण्जा सोत्तिखे पबित्र जागा ऊँनरा थिया, परह् मसीया यीशू सीद्धें स्वर्गो दे ही हाजीर हुऐ; जू अमाँरी ताँईऐं ऐबे पंण्मिश्वर के सहाँम्णें देखाई पड़ो।

²⁵ ऐजो ने के से आपू आप्खे बार-बार भेंट चड़ाँव, जेष्णों के महाँ-याजक हर साल्ह ओकी को लह्ऊँ लऐयों बैजाऐ-पबित्र जागा दा हाजीर हों।

²⁶ ना तअ संईसारी के उत्पत्ति शा ऊबा तिनू बार-बार दु:ख भुगणा पड़दा; परह् ऐबे ज़ूगौ के आखरी दे से ऐकी ही बई पर्गट हुऐ, जू आप्णें ही बल़ीदाँण के जाँणें अमाँरे पाप दुर करी दियों।

²⁷ अरह् जेष्णों आदमी खे ऐकी बई मर्णो, अरह् तिन्दे पाछी नियाँव का हणों जरूरी पाक्को असो।

²⁸ तेष्णा ही मसीया भे भहीते के पापो थागणों खे ऐकी बई बल़ीदाँण हुऐ, अरह् जुण्जे लोग तिनकी बाट-बाट जुहों, तिनके पाप के छ़ुट्कारे खे, हजो से दुज़ाल़िऐ बिना पाप के थागी देखाई पड़्दे।