इब्रानियों 5 - Sirmouri

¹ किन्देंखे के ऐक नाँम महाँ-याजक आदमी मुँझी शा ही चुणा-छाटा ज़ाव, अरह् आदमी ही खे ईन बातो के बारे दा जुण्जी के पंण्मिश्वर के बारे दी असो, अरह् बंणाँई गंई, के से भेंट अरह् पाप की बंल़ी चड़ाया करह्।

² तेस्दी बै-संह्झ़ों, अरह् भूले-भट्के की गंईलो, नंरमाँई का बरताव कर्णो के तागत्त हों, किन्देंखे के से आपु भे आदमी की कंमजूरी शा घीरा अंदा असो।

³ ईन्देखे ऐजो जरूरी ही असो, के से पापो खे बंल़ी चड़ाया करह्; ओकी लोगों के पापो की ताँईऐ, अरह् आप्णें पाप के ताँईऐ भी।

⁴ कोसी भे आदमी खे ऐजी आदर-ईज्जत्त आप्णीं कोशिष शी ने भेंट्दी; परह् पंण्मिश्वर के बुलावे के कारण भेंटो, जेष्णी के याजक-हारोन खे भे भेटी थी।

⁵ ऐशे ही दाँई मसीया ऐ भे महाँ-याजक के पंद्-भार गाशी बंईठणों खे आपु खे बह्ड़ा ने जाँणीं; परह् पंण्मिश्वर ऐ, तिनखे बड़ियाऐ देऐयों बुलो: “तू मेरा बैटा असो, ऐत्त्लो हाँव तेरा बाबा बंणाँ।”

⁶ जेष्णों पंण्मिश्वर ऐ कैथी ओक्त्ते भे बुलो थियों: के “तू मलिकीसिदक के रित्ती गाशी सदा खे ऐक याजक असो।”

⁷ प्रभू यीशू ऐ आप्णें आदमी के सरूप दो रंह्दें बख्त्ते जुराल़ो लेरो-माँरी-माँरियों अरह् आशुवों बुवाऐ-बुवाऐयों तिन कैई जुण्जें तिनू मऊँत्ती शे बंचाऐ सको थिऐ, तिन शी तिन्ऐ प्रार्थनाँऐं अरह् बिनंत्ती करी, अरह् तियों भगत्ति के कारण तिनकी शुँणीं भी गंई।

⁸ बैटे हणों गाशी भे तिन्ऐ दु:ख्ह भुगी-भुगियों अज्ञाँ का पालन करणा शिखा;

⁹ अरह् सीद्ध बंणियों आप्णें बादे अज्ञाँ माँनणों वाल़े की ताँईऐं सदा खे छ़ुट्कारा देणों वाल़े बंणें;

¹⁰ अरह् तिनखे पंण्मिश्वर की ढबे शा मलिकीसिदक के जेष्णाँ महाँ-याजक का पद्-भार भे भेटा।

बिश्वाष शे ने भट्के

¹¹ ईन्देके बारे दी आँमों कैई बुल्णों खे भोत्त कुछ बातो असो, जिन्दे को सम्झाणों भे कठीण असो; किन्देंखे के तुँवाँरी सम्झ कंम्म असो।

¹² बख्त्तो के बिचार शे तअ तुऐं गुरू बंणीं गुऐ चैई थिऐ; तबे कियों ऐजो जरूरी असो, के कुँऐ तुओं खे दुज़ाल़िऐ पंण्मिश्वर के बचनों के शिक्क्षा हजों शुरू शी ही दियों? अरह् तुऐं ऐशे बंणी गुऐ; के हेबी तोड़ी तुओं खे नाँज के बद्ल़े दुध ही भेंटो चैई।

¹³ किन्देंखे के दु-दू-पाँडे के नहाँन्ड़िया कैई तअ भले-बुरे बातो के पंह्छ़्याँण ने हंदी; किन्देंखे के से हेबी नहाँन्ड़िया ही असो।

¹⁴ परह् नाँज अरह् भारी खाणाँ, तअ बह्ड़े सम्झदार लोगों खे ही हों, जुण्जे ज्ञाँन-संहम्झ़ दे अरह् भले बुरे के भेंद् कर्णो दे संहम्झ़दार हों।