इब्रानियों 3 - Sirmouri

प्रभू यीशू ऋषी-मूसा शा भे बड़ा असो

¹ ईन्देंखे हे, पबित्र भाऐ-बंईणों तुँऐ जुण्जे स्वर्गो दे बईदी थुऐ, अरह् तुऐं स्वर्गो के हिस्सेदार असो; तेसी जुण्जा पंण्मिश्वर ऐं डेयाल़ा, तेसी महाँ-याजक प्रभू यीशू गाशी जिनकी आँमें माँनता करह्, तिनका ख्याल करिया करह्।

² जेष्णाँ ऋषी-मूसा पंण्मिश्वर के बादे घराने दा बिश्वाष ज़ुगा थिया; तेष्णें ही प्रभू यीशू भी पंण्मिश्वर खे बिश्वाष ज़ूगै थिऐ, जिन्ऐं तिनू चूणीं-छाँटी थुऐ थिऐ।

³ किन्देंखे के प्रभू यीशू ऋषी-मूसा शे जादा बड़ियाई ज़ूगै माँने संहम्झे गुऐ, जै-तोड़ा के घरह् बाँण्णों वाल़ा; घरह् शा जादा आदर-ईज्जत्त ज़ुगा माँना ज़ाँव।

⁴ किन्देंखे के ऐक नाँम घरह् का कुँऐं ना कुँऐं बाण्णों वाल़ा हों, परह् जिन्ऐं सब-कुछ बाँणों सेजे पंण्मिश्वर ही असो।

⁵ ऋषी-मूसा तअ पंण्मिश्वर के बादे घरोह् दा सेंवक जिया बिश्वाष ज़ूगा रूआ, के जुण्जी बातो का बखाँण हंणों वाल़ा थिया; तिन्देंके बारे दे आप्णी गुवाऐ-शाज़्त्त दियों।

⁶ परह् मसीया बैटे के रूप दा पंण्मिश्वर के कुँड़बे दा बिश्वाष ज़ूगा थिया; अरह् सेजा कुँड़बा आँमें असो, जे आँमें हिमम्त्त दे अरह् आप्णें बिश्वाष दे आखरी तोड़ी पाक्कै अरह् अट्ल़ रंह्।

बै-बिश्वाषी खे चिताँव्णी

⁷ ईन्देंखे ठीक जेष्णाँ पबित्र-आत्त्मा का बुल्णाँ असो: के “जे तुँऐं ऐत्त्लो तिनकी धाव शुँणो,

⁸ तअ तुऐं आप्णे मंन कुठूर ने करह्: जेष्णों के तुऐं मुँह घिपऐयों जंगल़ों दो पंरख्णों के बख्त्तें कोरो थियों।

⁹ जेथै तुवाँरे नाना-बाबा ऐ: च़ाल़िष साल्ह तोड़ी मेरे बड़े काँम देखियों भे, मुँखे बुली माँरियों मुँह परखा थिया।

¹⁰ ईन्देंखे हाँव तेसी बख्त्ते तियों पीड़ी खे घीपीं गुवा, अरह् मुँऐं बुलो: ‘तुवाँरे मंन सदा भट्कोंदें रंह्, परह् तिन्ऐं मेरी बाट ने पंह्छ़याँणी।’

¹¹ ईन्देंखे मुँऐ आप्णें रोषौ दे ऐजी षौह् करी: के मेरे बिश्वाष दे से कोद्दी भे हाजीर ने हंऐ सक्दे।”

¹² हे भाऐ-बंईणों च़ौक्क्ष रूऐ, के तुँओं मुँझी कुँऐं बुरे अरह् बै-बिश्वाषी मंन के ने हों, जू तुँओं से जीऊँदे पंण्मिश्वर शे दुर्के ने नींयों।

¹³ परह् जाँव तोड़ी सेजो देस, मंतल्व जिन्देंखे ऐत्त्लो को देस बुली; से अमाँरे सहाँम्णें रोज ओका ओकी संहम्झाँदे रंह्, के कोद्दी ऐशो ने हईयों के तुँओं मुँझ़्शा कुँऐं जंण पाप के छल़-कप्ट, दा आऐयों भट्की ने ज़ाँव।

¹⁴ किन्देंखे के आँमें बिश्वाष दे मसीया के हिस्सेदार हऐ रूऐ, जे आँमें आप्णे आगले भुर्षे गाशी आखरी तोड़ी पाक्कै हऐयों अट्ल़ रंह्।

¹⁵ जेष्णों बुलो ज़ाँव: के “जे तुँऐं ऐत्त्लो तिनकी धाव शुँणों, तअ आप्णे मंन कुठूर ने करे, जेष्णें के तुऐं मुँह घिपंऐयों तेसी बंख्त्तें जाँगल़ो दे करे थऐ।”

¹⁶ भला कुँण्जें थिऐ सेजे लोग, जिन्ऐं तिनकी धाव शुँण्णों गाशी भे तिनू घिपऐ थिऐ? कियों सेजे बादे लोग थी ने, जिनू ऋषी-मूसा के जाँणें मिस्र देश शे नीकाल़ियों छ़ुड़ाऐयों आँणें थिऐ?

¹⁷ अरह् कुँण्जे थिऐ सेजे, जिनू आरी से च़ाल़ीष साल्ह तोड़ी रूषै अंदे रूऐ? कियों से सेजे ही थी ने; जिन्ऐ पाप करा, अरह् तिनके मिंत्त्के तैथी जाँगल़ों दे पड़े अंदें रूऐ?

¹⁸ अरह् तबे कुँण थिऐ सेजे, जिनू आरी तिन्ऐं षौह्-कंस्म करी थी; के सेजे लोग मेरे बिषाँव दे हाजीर ने हंऐ सक्दे? कियों से सब सेजे ही लोग थी नें; जिन्ऐ तिनकी अज्ञाँ ने माँनी थी?

¹⁹ ईन्देंखे ऐजों साफ असों, के आप्णें बैबिश्वाष के कारण से हाजीर ने हंऐ संकी।