गलातियौं 4 - Sirmouri

बिश्वाष खे यहूदी ज्ञाँन-निय्म

¹ मेरे बुल्णों का मतल्व ऐजा असो; के हंकदार वारिस जाँव तोड़ी नाबालिक असो; से ताँव तोड़ी बादी घरोऊँच़ी-संम्पत्ती का मालिक हंदे भे दास जैष्णाँ असो;

² किन्देंखे के सेजा बालक जाँव तोड़ी बालिक ने हों; ताँव तोड़ी से आप्णें माँ-बाबा के हिसाब शा; रंक्क्षा कर्णों वाल़े, अरह् घर के कारिया-भारिया के बष दा रंह्।

³ अमाँरे भे तेष्णीं ही हाल हों, किन्देंखे के आँमें भे जाँव तोड़ी नहाँन्ड़िया थिऐं, ताँव-तोड़ी संईसारी के निय्म-रूवाजो के बष दे रंह्।

⁴ परह् जबे ठीक मोंक्का भेटा, तअ पंण्मिश्वर ऐ आप्णा बैटा डेयाल़ा, जू तिरंई शा पय्दा हुआ; अरह् निय्मों के बष दा जीयों थिया।

⁵ किन्देंखे के जू से मूसा खे भेटे गुऐ ज्ञाँन-निय्म दे फशे अंदें लोग खरदियों निय्म के बंन्धण शे उडे छुड़ाऐ दियों; जिन्दें लई आँमें पंण्मिश्वर के गोद लुऐ अंदें नहाँन्ड़िया अरह् वारिस बंणी ज़ाँव।

⁶ अरह् तबे तुँऐं जू पंण्मिश्वर के बैटे असो, ईन्देंखे पंण्मिश्वर ऐ तुवाँरे सासो दी बैटे की आत्त्मा देऐ थऐ; जू तुँऐं “हे अब्बा, हे बाबा” करियों बुली सको।

⁷ ईन्देंखे तुँऐं ऐबे दास ने आथी, परह् ऐबे बैटे असो; अरह् जबे तुँऐं बैटे बंणें, तअ पंण्मिश्वर के जाँणें वारिस-हंकदार भे बंणें।

गलातियों के लोगो का संत्त-पौलुस फिकर करह्

⁸ आगे जबे तुँऐं लोग पंण्मिश्वर ने जाँणों थिऐं, तअ तिनके दास थिऐ; जुण्जे आप्णें स्भाव शे ईश्वर ने आथी।

⁹ परह् ऐबे तुँऐं पंण्मिश्वर पछ़याँणी पाया; मतल्व पंण्मिश्वर ऐ तुँओं पछ़याँणें; तअ तुँऐं तिनू कंमजोर अरह् निकारे रूवाज-निय्म दे कैई फष्दे लागे; अरह् कैई तिन्दें पाछु ज़ाँदे लागे; कियों तुँऐं हजो तिनके दास बंणों चहाँव।

¹⁰ तुँऐं आपु खे कुँऐ खास देस, अरह् कुँऐं खास भीना, अरह् कुँऐ खास पर्भे, अरह् कुँऐ खास बर्ष कैई माँनों।

¹¹ हाँव तुवाँरे बारे दा डरूऐ, के कोद्दी ऐशो ने हईयों, के जुण्जी मेंह्न्त मुँऐं तुँवारी ताईऐं करी थऐ, से बै-कार ने ज़ाँव।

¹² हे भाऐ बंईणों, हाँव तुँओं शी ढाल-अरज करू; के तुँऐं भे मुँह जैष्णे बंणों, अरह् हाँव भे तुवाँरे जेष्णाँ बंणी रूवा; हाँव ऐजी ढाल-अरज करू, परह् तुँऐं मेरो किऐं ने खुऐ थई।

¹³ परह् तुँऐं जाँणों ऐ, के आगे ही आगे मुँऐ देह्-शरीर के कंमजूरी के जाँणें, तुँओं कैई शी खुषख्बरी शुणाऐ।

¹⁴ अरह् तुँऐं भे मेरी देह्-शरीर की दषा जिन्दें लई तुँवारी परख करी गऐ थी, तिन्दें लई तुँऐं मुँह छोटा ने जाँणी; अरह् मुँह शी नफरत ने करी, परह् तुँऐं पंण्मिश्वर का स्वर्गदूत्त के जेष्णाँ मेरा आदर करा, जेष्णाँ के हाँव आपु मसीया यीशू ही थिया।

¹⁵ तअ तबे तुँवारी सेजी खुशी मंनाँणी केथै गऐ? हाँव तुवाँरा गुवाह्-शाज़्त असो; के जे हऐ सको, तअ तुँऐं आप्णी आँ:खी भे मुँखे गाड़ियों ऊँडी देंदे।

¹⁶ तअ तबे कियों हाँव तुँओं आरी साच्चो बुल्णों के जाँणें तुवाँरा बऐरी बणी रूआ?

¹⁷ से तुँओं दोस्त्त तअ बाँण्णें चहाँव, परह् तुवाँरे भेले खे ने; परह् से तुओं ज़ई-ज़ई कर्णे चहाँव; के तुऐं आपु तिनू ही आप्णें दोस्त्त बाँणों।

¹⁸ परह् ऐजो भे आछो असो, के भली बातो खे हर बख्त मीष करी ज़ाव; परह् मीष भी आच्छ़ी काँम-काज़ कर्णो खे करी ज़ाँव, परह् सिर्फ तेसी ही बख्ते ने, जेख्णों हाँव तुँवारी गईलो हंऊँ।

¹⁹ हे मेरे नहाँन्ड़िया! जाँव तोड़ी तुँऐं मसीया का रूप जिया ने बणे, ताँव-तोड़ी मुँऐं सुणों की जेई पिड़ो सह्ऐ लई।

²⁰ मेरी हिछ़या तअ ऐजी असो, के ऐबे हाँव तुँओं कैई आऐयों; परह् कई किस्म की बातो बुलू, किन्देंखे के हाँव तुँवारी बारे दा ऊल़झण दा असो; के ऐबे का करह् ज़ाँव।

सारा अरह् हाजिरा का उदारण

²¹ तुँऐं जू निय्म के बष दो हंणों चहाँव, तअ मुँह कैई ऐजो बुलो; के कियो तुँऐं निय्म दो ऐजो शुणी ने के?

²² पबित्र ग्रन्थों लिखी थो; अब्राहम के दो बैटे हुवे, ऐक दासी का अरह् ओका आप्णी घरवाल़ी शा हुआ।

²³ परह् जुण्जा दासी के हुआ, से ऐक आँम भूग-बिसास शा पय्दा हुआ; परह् जुण्जा आप्णी घरवाल़ी शा पय्दा हुआ; से पंण्मिश्वर के बाय्दे के जाणें पय्दा हुआ।

²⁴ इन बातो को ऐजो अनाँणों असो: के सेजी दो तिरंई सारा, अरह् हाजिरा, पंण्मिश्वर के तेसी करार नाँमें की नीसाँणी असो; जू ऐक करार नाँमा सिनै धारह् गाशी करा गुवा थिया; जिऐ तिनू लोगो खे जन्म दिता, जू दास-बैठू थिऐं, ऐजा करार नाँमा हाजिरा दा पुरा हों।

²⁵ हाजिरा अरब के सिन्नै-धारह् के जैष्णी असो; से अच़कालिऐ के यरूशलेम जेष्णी असो; किन्देंखे के हेभी भे आप्णें नहाँन्ड़या आरी, से ऐत्लो तोड़ी गुलामी दे असो।

²⁶ परह् स्वर्गो को यरूशलेम अजाद असो, अरह् सेजी ही अमाँरी माँ, असो।

²⁷ किन्देंखे के पबित्र-ग्रन्थों दो लिखी थो: हे “शूनी-शाल़ी! मंजे करह्, जिन ऐं तुँऐं सुणों की पिड़ो ने सह्ऐं थई; जोरो की जय-जयकार करह्, किन्देंखे के छुड़ी अंदी की अलाद सुवागणों की अलादी शी भे जादा असो।”

²⁸ हे भाऐ बंईणों, आँमें इसहाक के जैष्णें बाय्दे की अलाद असो।

²⁹ अरह् जेष्णाँ तेसी बख्ते देह्-शरीर लई जन्मा अंदा, आत्त्मा लई जन्में अंदा सताँव थिया, तैष्णों ही ऐबे अरह् ऐत्लो भे होंदो लागो।

³⁰ परह् पबित्र-ग्रन्थों का बुलो? के “दासी अरह् तियारा बैटा निकाल़ी दियों, किन्देंखे के दासी का बैटा आप्णी घरवाल़ी के बैटे के गईलो, हंकदार वारिस ने हंदी।”

³¹ ईन्देंखे हे भाऐ बंईणों आँमें दासी की अलाद ने आथी; परह् आँमें आप्णी माँ, के अलाद असो।