गलातियौं 1 - Sirmouri

नंमष्कार

¹ संत्त-पौलुस के जू ना आदमी के ढबे शा, अरह् ना आदमी के जाँणें, परह् यीशू मसीया अरह् परंम-पिता पंण्मिश्वर के जाँणें, जिन्ऐं तेसी मरे अंदे मुझ्षा जियाल़ा प्रभू यीशू के खास-चैला असो,

² अरह् बादे भाऐ की ढबे शा, जू मेरी गईलो असो, गलातियों की कलीसियों के नाव:

³ परंम-पिता पंण्मिश्वर अरह् अमाँरे प्रभू यीशू मसीया के ढबे शी तुँओं खे कृपा अरह् शाँण्त्ति भेंटी चेंई।

⁴ तिन्ऐ ही आपु-आप्खे अमाँरे पापो की ताँईऐं देऐ दिता, के जू कुँऐं अमाँरे पंण्मिश्वर के हिछ़या, के मुताबिक आँमों ईयों बुरी संईसारी शे छुड़ाऐ दियों।

⁵ तिनकी सतुति अरह् बड़ियाऐं ज़ूगौ-ज़ूगौ तोडी हंदी रंह्। आमीन।

कुँऐं ओकी खुषख्बरी ने आथी

⁶ मेरे तूरंबाणच़ूंटे, के जिन्ऐं तुँओं मसीया के कृपा दे बईदी थुऐ, तिनू आरी शे, तुँऐं ऐत्रे शिघे पाछू फीरियों कोसी ओकी ही खुष्खबरी की ढबे ज़ाँदें लागे।

⁷ परह् सेजी ओकी खुषख्बरी बिल्कुल भे आथी ही ने: परह् बात ऐजी असो, के कैतोड़े ऐष्णें असो, जू तुँओं दुबिदा दे पाँऐयों डराऐ दियों; अरह् मसीया की खुषख्बरी बिगाड़ी देंणी चहाँव।

⁸ परह् जे आँमों कैई कुँऐं स्वर्गो के दूत भे ईयों खुषख्बरी छुड़ियों, जुण्जी आँमें तुँओं कैई शी शुणाऐं थऐ, ईन्दें के सुवाऐं कुँऐं ओकी खुषख्बरी शुणाव तअ से सदा खे निरभाग असो।

⁹ जेष्णों आँमें आगे बुली थो, तैष्णों ही हाँव ऐबे हजो बुलू, के सेजी खुषख्बरी छुड़ो जियों तुँऐं माँनी थऐ, जे कुँऐं ओकी खुषख्बरी शुणाँव तअ से सदा खे निरभाग असो।

¹⁰ कियों ईन्दें लई तुवाँरे ऐशो जाँणियों, के हाँव आदमी की सहाऐता चहाँऊ? के ऐजो, के मुँह पंण्मिश्वर के सहाऐता भेटी चेंई? के हाँव आदमी खुशी कर्णें चहाऊँ? परह् जे हाँव आदमी खुशी करदा तअ हाँव मसीया के दास जेष्णाँ ने हंदा।

संत्त-पौलुस केशा दाँई प्रभू यीशू का खास-चैला बंणा

¹¹ हे भाऐ बंईणों, हाँव तुँओं खे बुली देऊँ, के जू खुषख्बरी मुँऐ शुणाऐ थऐ, सेजी आदमी की ढबे शी ने आथी।

¹² किन्देंखे के ऐ मुँह आदमी कैई शी ने भेंटी रंई, अरह् ना कोसी आदमी ऐ मुँह कैई ईन्दें की शिक्क्षा देऐ थई; परह् यीशू मसीया ऐ मुँह कैई पर्गट हऐयों देऐ थऐ।

¹³ यहूदी मत्त शा जू आगे मेरी चाल-ढाल थी, तिन्दे के बारे दो तुँऐं शुणी थो, के हाँव पंण्मिश्वर की कलीसिया बैजाऐ ही सताऊँ थिया, अरह् नाँष कर्णो की कोशिष करू थिया।

¹⁴ आप्णे जात्ती वाल़े, जुण्जे मेरी ऊमरी के थिऐ; तिनू हाँव यहूदी मंत्त दे बैजाऐ बंड़ाऊँ थिया; अरह् आप्णे नाँना-बाबा के रिती-रूवाज के मुँताबिक बैजाऐ होंस्ले दा थिया।

¹⁵ परह् पंण्मिश्वर ऐं जिन्ऐं मुँह माँई खी कुँखी शा ही मुँह छाँटी-चूणी थुवा थिया, अरह् आप्णी कृपा शा बय्दी थुवा;

¹⁶ जबे पंण्मिश्वर के ऐजी हिछ़ा हऐ, के मुँदा आप्णें बैटे का ज्ञाँन पर्गट करा, के बै-बिश्वाषी लोगो मुँझी खुषख्बरी का प्रचार करू, तेसी बख्ते मुँऐं कोसी आदमी की सलाह्-मशोहरा ने करी।

¹⁷ अरह् ना हाँव हजो पाछू यरूशलेम खे तिन कैई हुटी, जू मुँह शे आगे प्रभू यीशू मसीया के चैले बंणी रूऐ थिऐ, परह् तैख्णी हाँव अरब देश खे हुटा, अरह् तबे तेथै शा दमिश्क नगर दा पाछू आया।

¹⁸ तबे च़ींन साल पाछ़ी हाँव कैफा कैई शा भेंटिदा यरूशलेम खे हुटा, अरह् तेस कैई पुन्द्रंह् देसो तोड़ी तेथी रूआ।

¹⁹ परह् प्रभू के भाऐ याकूब के सुवाऐ, ओका कोसी भी प्रभू यीशू के चैले कैई शा ने भेटी।

²⁰ हाँव पंण्मिश्वर हाजिर जाँणियों बुलू, के जू किऐं मुँऐं लिखी लुओं, तिन्दो किऐं भे झुठों ने आथी।

²¹ ईन्दें पाछी हाँव सीरिया अरह् किलिकिया के इलाके दा आया।

²² परह् यहूदिया के कलीसिया ऐ जू मसीया दी थी, तिन्ऐं मेरो मुँह कद्दी ने दे:खी थई थी।

²³ परह् से लोगो कैई शो ऐजो ही शुणों थिऐ, के “आगे जुण्जा आदमी आँमों सताँव थिया, से ऐबे तेसी ही मत्त अरह् बिश्वाष की खुषख्बरी शुणाँव, जियों खुषख्बरी से नाष कर्णो की कोशिष करह् थिया।

²⁴ अरह् मेरे जाँणें तिन्ऐं पंण्मिश्वर की बड़ियाऐं करी।”