इफिसियों 6 - Sirmouri

माँ-बाबा अरह् नहाँन्ड़िया

¹ हे नहाँन्ड़िया, पंणमिश्वरो के नहाँन्ड़िया जिऐं बंणियों आप्णें माँ-बाबा के अज्ञाकारी बंणों, किन्देंखे के ऐजो ही ठीक असो।

² “आप्णी माँ-बाबा का आदर-ईज्जत्त करह्। किन्देंखे के (ऐजी ऐक आगली ऐशी अज्ञाँ असो, जिन्दे आरी; ऐक बाय्दा भे जुड़ा अंदा असो)

³ के तेरा भला हों, अरह् तू धर्ती गाशी बैजाऐ देसो तोड़ी जीऊँदी रंऐं।”

⁴ हे नहाँन्ड़िया वाल़े, माँ-बाबा! आप्णें नहाँन्ड़िया ने घीपोऐं; परह् प्रभू की शिक्क्षा अरह् चिताँव्णी देंदे तिनका पाल्ण-पोष्ण करह्।

मालिक अरह् दास

⁵ हे दासो, जू लोग ईयों संईसारी दे तुवाँरे माँलिक असो, आप्णें मंन की सच्चाई शे डर्दे अरह् काँम्बलिंदे, जेष्णी मसीया की तैष्णी तिनकी भे अज्ञाँ मानों।

⁶ आदमी के खुश कर्णो वाल़े जिऐ देखावे खे ने, परह् मसीया के दासो के जीऐ मंन शी पंण्मिश्वर की हिछ़या गाशी चालो;

⁷ अरह् तियों सेवा आदमी की ने, परह् प्रभू की जेऐ जाँणियों साच्चै दिल शी करह्।

⁸ किन्देंखे के तुँऐं जाँणोंऐं के जू कुँऐं जेष्णाँ आछा काँम-काज़ करला, भाव से दास हों, भाँव अजाद हों; से प्रभू शा तेष्णा ही तिन्दें का फल़ पाँदा।

⁹ हे माँलिको, तुँऐं भे घूर्की देणी छुड़ी दियों; अरह् आप्णें दास आरी आच्छ़ा बर्ताव करह्; किन्देंखे के तुँऐं जाँणों ऐं, के तिनका अरह् तुँवारा दुई का ऐक ही माँलिक असो; जुण्जा के स्वर्गो दा असो, अरह् से कोसी का किऐ भे पक्ष-पात ने करदा।

आत्त्मिक लड़ाई के हथियार

¹⁰ आखरी दो हाँव तुँओं खे ऐजो बुल्णों चहाँऊ; के प्रभू दे पाक्के हऐयों, प्रभू की पुरी शक्त्ति आरी आपु आपु खे शक्त्तिशाली बणाँओं।

¹¹ पंण्मिश्वर के बादे हथियार धारण करह्, के तुँऐ दुष्ट-शैतान की चालाकी के पलाँण के संहाम्णें खह्ड़े रंऐ सको।

¹² किन्देंखे के अमाँरा ऐजा मल़-ज़ूध, आदमी आरी ने; परह् हाकमों शा, अरह् अधिकारियों शा, अरह् ईयों संईसारी की अंधेर कर्णो वाल़े, अरह् अस्माँनों की दुष्ट-आत्त्माँओं आरी असो;

¹³ ईदेखे पंण्मिश्वर के बादे हथियार धारणं करी पाव, के तुवाँरे बुरे देसो दा तुँऐं तिनका सहाँम्णा करी सको; अरह् आखरी तोड़ी आप्णा फ़रज पुरा करियों तुँंऐं जींती ज़ाँव।

¹⁴ सच्चाई शी आप्णी कमरी दी गाच़ी भिड़ो, अरह् धार्मिक्त्ता का सोजूवा बाँम्बियों;

¹⁵ अरह् लातो दे मेल के खुषख्बरी की तैयारी के जूत्ते लाऐयों,

¹⁶ अरह् ईनू सोभी आरी बिश्वाष की ढाल लऐयों अट्ल़ रंह्ं, जिन्दे लई तुँऐं तेसी दुष्टो के बादे जल़्दे तीर हिशाल़ी सको।

¹⁷ अरह् छुट्कारे का टोप, अरह् आत्त्मा की तरवार, जू पंण्मिश्वर का बचन असो, तेसी ऊडा करह्।

¹⁸ हर बख्ते, अरह् हर ढंग शे पबित्र-आत्त्मा दी प्रार्थना, अरह् बिन्त्ती कर्दे रंह्, अरह् ईन्देंखे बीऊँजी रंह्ं, के बादे पबित्र लोगो खे लगातार बिन्त्ती, करिया करह्,

¹⁹ अरह् मुँखे भे! के मेरे बुल्दी बई ऐशा असरदार बचन देईला, के हाँव हिम्मत्त आरी खुषख्बरी का भेद् बुली सकू;

²⁰ जिन्देकी ताँईऐं हाँव शाँगल़ी दा हिड़कऐयों अंदा राजदूत्त असो; अरह् ऐजो भे के मुँह तिनके बारे दो जेष्णों बुल्णों पड़ो, हाँव तेष्णों ही दिड़्-हिम्मत्त करियों बुली सकू।

आखरी बात

²¹ तुखिकुस, जू प्यारा भाऐ, अरह् प्रभू दा बिश्वाष ज़ूगा दास असो, से तुँओं कैई बादी बातो बुल्दा, के तुँऐं भे मेरे हाल जाँणों के हाँव केष्णा रंह्ऊँ।

²² तेसी मुँऐं तुँओं कैई ईदेखे डेयाल़ी थुवा, के तुँऐं अमाँरे हाल-चाल जाँणों, अरह् से तुवाँरे मंन खे शान्त्ति दियों।

²³ परमं-पिता पंण्मिश्वर अरह् प्रभू यीशू मसीया के ढबे शी भाऐ, बईणों खे शान्त्ति अरह् बिश्वाष आरी प्यार भेटो।

²⁴ जुण्जा कुँऐ अमाँरे प्रभू यीशू मसीया शो साच्चो प्यार करह्, तिनू सोभी गाशी अपरंम-पार कृपा हंदी रंह्।