इफिसियों 5 - Sirmouri

त्तेज-प्रकाश की अलाद

¹ हे, प्यारे नहाँन्ड़िया तुँऐं पंण्मिश्वर के अलाद असो, ईन्देंखे तिनके जिऐ बंणों;

² प्यार की बाटो दे चालो, जेष्णों मसीया ऐ तुँओं आरी प्यार कोरो, अरह् आच्छ़ी खुष्बू बणियों आपु अमाँरी ताँईऐं पंण्मिश्वर के साम्णिऐं भेंट बंणियों बल़ीदाँण करी दियों।

³ जेष्णें के पबित्र लोग हुऐ चैई, तुवाँरे बिचो दे किऐ भे च़ूरीजारी ने हंऐ चैंई, अरह् ना किऐ अशुद्ध काँम-काज़, अरह् ना किऐ लोभ-लाल़्च, के बात तक ने हऐ च़ैई;

⁴ अरह् ना बैशर्मी ना मुँरूख्ता की बात-चीत्त की, ना ठाठै के; किन्देंखे के ऐजी बादी बातो आछ़ी ने लागदी, बलकी तुँऐं लोग पंण्मिश्वर का धन्यबाद ही देईया करह्।

⁵ किन्देंखे के तुँऐं ऐजो बिलकुल जाँणों ऐ, के कोसी च़ूरी-जारी कर्णों वाल़े, के कुँऐं अशुद्ध जंण, के लोभी आदमी, जुण्जा के मुर्ती पुज्णों वाल़े के बुराबर हों; मसीया अरह् पंण्मिश्वर के राज्य दा तेस्का किऐ भे हंक-अधिकार ने हंदी।

⁶ कुँऐं तुँओं खे बै-कार बातो शा धोखा ने दियों, किन्दें खे के ईनही काँम-काज़ के जाँणें; पंण्मिश्वर की सजा का कुरूध अज्ञाँ ना माँनणों वाल़े गाशी भड़को।

⁷ ईन्देंखे तुँऐं तिनके साथी ने बणें।

⁸ किन्देंखे के तुँऐं तअ आगे ईनाँरे दे थिऐं, परह् ऐबे प्रभू के त्तेज-प्रकाश दे असो; तअ: त्तेज-प्रकाश की अलाद के संमाँन चालो;

⁹ (किन्देंखे के त्तेज-प्रकाश का फल़ साँत्त-भाती भलाई, अरह् धार्मिक्त्ता, अरह् सच्चाऐ असो),

¹⁰ अरह् ऐशो परख-अजमाँव के प्रभू के का आच्छ़ो लागो।

¹¹ जुण्जे लोग ईनाँरे के नीषफल़ काँम-काज़ करह्, तुँऐं भे तिनके साथी ने बंणे; परह् तिनखे ऐजो बुलो, के ऐजे बुरे काँम-काज़ तुऐं भे ने करे; अरह् तुँऐं तिनू भे सम्झाऐ,

¹² किन्देंखे के तिनके चुप्पी के काँम-काज़ की चर्चा भे बैशर्मी की बात असो।

¹³ त्तेज-प्रकाश ईनू बादी बुरी बातो पर्गट करी दियों, अरह् इन बातो की असलिय्त रूप सोभी कैई शा देखाँव,

¹⁴ अरह् जुण्जो देखियों पर्गट हों, से आपु भे त्तेज-प्रकाश बंणों, ईदेखे पबित्-ग्रन्थों दो लिखी थुओं: के “हे सुतणों वाल़े, नींज़ो शे ऊबे बिऊँजो, अरह् मँरे अंदे मुझ्शे ऊबे जियों, मसीया का त्तेज-प्रकाश तुँओं गाशी चंम्मकोदा लागा।”

¹⁵ ईदेखे सुओं करियों देखो, के तुँऐं केष्णी चाल-चालो, बैसम्झ के जैष्णें ने, परह् बुद्धी-माँन के सँमान चालो।

¹⁶ सदा बख्तो का मोका किम्त्ती जाँणों, किन्देंखे के ऐजे देसो बुरे असो।

¹⁷ ईदेखे बैसम्झ ने बंणे, परह् ध्याँन शो संह्म्झों के प्रभू की हिछ़या का असो।

¹⁸ अंगुरोह् के शाड़े अँदें रंस शे मंतवाल़े ने बणें, किन्देंखे के ईदे लई लूचपंण हों, परह् पबित्र-आत्त्मा शे भरपूर हंदे ज़ाव,

¹⁹ अरह् आपु मुझी भजन, अरह् स्तुति गाँन, अरह् आत्त्मिक गीत गाऐया करह्, अरह् आप्णें-आप्णें मंन दे प्रभू के साम्णें गाँदे अरह् बजाँदे रंह्।

²⁰ अरह् सदा बादी बातो खे अमाँरे प्रभू यीशू मसीया के नाँव शे पंण्मिश्वर का धन्यबाद कर्दे रंह्।

²¹ मसीया के आदर-ईज्जत दे ओका ओकी के बंष दे रंह्।

घरवाल़ा अरह् घरवाल़ी

²² हे घरवाल़ियों, आप्णे-आप्णे घरवाल़े की ऐशी बंष दी रंह् जेष्णी प्रभू के।

²³ किन्देंखे के घरवाल़ा घरवाल़ी को मूँड असो, जैष्णें के मसीया कलीसिया को मूँड असो; अरह् कलीसिया तिनकी देह्-शरीर असो, अरह् आपु ही देह्-शरीर का मुँक्त्ति देणों वाल़े असो।

²⁴ परह् जेष्णी कलीसिया मसीया के बंष दी असो, तैष्णी ही घरवाल़ी भे ऐकी नाँमों बातो दी आप्णे-आप्णे घरवाल़े की बंष दी रंह्।

²⁵ हे घरवाल़ों, आप्णी-आप्णी घरवाल़ी आरी प्यार थुऐं, जेष्णाँ मसीया ऐ भे कलीसिया आरी प्यार करियों आपु आपु खे तिनकी ताँईऐं देऐ दिता।

²⁶ के तिनू बचन के जाँणें पाँणी के नहाँणों लेई शुद्ध करियों पबित्र बंणाऐं,

²⁷ अरह् तिनू ऐक ऐशी त्तेज-प्रकाशित कलीसिया बंणाऐयों आपु कैई खह्ड़ी करी, जिंदा ना कंल़ंक, ना किऐ दाग, अरह् ना किऐ ऐशा दोष-कसूर हों; परह् तुऐ पबित्र अरह् बै-कसूर बंणों।

²⁸ ऐशो ही दाई ऐजो ठीक असो, के घरवाल़े आप्णी-आप्णी घरवाल़ी आरी आप्णी देह्-शरीर के संमाँन प्यार करह्, जुण्जा आप्णी घरवाल़ी आरी प्यार करह् से आपु आपु शो प्यार करह्।

²⁹ किन्देंखे के कुँणिऐं कद्दी आप्णी देह्-शरीर शो बईर ने करी, परह् तिन्दे का पाल्ण-पोष्ण करह्; मसीया भी कलीसिया आरी ऐष्णों ही करह्।

³⁰ ईन्देंखे के आँमें मसीया की देह्-शरीर के अंग असो।

³¹ ईदेखे आदमी आप्णें माँ-बाबा छुड़ियों आप्णी घरवाल़ी आरी मीलियों रंह्, अरह् से दुन्ने ऐक तंन बंणीं ज़ाँव।

³² ईदेका भेद् तअ बड़ी बात असो, परह् हाँव ईथे मसीया अरह् कलीसिया के बारे दो बुलू।

³³ परह् तुँओं मुँझ़ी भे ऐक नाँम आदमी आप्णी घरवाल़ी आरी, आपु जेष्णों प्यार करह्; अरह् घरवाल़ी भे आप्णे घरवाल़े का आदर-ईज्जत्त करह्।