इफिसियों 3 - Sirmouri

गऐर यहूदी आरी संत्त-संत्त-पौलुस की सेवा

¹ ईन्दीखे हाँव पौलुस जू तुँओं गऐर यहूदी की भलाई की ताँईऐं मसीया यीशू दा कय्दी असो,

² जे तुँऐं पंण्मिश्वर की तियों कृपा के ईन्त्तजाँम के बारे दो शुँणीं थुओं, जुण्जी कृपा तुओं खे मुँह कैई देऐ थंऐ;

³ मंतल्व ऐजा के सेजा भेंद्-पता मुँह कैई बखाँण के कारण ही पर्गट हुवा; जैष्णों के मुँऐ आगे भे तुओं खे दाँणिक-दाँणिक लिखी थुओं,

⁴ जिन्दे लई तुँऐं पढ़ियों जाँणी पाँव, के हाँव मसीया का सेजा भेद्-पता केथै तोड़ी जाँणीं पाँऊ।

⁵ ऐजा गुप्त भेद्-पता आगली पीड़ी के लोगो कैई ने बुली थई थी, परह् ऐबे पबित्र-आत्त्मा के जाँणें तिनके पबित्र खास-चैले अरह् ऋषियों कैई पर्गट करी थुवा,

⁶ सेजा गुप्त भेद् ऐजा असो, के खुषख्बरी के जाँणें यहूदियों की गईलो गऐर यहूदी लोग भे पंण्मिश्वर के राज्य के बारीस, अरह् पुरे हंकदार बंणी गुऐ; अरह् से दुन्ने ड़ूंग ऐक ही देह्-शरीर का अंग असो, अरह् प्रभू यीशू मसीया के जाँणें करे गुऐ बाय्दे के साथी बंणें।

⁷ पंण्मिश्वर ऐ आप्णी शँक्त्ति के अधिकार शे मुँखे ऐजी कृपा देऐ थऐ, के हाँव तेसी खुषख्बरी का दास बणू;

⁸ मुँखे जू पंण्मिश्वर के लोगो मुँझ्शा सोभी शा छुटा असो, मुँखे ऐजा बरंदाँण भेटी रूआ, के हाँव गऐर यहूदी खे मसीया की अपरंम-पार कृपा के खुषख्बरी शुँणाँऊ;

⁹ के हाँव सोभी लोगो कैई ऐजी गुप्त राज की बात पर्गट सपष्ट करू, जू बादी संईसारी के रंचणों वाल़े असो, तिन्ऐ सेजी बात हेबी तोड़ी चुप्पी थऐ थई थी;

¹⁰ जू ऐबे कलीसिया के जाँणें पंण्मिश्वर का साँत्त-भाँत्ता ज्ञाँन तिनू हाकमों गाशी अरह् अधिकारियों गाशी जू स्वर्गिऐं जागा दे असो, तिनू कैई पर्गट करा ज़ाँव।

¹¹ पंण्मिश्वर ज़ूगौ-ज़ूगौ शा जू मतल्व आप्णें मंन दा जुण्जा पलान करी थुवा थिया, तिन्ऐ सेजा मतल्व अमाँरे प्रभू यीशू मसीया के जाँणें पुरा करा।

¹² आँमें प्रभू यीशू मसीया गाशी बिश्वाष करह्, अरह् तबे ही आँमें पुरे भूर्षें आरी, बै-झिझ्क हऐयों पंण्मिश्वर कैई ज़ाँव।

¹³ ईन्देंखे हाँव तुओं लोगो खे ऐजी ढाल-अरज करू, के जू कल़ेश तुँवारी ताँईऐं मुँह भेट्दे लागे, तिनके जाँणे तुँऐं हिम्त्त ने हारे, किन्देंखे के तिन्दी ही तुँवारी बड़ियाऐ असो।

इफिसियों खे संत्त-पौलुस की अर्जी

¹⁴ हाँव ईन्दी के ताँईऐं तेसी परमं-पिता पंण्मिश्वर के साम्णें घुन्डू नुवाँऊ,

¹⁵ जिन्दे लई स्वर्ग अरह् धर्ती गाशी, ऐक नाँम घराने को नाँव थुओ ज़ाँव,

¹⁶ के से आप्णी बड़ियाऐ के धन के मुँताबिक तुँओं खे ऐजो दाँण दियों; के तुँऐं तिनके पबित्र-आत्त्मा शे आप्णें भत्ले आछे बिचार दे शक्त्ति पाँऐयों तागतबर बंणदे ज़ाँव,

¹⁷ अरह् बिश्वाष के जाँणें मसीया तुवाँरे दिल-सासो दे बंसो, अरह् हाँव तुवाँरी ताँईऐं ऐजी प्रार्थना करू, के तुँऐं प्यार दे ज़ड़ पाक्ड़ियों आप्णी पह्-नींव पाक्की करह्,

¹⁸ सोभी पबित्र लोगो की गईलो भली-भाँत्ती सम्झणों के शँक्त्ति पाव, के तिन्देकी लंम्बाऐ अरह् चौड़ाऐ का असो, अरह् से कैत्रों ऊगलो अरह् कैत्रो निगूओं असो,

¹⁹ अरह् मसीया को सेजो प्यार जाँणी पाँव, जुण्जो अमाँरे ज्ञाँन-सम्झ शो बाईरो असो; के तिन्दें लंई तुँऐं पंण्मिश्वर के बादी भरपुरी लंई शुरे-पुरे हऐ ज़ाँव।

²⁰ ऐबे जुण्जा ऐष्णा शँक्त्तिशाली असो, के अमाँरे ढाल-अरज अरह् सम्झ शे बैजाऐ बड़े काँम-काज़ करी सको, तियों शँक्त्ति के मुँताबिक जुण्जी आँमों दे काँम-काज़ करह्;

²¹ कलीसिया दे अरह् मसीया यीशू दे तिनकी बड़ियाऐ पीड़ी शे पीड़ी तोड़ी ज़ूगौ-ज़ूगौ तोड़ी हंदी रंह्। आमीन!