कुलुस्सियों 4 - Sirmouri

¹ हे माँलिकों, आप्णे-आप्णे दास की गईलो नियाँव अरह् ठीक-ठीक बर्ताव करह्; ऐजो सम्झियों के स्वर्ग दा तुँवाँरा भी ऐक माँलिक असो।

कुछ बर्ताव के बारे दी सलाह

² प्रार्थना दे लागे अंदें रंह्, अरह् धन्यबाद आरी तिन्दे च़ौक्क्ष रंह्;

³ अरह् ईन्दें आरी आँमों खे भे प्रार्थना कर्दे रंह्, के पंण्मिश्वर आँमों खे बचन शुँणाँणों खे ऐशो दुवार खुली दियों, के आँमें मसीया का तेसी भेद् का बखाँण करी सको जिन्दे के जाँणें हाँव कय्दी दा असो;

⁴ प्रार्थना करे के हाँव तिनू तैष्णें पर्गट करू जैष्णें मुँह ठीक-ढंग शे कर्णे पड़ो।

⁵ बख्त्त-मुक्का किम्त्ती जाँणियों बाईले आरी बुद्धीमाँनी शा बर्ताव करे।

⁶ तुँवारी बात-चीत्त सदा मिट्ठी मंन भाऊँ हों, जू तुँऐं ऐजो जाँणी पाँव के कोसी आदमी खे केष्णा जबाब देणा पड़ो।

आखरी धन्यबाद

⁷ प्यारे भाऐ-बईणों, अरह् बिश्वाष ज़ुगे दास तुखिकुस, जू प्रभू दा मेरा साथी असो, मेरी बादी बातो तुँओं कैई बुली देंदा।

⁸ तेसी मुँऐ ईन्देंखे तुँओं कैई डेयाल़ा के तुँओं कैई अमाँरा बादा हाल-चाल का पता लागो, अरह् से तुवाँरे सासो दी शैल़ाऐ पाड़ो।

⁹ तेसी आरी मुँऐं उनेसिमुस भे डेयाल़ी थुवा, जू बिश्वाष ज़ूगा अरह् प्यारा भाऐ अरह् तुँओं ही मुझ्षा असो, ऐ तुँओं कैई ईथै की बादी बातो बुली देंदे।

¹⁰ भाऐ-अरिस्तर्खुस, जू मेरी गईलो कय्दी दा असो, अरह् मरकुस जू बरनबास का भाऐ असो, (जेस्के बारे दे तुँओं खे अज्ञाँ भेटी थी, के जे से तुँओं कैई आँव तअ तेसी आरी आछा बर्ताव करे),

¹¹ अरह् यीशू जैस्खे यूस्तुस बुली, तुँओं खे नमंष्कार बुलो, यहूदी लोगो मुझ्शा सिर्फ ऐजा ही पंण्मिश्वर के राज्य खे मेरे साथी अरह् मेरी शाँण्त्ति का कारण असो।

¹² भाऐ-इपफ्रास, जू तुँओं मुझ्षा असो, अरह् मसीया का दास असो, तुँओं खे नमंष्कार बुलो, अरह् सदा तुँओं खे प्रार्थना दा लागा अंदा रंह, जिन्दे लई तुऐ लोग बादी बातो दे पंण्मिश्वर के हिछ़या पुरी करियों, पुरी कर्णो दे पाक्के बंणों।

¹³ हाँव तिन्देका गुवाह्-शाज़्त्त असो, के से तुँओं खे अरह् लौदीकिया नंगर अरह् हियरा-पुलिस नंगर वाल़े खे बड़ी मेंह्नत करदा रंह्।

¹⁴ प्यारा जड़यारा लूका अरह् देमास का तुँओं खे नमंष्कार।

¹⁵ लौदीकिया नंगर के भाऐ-बंईणों खे अरह् बंईण-नुमफास अरह् तिनके घर की कलीसिया खे नमंष्कार बुले।

¹⁶ जबे ऐजी पत्री तुवाँरे कागी पढ़ी पाईली, तअ ऐशो करे, के लौदीकिया के कलीसिया दे भे पढ़ी ज़ाँव, अरह् सेजी पत्री जू लौदीकिया शे आँव तियों तुँऐं भे पढे़।

¹⁷ अरह् भाई-अर्खिप्पुस खे बुले के जू सेवा प्रभू दी ताँवखे देऐ थऐ, तियों च़ौक्क्षशाई शी पुरी करे।

¹⁸ मेरा पौलुस का आप्णे हाथे लिखा अंदा नमंष्कार। हाँव हेबी भे कय्द असो, ऐजो तुऐ भे चित्ते थुऐं; अरह् तुँओंखे शाँण्त्ति भेटो। आमीन