प्रेरितो कै काम 9 - Sirmouri

शाऊल का मंन बद्ल़ा

¹ शाऊल तबे भे प्रभू के चैले धंम्काँणें, अरह् माँरी देंणों की धुनं-लंगन दा हों थिया; तबे तेने महाँ-याजक कैई ज़ाऐयों,

² तेने दमिश्क के चौत्रें के नाँव दे पत्र माँगे, जिन्दा तेस्खे ऐजा हंक-अधिकार दिया गुवा थिया; के जे कोसी भे बिश्वाषी यरूशलेम दे बाँनियों आँणों, से तिरंई, हों भाँव मंरोद् हों।

³ जबे से यात्रा कर्दे-कर्दे दमिश्क नंगर कैई पंह्ऊँचा, तअ ऐक-दंम हाँड्दे-हाँड्दे अस्माँनों शी ऐक ज्योत्ति-प्रकाष तेस्के च़ोंऊँ ढबै बिजूल़ी जेऐ चंम्क्की

⁴ तबे से धनियों धर्त्ती गाशी पड़ा, अरह् तेने ऐक धाव शुँणीं; के मुँखे कुँणिऐं किऐ बुली लो, “शाऊल! शाऊल! तुऐं मुँह कैई स्ताऐ लुवा?”

⁵ शाऊल ऐ बुलो, “हे प्रभू! तू कुँण असो?” तिन्ऐ बुलो, “हाँव यीशू असो, जेसी तुँऐं स्ताऐ लुवा।

⁶ ऊँबा बींऊँजियों नंगर दा ज़ा, अरह् ताँव जुण्जो कर्णो पड़लो, सेजो ताँव कैई तेथी ही बुलो ज़ालो।”

⁷ जुण्जे आदमी शाऊल की गंईलो, चाली रूऐ थिऐ, से तियों धाव शुँणियों हकै-बकै रूऐ; तिन्ऐ सेजी धाव तअ शुँणीं, परह् तिन्ऐं देखी ने कोसी भीनै।

⁸ तबे शाऊल धनियों शा ऊबा बीऊँजा, परह् तेस्के आखी ने खुली, अरह् तेस्के किऐ भे देखाई ने पड़ो थियों; ईन्देंखे तेस्के साथियों ऐ तेस्का हाथ थाँम्बड़ियों तेसी दमिश्क नंगर दा नीयाँ।

⁹ से च़ीन देसो तोड़ी शैड़ा बंणाँ अंदा रूवा, अरह् तेने किऐ खाई-पीं ने।

¹⁰ दमिश्क नंगर दा हनन्याह नाँव का ऐक चैला थिया, प्रभू यीशू ऐं तेस्खे दर्शण देऐयों बुलो, “हे हनन्याह!” तेने बुलो, “हे प्रभू! हाँव हाजिर असो।”

¹¹ प्रभू ऐ तेस्खे बुलो, “हेभी ‘सीधी’ नाँव की गल़ी दा ज़ा; अरह् यहूदा के घरह् दा तरसुस का रंहणों वाल़ा, शाऊल का पता ला; से ऐसी बख्त्ते प्रार्थना करदा लागी रूवा।

¹² तेसी शाऊल के सुईणों लागो, के हनन्याह नाँव का ऐक आदमी ऐं आऐयों तेसी गाशी हाथ थुवा; के ऐस्के हजो आगू देखियों।”

¹³ परह् हनन्याह ऐ बुलो, “हे प्रभू! मुँऐ कंई लोगों कैई शो शुँणीं थो; के ऐने आदमी ऐं यरूशलेम दे तुवाँरे भगत्तों गाशी अत्त्याचार करी थुवा।

¹⁴ ऐसी आदमी खे मुँख्या-याजकों कैई शा भे ऐजा हंक-अधिकार भेटी रूवा; के ऐ ईथै तिनू सोभी बाँनी सको, जुण्जे तुवाँरे नाँव के दुवाई देऐया करह्।”

¹⁵ प्रभू ऐ हनन्याह खे बुलो, “ज़ाओ! से मेरा च़ूणाँ-छ़ाँटा अंदा असो; से गऐर यहूदी, राजाओं अरह् इस्राएलियों के सहाँम्णें मेरे नाँव का प्रचार करला।

¹⁶ हाँव आपु तेस्खे बुलूबा, के तेसी मेरे नाँव के कारण केत्रा कष्ट भोगणाँ हंदा।”

¹⁷ तबे हनन्याह तेसी घरह् दा हुटा, अरह् ज़ाँऐयों तेने शाऊल गाशी आप्णा हाथ थऐयों बुलो, “हे भाऐ शाऊल, प्रभू यीशू ऐं, जिन्ऐं ताँव्खे ईथै आँदे बाटो पुडा ही दर्शण दिया थिया; तिन्ऐं ही मुँह ताँव कैई डेयाल़ी थुवा, के ताँव हजों आप्णी आखी खे रोष्णीं भेटी ज़ाँव, अरह् तू पबित्र-आत्त्मा लंई भरी ज़ाँऐ।”

¹⁸ तबे: तेख्णीं ही तेस्की आखी शे फुफ्ड़ै जिऐ छुटे, अरह् तेस्के तेख्णीं आगू देखिदों लागो: तबे से बीऊँजा अरह् तेने तेख्णीं ही नहाँण-नहाँव;

¹⁹ तबे तेने भोजन करा, अरह् तबे तेस्दी तेख्णीं हिमम्त्त आऐ; तबे से कंई देसो तोड़ी तिनू चैले आरी रूवा, जुण्दे दमिश्क नंगर दे रंह् थिऐ।

दमिश्क दा शाऊल का प्रचार

²⁰ तबे: शाऊँल तेख्णी यहूदी चौत्रे दा यीशू का प्रचार करदा लागा, के से ही पंण्मिश्वर का बैटा असो।

²¹ तबे बादे शुँण्णों वाल़े लोगो के तुरंबाँणच़ूटे, अरह् से ऐजो बुल्दे लागे; के “कियों ऐजा सेजा ही आदमी आथी ने, जुण्जा आदमी यरूशलेम दे ऐसी नाँव का जाप कर्णो वाल़े भगत्त लोगों का नाँष करह् थिया? कियों ऐ ईथै ईन्दें खे आऐ ने रंई थी; के तिनू लोग बाँनियों मुँख्या-याजकों कैई नीयों?”

²² परह् शाऊल हजो भे तागतबर हंदा गुवा, ईयों बातो का परमाँण देऐ-देऐयों के मसीया ऐजा ही असो; तेने दमिश्क दे रंहणों वाल़े, यहूदियों के बुलती बन्द करी दिती।

²³ जबे बैजाऐ देसो बिती गुऐ, तअ यहूदी लोगे ऐ मीलियों शाऊल मार्णो का कैड़ा करा।

²⁴ परह् तिनके पलाँन-कैड़े का शाऊल कैई पता लागा, अरह् तिन्ऐं तेसी शाऊल मार्णों खे देसो रात्ती नंगर की जाँगी बाऐरा पाक्का पऐरा थंऐ थुवा थिया, अरह् से तेसी माँरी देणों की ताक दे थिऐ।

²⁵ परह् शाऊल के चैले ऐ तेसी ऐक रात्त तेथै शा आगु नीयाँ, अरह् तिन्ऐं शाऊल ऐक शैक्ड़े दा बंईठाल़ा अरह् नंगर की जाँग्गी की खाँड-दराँड़ शा ऊदा बाऐरा छ़ूड़ा।

यरूशलेम दा शाऊल

²⁶ जबे शाऊल यरूशलेम दा पह्ऊँचा, तअ तेने चैले की मंण्डली दो शामिल हंणों की कोशिष करी; परह् से बादे तेस्दे डरो थिऐ, किन्देंखे के तिनू ऐजा बिश्वाष ने थी; के ऐ सोत्तिखे प्रभू यीशू का चैला बंणीं रूवा।

²⁷ परह् बरनबास ऐ शाऊल आप्णी गईलो खास-चैले कैई नींया, अरह् तेने खास-चैले खे बुलो, के ऐसी बाटो पुडा कैशा दाँई प्रभू का दर्शण भेंटा; अरह् केशी दाँई प्रभू ऐं ऐसी आरी बात-चींत्त करी; बरनबास ऐ तिन कैई ऐजों भे बुलो, के कैशा दाँई ऐने दमिश्क नंगर दा नीडर हंऐयों प्रभू यीशू के नाँव का प्रचार करा।

²⁸ ईन्दें पाछ़ी शाऊल यरूशलेम दा खास-चैले आरी आँदा-ज़ाँदा लागा, अरह् तेने नीडर हंऐयों प्रभू यीशू के नाँव का प्रचार करा।

²⁹ से बैधड़क हऐयों यूनानी भाषा के यहूदियों शी बात-चींत्त अरह् भंऐस करह् थिया, परह् सेजे लोग तेसी माँरी देणाँ चहाँव थिऐ।

³⁰ जबे बिश्वाषी भाऐ-बंईणों कैई ईयों बातो का पता चाला, तअ तिन्ऐं शाऊल कैसरिया नंगर दा नींया; अरह् जेथै शा तिन्ऐं तेसी तरसुस खे डेयाल़ी दिता।

³¹ ऐबे बादे यहूदा, गलील, अरह् सामरी ईलाके दे कलीसिया खे शाँण्त्ति भेटी, अरह् कलीसिया का निर्माण बड़दा रूवा; अरह् से प्रभू के डर-भय शे, अरह् पबित्र-आत्त्मा की शाँण्त्ति दे चाल्दे अरह् बढ़्दे रूऐ।

संत्त-पतरस ऐ एनियास चग्गाँ करा

³² तबे ऐशो हऐयों के संत्त-पतरस ढिको रिटी-फीरियों, तिनू पबित्र लोगो कैई भे पईचा; जुण्जे लुद्दा दे रंह् थिऐ।

³³ तेथै तेसी एनियास नाँव का ऐक अदर्गो का दुखिया भेंटा, जुण्जा आठ साल्ह शा ऊँबा माँजे गाशी पड़ा अंदा थिया।

³⁴ संत्त-पतरस ऐ तेस्खे बुलो, “हे एनियास! यीशू मसीया ऐ ताँव चाँग्गा करी लुवा; बीऊँज अरह् आप्णा बिछ़ाँव्णा आपु ठीक करह्,” तबे से तेख्णीं ऊबा बींऊँजियों खड़ा हुआ।

³⁵ तबे लुद्दा नंगर अरह् शारोन के बादे रंहणों वाल़े, ऐ तेसी देखियों प्रभू के ढबे फिरे।

संत्त पतरस ऐ दोरकास जीऊँदी करी

³⁶ याफा नंगर दा तबिथा मतलब् यूनानी भाषा दो दोरकास नाँव के ऐक बिश्वाषनी रंह् थी; से बैजाऐ भले-भले काँम-काज़ अरह् दाँण-पूनं करिया करह् थी।

³⁷ तिनू ही देसे से बीमार पड़ी, अरह् मंरी गऐ; अरह् लोगो ऐ तियों नुवाँऐयों टकैड़ी दी पसारी दिती।

³⁸ लुद्दा याफा नंगर के नंजीक असो, ईन्देंखे जबे चैले ऐ शुँणों; के संत्त-पतरस ईथै असो, तअ तिन्ऐं दो आदमी डेयाल़ियों संत्त-पतरस शी ऐजी अर्जी करी, के “तुऐं हेभी अमाँरे कागी आव।”

³⁹ तबे: संत्त-पतरस बींऊँजियों तेख्णीं तिनकी गईलो चाल पड़े, अरह् जबे से याफा दे पंह्ऊँचे, तअ लोगे ऐ तिनू टंकैड़ी गाशी नींऐ; तेथै बादी बिधवा रूदे-रूदे तियाँरे च़ौऊँ ढबै खह्ड़ी हंऐ रंई थी; अरह् से कुर्ते अरह् खोट्णों तिन कैई शे देखाँदी लागी; जुण्जे तिऐ दोरकास ऐ तिनकी गईलो रंह्दे बख्त्ते बंणाऐ थुऐ थिऐ।

⁴⁰ तबे संत्त-पतरस ऐ बादे लोग तेथै शे बाँईडे गाड़े, अरह् तेने घुडकुँणिऐं प्रार्थना करी; ईन्दें पाछ़ी तिन्ऐ तेसी मुँड़्दे के ढबै पाछ़ू फीरियों बुलो, “तबिथा, बीऊँज!” तबे तिऐं आप्णी आँख खुली, अरह् संत्त-पतरस देखियों से ऊँबी बंऐठी।

⁴¹ संत्त-पतरस ऐ तियाँरा हाथ थाँम्ब्ड़ियों तियों खह्ड़ी करी, अरह् पबित्र लोग अरह् बिधवा बऐदियों दोरकास तिनू कैई शी जीऊँदी देखाऐ।

⁴² सेजी बात बादे याफा नंगर दे फऐली गऐ, अरह् भहीतें लोगे ऐ प्रभू गाशी बिश्वाष करा।

⁴³ तबे: संत्त-पतरस भहुत्ते देसो तोड़ी याफा नंगर दा शमौन नाँव के ऐक चाँम्बड़े के बईपार कर्णो वाल़े कागी रूवा।