प्रेरितो कै काम 7 - Sirmouri

स्तिफनुस का भाष्ण

¹ तबे महाँ-याजक ऐं तेस कैई शो पुछ़ो, “कियो ऐजी बातो साची असो?”

² स्तिफनुस ऐ जबाब दिता, “हे गुरू जनों, अरह् भाऐ-बंन्दुओं! मेरी बातो शुणों; जबे अमाँरा बाबा अब्राहम हारान देश दा बस्णों शा आगे, मेसोपोटामिया दा रंह् थिया; तअ तेसी बख्त्ते बड़ियाई ज़ूगै पंण्मिश्वर ऐ तेस्खे दर्शण दिता।

³ अरह् तिन्ऐं तेस्खे बुलो, ‘तू आप्णों देश अरह् आप्णा कुड़बा छ़ुड़ी दे, अरह् तेसी देश खे ज़ा; जेसी देश हाँव ताँव कैई शा देखाऊँबा।’

⁴ तबे से कसदियों के देश छुड़ियों हारान देश दा बंसी गुवा; अरह् तेस्के बाबा के मंर्णो गाशी, पंण्मिश्वर ऐं तेसी तेथै शा गाड़ियों तेसी देशो दा लेयाऐया, जेथै तुऐं ऐत्त्लो तड़ी बँसे अँदे रँह।

⁵ ऐसी देशो दी पंण्मिश्वर ऐं तेस्खे बिरास्त्त के रूप दी लात्तों थंणों के भे जागा ने दित्ती; परह् पंण्मिश्वर ऐं तेसी आरी ऐजा बाय्दा करी थुवा थिया, के हाँव ऐजा देश ताँव पाछ़ी तेरे बंष के हंक-अधिकार दा करी देऊँबा; परह् तेसी बख्त्ते बाबा अब्राहम के किऐ भे अलाद ने थी।

⁶ पंण्मिश्वर ऐ ऐजो बुलो, ‘अब्राहम तेरा बंष अलाद पराऐ देश दे प्रदेशी जिऐ रंह्दे, अरह् सेजे लोग तिनू दास बाँण्ले, अरह् चार षौ साल तोड़ी से तिनू गाशी अतियाचार कर्ले।’

⁷ तबे पंण्मिश्वर ऐ हजो बुलो, ‘हाँव तेसी देश खे सजा देऊँबा, जेसी देश दे से गुलाम बंणियों रंह्ले; अरह् तबे ईन्दें पाछ़ी से तेसी देश शे बाँईडे आले, अरह् तबे ऐसी जागे दी से मेरी सेवा अरार्धना कर्ले।’

⁸ तबे पंण्मिश्वर ऐ बाबा अब्राहम कैई शा ख़तना कराणों का बाऐदा कराया, अरह् तबे सोत्तिखे बाबा अब्राहम के इसहाक पय्दा हुवा; अरह् आठ देसो बित्त्णों गाशी तेसी इसहाक का ख़तना हुवा, अरह् इसहाक के याकूब पय्दा हुवा; अरह् याकूब के कुल़ दे, बारोंह् सेजे पय्दा हुऐ जुण्जे के बारोह् कुल़ खे बाबा के रूप दे माँने गुऐ।

⁹ “तिनू कुल़ बाबा ऐ, डाह्-जल़्ण के कारण यूसुफ़ मिस्र देश दा बिकी दिता; परह् पंण्मिश्वर तेसी यूसुफ़ की गईलो थिया।

¹⁰ पंण्मिश्वर ऐं तेसी यूसुफ़ बादे दुख्ह-कल़ेष शा छ़ुड़ाया, अरह् तेसी मिस्र देश के राजा फिरोंन की नंजरी दा प्यारा अरह् बुद्धी माँन बाँणी दिता; अरह् तेसी ही यूसुफ़, राजा फिरोंन ऐं आप्णें बादे राजभवन का मुँख्या अ-धिकारी बंणाँऐ दिता।

¹¹ तेसी बख्त्ते बादे मिस्र अरह् कनान देश दा काल़ अरह् बैजाऐ बड़ा दुख्ह-संकट पड़ा; ईन्देखे अमाँरे पुराँणिऐ खे किऐ खाँणों खे नाँज भे ने भेंटो थियों।

¹² परह् जबे याकूब ऐ ऐजो शुँणों, के मिस्र देश दो नाँज भेंटो; तअ तिन्ऐं आगली ही बई अमाँरे पुराँणियाऐं तेथै डेयाल़ी दिते।

¹³ दुज़ाल़िऐं यात्रा कर्णो के मुँक्कै गाशी, यूसुफ़ ऐं आप्णें भाईयों कैई आप्णा पता दिता; अरह् तबे राजा फिरोंण कैई भे यूसुफ़ के कुल़ का पता लागा।

¹⁴ तबे यूसुफ़ ऐ आप्णाँ बाबा याकूब, अरह् आप्णें बादे कुड़बै के लोग बईदे; जुण्जे के बादे मिलाऐयों पहचह्त्तर आदमी थिऐ।

¹⁵ तबे याकूब मिस्र खे हुटा; अरह् तेथै याकूब अरह् अमाँरें बादे पुराँणियाऐं मंरी गुऐं।

¹⁶ तबे तिनू सोभी के मुँढ़्दें शकेम नंगर दे पाछ़ू आँणें गुऐ, अरह् तियों खात्ती-कबर दे थुऐ गुऐ, जियों खात्त-कबर बाबा अब्राहम ऐं शकेम दी हमोर के बैटे कैई शी चाँदी के सिक्कै दे मुँले खर्दी थंऐ थी।

¹⁷ “परह् जबे तेसी बाय्दे के पुरे हणों का बख्त नंजीक आया, जुण्जा के पंण्मिश्वर ऐ बाबा अब्राहम शा करा थिया; तअ अमाँरे लोगों के तादाऐत्त गिन्त्ती बैजाऐ जादा बंड़ी गंऐ थी।

¹⁸ तबे मिस्र देश दा ऐक ऐशा राजा बंणा जुण्जा यूसुफ़ के बारे दो किऐ ने जाँणों थिया।

¹⁹ तेने अमाँरी जात्ती आरी चलाकी करियों अमाँरे नाना-बाबा आरी ऐतै ज़ूगा बुरा बर्ताव करा, के तिनू आप्णें हंन्देणूँ के नहाँन्ड़िया भे फैरकाऐ देंणें पड़े; जू से जीऊँदें ने रंह्।

²⁰ तेसी ही बख्त्ते ऋषी-मूसा भे पय्दा हुआ: अरह् से पंण्मिश्वर की नंजरी दा बैजाऐ सुन्दर-बड़िया थिया; अरह् तेस्का च़ींन भीने तोड़ी आप्णे बाबा के घरह् दा पाल़्ण-पोष्ण करा गुवा।

²¹ ईन्दें पाछ़ी जबे ऋषी-मूसा ऊदा फेरकाऐ दिता, तअ तेसी फिरोन की बेटी ऐ ऊबा टीपियों गोद् लुवा; अरह् तेसी आप्णा बैटा बाणियों तिऐ तेसका बैजाऐ प्यार शा पाल़्ण-पोष्ण करा

²² तबे ऋषी-मूसा खे मिस्रियों की बादी ज्ञाँन-बिद्या शी शिक्षा देऐ गंऐ, अरह् से शक्त्ति शाली अगुवा-अगवाँल़; अरह् ऐक आछ़ा करंम-बीर बंणी गुवा।

²³ “जबे ऋषी-मूसा च़ाल़ीष साल का हऐ गुवा, तअ तेस्के मंन दो ऐजो आव; के आप्णें इस्राएली भाई-बंईणों आरी भेंट-मिल करू।

²⁴ जबे आप्णें ऐकी जात्ती भाई आरी तेने बुरा बर्ताव हंदे देखा, तअ ऋषी मूसा ऐं तेस्का पक्षपात करा; अरह् तेने ऐक मिस्री माँरी दिता, अरह् तेने आप्णें जात्ती भाई गाशी हुऐ अत्त्याचार का बद्ल़ा गाड़ा।

²⁵ ऋषी-मूसा ऐ आप्णें मंन दा ऐजा बीचार करा, के मेरे जात्ती के इस्राएली भाऐ ऐजो जाँणी पाह्ले; के पंण्मिश्वर ऐ मेरे जाँणें तिनखे छुट्कारा देंणा चहाऐ थुवा, परह् तिन्ऐ तेष्णों ने करी।

²⁶ दुज़े देसे जबे ऋषी मूसा ऐं आप्णें इस्राएली भाऐ आपु मुँझी झह्गड़िदें देखे, तअ तेने ऐजो बुलियों तिनू सहम्झाँणों के कोशिष करी; के ‘हे दोस्तो! तुऐं आपु मुँझी भाऐ ही भाऐ असो; तबे तुऐं आपु मुँझी ओका ओकी को बुरो कर्णो कैई चहाँव?’

²⁷ तबे जने आदमी ऐं आप्णें पड़ोसी गाशी अ-नियाँऐं करी लई थी, तेने ऋषी मूसा दुरका फैरकाऐया अरह् तेस्खे ऐजो बुलो; ‘ताँव कुँणें आमों गाष्ला हाकम अरह् अमाँरा नींयाँऊच़ू बाँणी थुवा?’

²⁸ ‘कियो रे, तुऐं जेष्णाँ बियाल़ी ऐक मिस्री माँरी दिता, तू मुँह भे तेष्णा ही माँरी देंणाँ चाँऐं?’

²⁹ ऐजी बात शुँणियों ही ऋषी-मूसा तेथै शा भागी लागा, अरह् तेथै शा नींक्ल़ियों से मिद्यान देश दा प्रदेशी के रूप दा रंह्दा लागा; अरह् तेथै ऋषी मूसा के दो बैटे पंय्दा हुऐ।

³⁰ “अरह् जबे ऋषी मूसा खे तेथै रंह्ऐयों च़ाल़ीष साल्ह पुरे हुऐ, तअ सीनै धारो गाशी शुन-शाँन जागा दा ऋषी मूसा के ऐक जल़्दी झाड़ी के घंयाँने दा स्वर्गदूत्त देखाई पड़ा।

³¹ ऐजो देखियों ऋषी-मूसा के तूरंबाँणच़ूटे, अरह् जबे से सुवाँ करियों देख्दा तियों झाड़ी के घियाँने कैई नंजीक ज़ाँदा लागा; तअ तेस्के प्रभू की ऐजी बाँणीं शुँणाँई पड़ी,

³² ‘हाँव तुवाँरे पुराँणियाऐं, मतल्व अब्राहम, इसहाक, अरह् याकूब का पंण्मिश्वर असो।’ ईयों बाँणीं शुँणियों ऋषी मूसा दा काँम्णाँ छ़ूटा, ऐतै ज़ूगा के तबे तेस्के तेथै देख्णों के भे ढैठ-हिमम्त्त ने पड़ी।

³³ तबे प्रभू पंण्मिश्वर ऐ तेस्खे ऐजो बुलो: “आप्णें लात्तो शे जूत्ते ऊँडे गाड़, किन्देंखे के जेसी जागे दा तू खह्ड़ा असो; सेजी जागा भूँम्मीं पबित्र असो।

³⁴ ‘मुँऐं सोत्तिखे मिस्र देश दे रंहणों वाल़े आप्णें लोगों गाशी, हंणों वाल़े अत्त्याचार सुऐं करियों देखी थुऐ, अरह् तिनकी लेरोह् भे मुँऐं शुँणी थंई; ईन्दे खे तिनू छ़ुड़्णों खे तैयार हंऐ ज़ा! किन्देंखे के ऐबे हाँव ताँव मिस्र देश खे डेयाल़ूबा।’

³⁵ “जेसी ऋषी मूसा तिनू इस्राएली लोगे ऐ ऐजो बुलियों फिट्कारी थिया, के ‘ताँव आँमों गाष्ला हाकम अरह् नीयाँईच़ू कुँणें बाणी थुवा?’ तेसी ही ऋषी खे पंण्मिश्वर ऐ जल़्दी झाड़ी मुँझी दर्शण देंणों वाल़े स्वर्गदूत्त के कारण हाकम अरह् तिनू सोभी खे मुँक्त्ति अरह् छुड़ाणों वाल़े के रूप दा तिन कैई डेडयाल़ी दिता।

³⁶ तिन्हीं ही ऋषी मूसा ऐं इस्राएली लोग मिस्र देश शे नींकाल़ियों, लाल समुँन्द्रों के काटल़ो गाशी; अरह् शुनं-शाँन जागा दे च़ाल़िष साल्ह तोड़ी अ-नोंख्हे काँम-काज़ अरह् च़ीह्न-चंम्त्तकार देखाऐयों तिनू तेथै शे छ़ुड़ाऐयों ऊँडे आँणें।

³⁷ “से सेजा ही ऋषी-मूसा थिया, जेने इस्राएलियों खे बुलो थियों, ‘पंण्मिश्वर तुवाँरें ही भाई मुँझ्षा तुओं खे ऐक ऐशा ऋषी खह्ड़ा करला।’

³⁸ से सेजा ही ऋषी मूसा थिया, जुण्जा शुंन-शाँन जागा की कलीसिया के बीच दी तेसी स्वर्गदूत्त की गंईलो सीनै धारोह् गाशी बात-चींत करह् थिया; से अमाँरे पुराँणियों आरी भी थिया, तेसी ही ऋषी मूसा खे जीऊँदें बचन भे भेंटे, के से सेजे पंण्मिश्वर के बचन आँमों तोड़ी पंह्ऊँचाल़ो।

³⁹ परह् अमाँरे पुराँणियाँ अज्ञाँ पाल़्ण कर्णो के हिछ़ुक ने थी, अरह् से आप्णें मंन ही मंन दे मिस्र देश की ढबै फिर्णों चहाँव थिऐ।

⁴⁰ अरह् तिन्ऐं हारून खे बुलो, के ‘आँमों खे ऐक ऐशा देव्ता बाँण, जुण्जा आँमों शा आगे-आगे चालो; किन्देंखे के आँमें ऐजो जाँण्दें ने, के ऋषी मूसा केथै गुवा, जुण्जा आँमों मिस्र देश शे नींकाल़्दा आया थिया?’

⁴¹ तोदी तिन्ऐं बाछ़ड़े-कल़्टे की मुँर्त्ती बंणाँऐं, अरह् तियों मुँर्त्ती के सहाँम्णें बल़ी चड़ाऐ, अरह् आप्णें हाथों की कारगरी देखियों तियों मुँर्त्ती के सहाँम्णें खुशी-आँनन्द मंनाँऐं।

⁴² पंण्मिश्वर ऐ तिनू शो आप्णों मुँख्ह मुँड़ियों तिनू छुड़ी दिते, अरह् तिनू इस्राएली लोग असमाँनों के नौं-ग्रोह्; नंक्षत्रों के अरार्धना कर्णो खे छुड़ी दित्ते; जेष्णों के ऋषियों के कताबे दा लेख लिखी थुवा: के ओ, इस्राएलियों! कियो तुँऐं लोगे ऐ शुनं-शाँन जागा दो च़ाल़िष साल्ह् तोड़ी मुँखे पशु-बल़ी अरह् अंन्न-बल़ी के भेंट चड़ाऐ थी? के चड़ाई ने!

⁴³ तुँऐं लोगे ऐ मोलेक के ताँम्बू दे बेदी की थापना करी, अरह् आप्णें देव्ता रेफ़ान के तारे, मंतल्व तिनू मुँर्तीयों खे जिनू तुऐ अरार्धना कर्णो खे बंणाँई थी; अरह् तुऐ तिनू आप्णें काँनों गाशी थागियों फिरो थिऐ, ईन्देंखे हाँव तुओं लोग बेबीलोन शे पाडे बसाऊँबा।

⁴⁴ “खास करियो, शुन-शाँन जागा दा अमाँरे पुराँणिऐं के कैई गुवाह्-शाज़्त का ताँम्बू थिया, पंण्मिश्वर ऐं ऋषी मूसा खे ईन्दें के बारे दी ऐजी अज्ञाँ दित्ती; के जुण्जो आऐयों तुऐं देखो, तिन्दें के मुताबिक तेष्णों ही बाँण।

⁴⁵ सेजा ताँम्बू अमाँरें पुराँणियाँ खे ज़ुगौ शा ऊबा भेंटी रूवा थिया, अरह् तिन्ऐं तेसी ताँम्बू यहोशू की देख्ह-रेख्ह दा ऐसी देशो दा आँणा; सेजो देश गऐर यहूदियों के हाथों दो थियों, परह् पंण्मिश्वर ऐं तिनू अमाँरे पुराँणिऐं के सहाम्णें शे निंकाल़ी दित्ते; अरह् राजा दाऊद के बख्त्तो तोड़ी सेजा ताँम्बू तेष्णाँ ही रूवा।

⁴⁶ राजा दाऊद खे पंण्मिश्वर के कृपा के नंजर भेंटी रंऐ थी, अरह् पंण्मिश्वर ऐ याकूब के बंष-गड़ी खे ऐक रंहणों को घरह् भेंट्णों का बर-दाँण माँगी थुवा थिया।

⁴⁷ परह् राजा सुलैमान ऐ पंण्मिश्वर का घरह्, मतल्व देऊँठी बंणाँऐ थी।

⁴⁸ तबे भे स्वर्गो के पंण्मिश्वर आदमी के हाथै बंणाँऐ अँदे घरह् दे ने रंह्दे, जेष्णों के ऋषी लोगे ऐ बुलो थियो।

⁴⁹ अस्माँन स्वर्ग मेरो सिंगास्ण, अरह् धर्त्ती मेरी लातो थाँईला पाट्ड़ा-पिड़ा असो; प्रभू बुलो, तुऐं मुँखे केष्णों घरह् अरह् देऊँठी बाण्ल़े? अरह् मेरे बिषाँव की जागा केथै हली?

⁵⁰ कियो सब-कछ़ मेरे हाथों के बंणाँऐ अंदी कारी-गरी आथीं नें?

⁵¹ “ओ, मंन के हठावणें, अरह् काँनों शे जाऐरे लोगों! तुऐं सदा ही पबित्र-आत्त्मा का बिरोध करह्, जेष्णों के तुवाँरे पुराँणिऐं भे करह् थिऐ।

⁵² कियो तुवाँरे पुराँणिऐं ऐ ऋषियों गाशी अंत्त्याचार करी ने? तिन्ऐं तिनू ऋषी लोग माँरी दित्ते, जिन्ऐं आगे ही तेसी धर्मी जंण के आँवणीं की घोष्णाँ करी थी; तुओं लोगों खे स्वर्गदूत्त के जाँणें, रित्ती-रूवाज निय्म भेंटी ने? परह् तुऐं लोगें ऐं तिन्दें का पाल़्ण ने करी, अरह् ऐबे तेसी धर्मी जंण के थंहम्बड़ाणों वाल़े अरह् हत्त्यारे बंणी गुऐ।

⁵³ तुँऐं सेजे ही लोग असो, जिनखे स्वर्गोदूत्तों के जाँणें असरदार रित्ती-रूवाज अरह् निय्म भेटे थिऐ; तबे भे तुऐं तिन्दें का पाल़्ण ने करी।”

स्तिफनुस गाशी पंत्त्थराच़

⁵⁴ स्तिफ़नुस की ऐजी बातो शुँणियों, सेजे लोग प्रच़ंड हुऐ; अरह् तेस्खे घीपियों-झ़ुकियों आप्णें दाँदों की च़ूरी च़ाक्दें लागे।

⁵⁵ तबे: स्तिफ़नुस ऐ पबित्र-आत्त्मा शा भरियों, स्वर्गों के ढबै नंजर-झ़ैठ पाऐ, अरह् पंण्मिश्वर की बड़ियाऐ अरह् पंण्मिश्वर के सुऐ ढबै खह्ड़े प्रभू यीशू भे देखे।

⁵⁶ तबे स्तिफ़नुस ऐं तिनखे बुलो, “देखो, मुँऐ स्वर्ग खुलो अंदो, अरह् आदमी का बैटा पंण्मिश्वर के सोऐं ढबै खह्ल़ी अँदा देखी लुवा।”

⁵⁷ ईन्दें गाशी तिनू लोगे ऐं जुराल़ी लेरोह् माँरियों, आप्णें काँनों दी गुट्ठी पाऐयों बंद करे; अरह् से बादे झ़ोणें स्तिफ़नुस गाशी च़ूटियों पड़े।

⁵⁸ अरह् तेसी स्तिफ़नुस तिन्ऐं आप्णें नंगर शा बाँईडा गाड़ियों तेस गाशी पंथराच़ दित्ती; अरह् तिनू सोभिऐं तेस्की हंत्त्या करी दित्ती, अरह् तेसी बख्त्ते तिनू लोगे ऐं आप्णें बाईले खोट्णों खुलियों शाऊल नाँव के जवाँन के लात्तो कैई थंऐयों छ़ूड़ी दिते।

⁵⁹ जबे तिनू लोगें ऐ स्तिफ़नुस दे पात्त्थर लाऐ लुऐ थिऐ, तअ तेने ऐजी प्रार्थना करी, “हे प्रभू यीशू! मेरी आत्त्मा धारंण करह्!”

⁶⁰ तबे: से घुडकुँणिऐं बंईठा, अरह् तेने जुराल़ी लेरंह् मारियों बुलो, “हे प्रभू! ऐजा पाप ईन्दा ने लाऐ!” अरह् ऐजो बुलियों तेने प्राण छुड़ी दित्ते; अरह् सेजा शाऊल भे तेस्के माँर्णो दा संह्ऐम्त्त थिया।