प्रेरितो कै काम 28 - Sirmouri

माल्टा टापू दा संत्त-पौलुस

¹ जबे आँमें बंची गुऐ, तबे आँमों कैई ऐजा पता लागा के ऐसी टापू को नाँव माल्टा असो।

² तेथै के रंहणों वाल़े लोगे ऐं आँमों आरी बैजाऐ आछ़ा बर्ताव करा; जबे अस्माँनों शो पाँणीं लागी रूओं थियों, अरह् तेथै बैजाऐ शेल़ौ-जाड़ो पड़ी रूओं थियों; तबे तेथै के लोगे ऐं आँमों खे आग बाल़ियों दित्ती, अरह् आमों सोभी लोग सेकाऐ दिते।

³ जबे संत्त-पौलुस ऐ लाकड़ी का ऐक भिंठा कट्ठा सलाऐयों आगी गाशी थंऐ लुवा थिया, तअ ऐक शंगाँव बैजाऐ ताप-सैक के कारण तिनू लाकड़ी के भिंटे शा नीक्ल़ा; अरह् से संत्त-पौलुस के हाथों दा मेंठिया।

⁴ तबे तेथै तेसी टापू गाशी रंहणों वाल़े, लोग आपु मुँझी देखियों बुल्दे लागे, के सोत्तिखे “ऐजा कुँऐ जरूर पापी हंत्त्यारा आदमी असो; किन्देंखे के ऐ संमुँन्द्रो शा तअ बंची गुवा, परह् नियाँव कर्णों वाल़ी देबी ऐ ऐसी आदमी जीऊँदा ने रंहणों दिती।”

⁵ तबे संत्त-पौलुस ऐ तेसी षंगाँव आगी मुँझी जाड़ी दिता, परह् तेस्के किऐ ने गंई।

⁶ तिनू लोगे ऐं जाँणों के ऐस्का हाथ ऊँशाऐ ज़ाँदा, के चंकर-गसीं आऐयों ऐ धंनियों पुंडा पड़्दा; तअ से तिनू देख्हदे ही रूऐ, परह् जबे संत्त-पौलुस के किऐ ने गंई; तअ तिन्ऐं आप्णा सेजा बिचार बद्ल़ी दिता, के “ऐ कुँऐं देव्ता हंणाँ।”

⁷ तियों जागा के नंजीक ही तेसी टापू कैई तेथै के मुँख्या पुब्लियुस के ऐक खैच़ थियों; तबे तेने मुँख्या ऐं अमाँरा स्वागत्त् करा, अरह् च़ींन देसो तोड़ी अमाँरा प्यार-भाव शा आदर-संत्त्कार करा।

⁸ तेसी मुँख्या पुब्लियुस का बाबा दा ताप अरह् तेस्के पैचिस लागी रंऐ थी, तबे संत्त-पौलुस ऐ तेस्खे घरे ज़ाऐयों, तेस्खे प्रार्थना करी, अरह् तेसी गाशी आप्णाँ हाथ थुवा, तअ से तेख्णीं चाँगा हुवा।

⁹ जबे ऐष्णों हुओं, तअ तेसी टापू के ओके बीमार लोग भे तेथै आऐं, अरह् से बादे लोग चाँगे हुऐ।

¹⁰ ईन्देंखे तेथै के लोगे ऐं आँमों खे गीफ्ट देऐयों अमाँरा बैजाऐ आदर-सत्त्कार करा, अरह् जबे आँमें तेथै शे ज़ाँदे लागे, तअ तिनू लोगें ऐ आँमों खे ऐशी चींजो जुण्जी बाटों खे जरूरी हों सेजीं सोभी खे दिती।

संत्त-पौलुस माल्टा टापू शा रोम की ढबे हुटा

¹¹ आँमें च़ीन भीनें बित्त्णों गाशी सिकन्दरिया के ऐक पाँणीं के जहाजो दे बंईठे, जैथू जहाँजे तेसी टापू गाशी शेल़ै-जाड़ै के देसो तैथी काटी थुऐं थिऐ; अरह् तेसी जहाजों के निंशाणीं थी; “मिथुन-दियुसकूरी”।

¹² आँमें सुरकूसा टापू गाशी, लंगर पाऐयों च़ीन देसो तोड़ी तैथी रूऐ।

¹³ आँमें तेथै शे लंगर खुलियों रेगियुस नंगर तोड़ी आऐ, अरह् ऐक देस बित्त्णों गाशी, हजो दक्षिणीं बागुर फीरी; तबे दुज़े देसे आँमें पुतियुली टापू गाशी पंह्ईचें।

¹⁴ तेथै अमाँरी बिश्वाषी भाऐ-बंईणों आरी भेंट हंऐ, अरह् आँमें तेथै तिनके ढंह्लयाँणों लई, सात्त देसो तोड़ी, तिनकी गंईलो रूऐ; अरह् ऐसी हाल्त्त आरी आँमें आखिरकार रोम नंगर दे पंह्ऊँचीं ही गुऐ।

¹⁵ रोम नंगर के बिश्वाषी भाऐ-बंईणों कैई जैई अमाँरे आँणों का पता लागा, तैई से अप्पियुस चौंक तोड़ी अरह् “तीन सराई” नाँव की जागा तोड़ी अमाँरा सु-स्वागत्त् कर्दे आऐ; तिनू देखियों; संत्त-पौलुस ऐं पंण्मिश्वर का धन्यबाद करा, अरह् तेसी होंस्ला भेटा।

¹⁶ जबे आँमें रोम दे पंह्ईचें, तअ संत्त-पौलुस खे ऐजी अज्ञाँ भेटी, के से पंऐरे देणों वाल़े सपाई की गईलो, जेथै चहाँव तेथै रंऐ सको।

रोम दा संत्त-पौलुस

¹⁷ च़ींन देसो बित्त्णों गाशी, संत्त-पौलुस ऐ यहूदियों के मुख्या-बुड़े-बुजूर्गो लोग बईदे, अरह् जबे से बादे झुणें कठै हऐ गुऐ, तअ तबे संत्त-पौलुस ऐ तिनखे बुलो, “हे भाईयों! मुँऐं अमाँरी जात्ती के बिरूध किऐ भे अपराध ने करी थंई; अरह् ना आप्णें पुराँणियाऐं के रित्ती-रूवाज के बिरूध किऐ अपराध करी; तबे भे मुँह यरूशलेम दा कंय्द करा, अरह् रोमियों के हवाले करी दिता।

¹⁸ सेजे लोग ‘मुँह जाँच-पर्खियों छुड़ी देंणा चहाँव थिऐ, किन्देंखे के मुँदा मंऊँत्ती की सजा देंणों ज़ूगा किऐ भे दोष-ईल़्जाँम ने थी।’

¹⁹ परह् जबे तेथै के यहूदी लोग तिन्दें का बिरोध कर्दे लागे, तअ मुँह भे तबे महाँ राजा कैसर की आड़ लंणीं पड़ी; परह् ऐशो ने आथी के मेरे आप्णें ही लोगो गाशी किऐ दोष-ईल़्जाँम लाणाँ थिया।

²⁰ ईन्देंखे मुँऐ तुँओं बय्दी थुऐ, के तुँओं कैई शा भेंटियों बात चींत्त करू, किन्देंखे के इस्राएल के भुर्षें के कारण ही मुँह ईयों शाँगल़ी दा बाँनी थुवा।”

²¹ तिन्ऐं तेस्खे बुलो, “ना तअ आँमों तेरे बारे दी किऐ यहूदियों कैई शी पत्री भेंटी रंई, अरह् ना बिश्वाषी भाईयों मुझ्शो कुँणिऐं आऐयों तेरे बारे दो किऐ भलो के बुरो ने बुली थंई।

²² परह् आँमें ताँव कैई शे तेरे बिचार शुँण्णें चहाँव? किन्देंखे के आँमें जाणों ऐ के तेसी मंत्त-शीख्ह के बिरूध दी लोग ढीकों बातो कर्दे लागी रूऐ।”

²³ तबे: यहूदियों ऐ संत्त-पौलुस की गईलो ऐक देस बंईठणों खे पाक्को करो, अरह् बैजाऐ लोग कंट्ठै हुऐ; अरह् तबे संत्त-पौलुस झ़ीषों शा पुंडा फ़ीरे तोड़ी तिनू आरी बात-चींत्त करदा रूवा; अरह् पंण्मिश्वर के राज्य के बारे दी आप्णीं गुवाऐ-शाज़्त्त देंदे रूवा; अरह् ऋषी मूसा खे भेटे गुऐ अज्ञाँ निय्म, अरह् ऋषियों के पबित्र-ग्रन्थों के मुँताबिक तिन कैई प्रभू यीशू के बारे दे संहम्झाँणों की कोशिष करदा रूवा।

²⁴ तबे तिनू लोगो मुँझ्शे कंई लोगे ऐ संत्त-पौलुस की बातो माँनी पाई, अरह् तबे सेजे लोग बिश्वाषी बंणीं गुऐ।

²⁵ जबे सेजे लोग जुण्जें आपु मुँझी संहमत्त ने हंई, सेजे लोग तेथै शे आगू ज़ाँदें लागे थिऐ; तअ संत्त-पौलुस ऐ तिनखे बुलो, “पबित्र-आत्त्मा ऐं ऋषी यशायाह के मुँख्ह शो तुओं लोगो के बुड़ाईकों खे ठीक ही बुलो थियो।

²⁶ ज़ाऐयों ईनू लोगों खे बुलो, के तुऐं शुण्दे तअ रंह्ले; परह् संहम्झों दे ने आथी! अरह् देंख्दें तअ रंह्ले; परह् तुवाँरे संहम्झ दो ने आँव!

²⁷ किन्देंखे के ऐजे लोग मंन के कुँठूर असो; ऐ तअ काँनों शे जाऐरे हंऐ रूऐ! अरह् ईन्ऐं आप्णी आखी बंद करी थई; जू कंद्दी ऐशों ने हऐयों, के ऐ किऐ आँखी लई देखो! अरह् काँनों लई शुँणों! अरह् मंन शो संहम्झों अरह् बुराई शे पाछ़ू फीरों, अरह् तबे हाँव ईनू चाँग्गै करू।

²⁸ “ईन्देंखे तुँऐ लोग जाँणीं पाव, के पंण्मिश्वर की ऐजी छ़ुट्कारे के खुषख्बरी गऐर-यहूदियों खे डेयाल़ी दिती; अरह् से जरूर शुँण्ले।”

²⁹ (जबे संत्त-पौलुस ऐ ऐजो बुली पाव, तअ यहूदी लोग आपु मुँझी बैजाऐ बाद-बिबाद कर्दे लागे; अरह् तबे से तेथै शे आगू हुटे।)

³⁰ संत्त-पौलुस पुरे दो साल्ह तोड़ी किराऐं के घरह् दे तेथै रूऐ; अरह् से तिनू सोभी का आदर-संत्त्कार करह् थिऐ; जुण्जे लोग तिन कैई भेंट कर्दे आँव थिऐ।

³¹ संत्त-पौलुस नींडर हंऐयों, अरह् दींन-गरीब रूप शे पंण्मिश्वर के राज्य की खुषख्बरी शुँणाँव थिऐ; अरह् प्रभू यीशू मसीया के बारे दी शिक्क्षा देंदे रंह थिऐ।