प्रेरितो कै काम 27 - Sirmouri

संत्त-पौलुस के रोम यात्रा: क्रेते तोड़ी

¹ जबे ऐजो पाक्को हऐ गुओ, के आँमें जहाजो दे इटली खे ज़ाँऊबे, तअ तिन्ऐं संत्त-पौलुस अरह् किऐ ओके कय्दी भे युलियुस नाँव का ओगुस्तुस पल़ट्ण के सुबेदारे के हाथो दे देऐ दिता।

² आँमें बादे अद्रमुत्तियुस नंगर के ऐक पाँणीं के जहाज दे शुवार हुऐ, जुण्जो एशिया प्रदेश के संमुँन्द्रो के कनाँरे के नंगरों बाटी ज़ाँणों खे तैयार थियो; अरह् जबे अमाँरी यात्रा शुरू हऐ, तअ अरिस्तर्खुस नाँव का थिस्सलुनीके का ऐक मकिदूनी आदमी भे अमाँरी गंईलो साथी थिया।

³ दुज़े देसे आँमें सैदा दो लंगर पाव, अरह् यूलियुस ऐ संत्त-पौलुस गाशी कृपा करियों तेसी साथियों आरी ईथै आँणों दिता, के तेस्का आदर-सत्तकार करा ज़ाँव।

⁴ तेथै शो जबे आँमें जहाज खुलो, तअ बागूर ऊल़्टी फिर्णो के कारण आँमें साइप्रस टापू की आड़ दे आगे बड़दे लागे;

⁵ ईन्दें पाछ़ी आँमें किलिकिया अरह् पंफूलिया के नंजीक संमुन्द्रो बाटी लूसिया के मुरा नाँव के टापू गाशी पंह्ईचें।

⁶ तेथै शा सुबेदार खे सिकन्दरिया को ऐक पाँणीं को जहाज भेंटो, जुण्जो इटली खे ज़ाणों वाल़ो थियों; अरह् तिन्ऐ आँमों तिन्दें बंईठाल़ी दित्ते।

⁷ जबे आँमें भहिते देसो तोड़ी सुह्ले-सुह्ले चालियों बड़े मुष्किल शे कनिदुस के सहाँम्णें पंह्ईचे, तअ बागुरिऐ आँमों आगे ज़ाँणों शे रूकी लुऐ थिऐ; ईन्देंखे आँमें सलमोने बाटी क्रेते टापू की आड़ शे टीराँव्टी-टिराँव्टी दे चाल्दे-चालदे रूऐ;

⁸ मुँष्किल शे “सुन्दर टापू” नाँव के जागे दे पंह्ईचे, जुण्जो लसैया नंगर के नंजीक ही थियों।

⁹ जबे बैजाऐ बख्त्त बीत्ती गुवा थिया, अरह् संमुँन्द्री यात्रा ऐबे ख़तरनाक हंऐ रंऐ थी; किन्देंखे के सर्दी-शेल़ै बर्त्तो के देसो बिती गुऐ थिऐ, ईन्देंखे संत्त-पौलुस ऐ लोगो खे ऐजी सह्ला दिती,

¹⁰ “हे माँने-गींणें लोगों! मेरे ऐशो जाँणियों के ऐजी यात्रा कंठणाँई वाल़ी हंदी; आँमों सिर्फ माँल़ अरह् पाँणीं की जहाँज का नुक्साँन ही ने संहणाँ पड़्दा; परह् आप्णें जींयाँन-प्राँण का भे ख़तरा मोंल लंहणाँ पड़्दा।”

¹¹ परह् सुबेदार ऐ संत्त-पौलुस की बातो काँन-जाईरी करी; अरह् कपताँन अरह् पाँणी के जहाजों के माँलिक की बातो गाशी जादा काँन लाया।

¹² सेजा टापू शेल़ै-जाड़ै के हेऊँद काट्णों खे आछा ने थी, ईन्देंखे भहित्ते लोग तेथै शे ज़ाँणों के पंक्ष दे थिऐ; से कैई-कैई फीनिक्स नंगर तोड़ी ज़ाँणों चहाँव थिऐ; अरह् तेथै शेल़ै-जाड़ै का हेऊँद बिताँणों का भोर्षा थिया; किन्देंखे के फीनिक्स क्रेते टापू को ऐक खुलो काट्ल़ थियों। जुण्जो च़ौऊँ ढ़बे खुलो थियों; “पुर्ब-पंशिच्म; उत्तर-दक्षिण” चारे धोहरी खुली हों थी।

संमुन्द्रो दा ऊँफान

¹³ जबे कुछ-कुछ दक्षिणीं बागुर बंह्दी लागी, तअ तिन्ऐं जाँणी पाव के अमाँरी यात्रा पुरी हंऐ गंऐ; तबे तिन्ऐं पाँणी के जहाजो को लंगर ऊबो थागों, अरह् से टीराँव्टी की आड़ दे क्रेते नंगर के नंजीक ज़ाँदे लागे।

¹⁴ परह् तेख्णीं बिस्तोड़ी धर्त्ती की ढबै शी ऐक बड़ी आँधी चाली; जिन्देंखे “यूरकुलीन” उत्तरपूर्वी तूफ़ानी बागुर बुली।

¹⁵ तबे: पाँणीं को जहाँज तेसी तूफ़ान की चपेट दो आओं, अरह् से तियों बागुरी की माँर संऐ ने सकी; ईन्देंखे आँमें मंजबूर हंऐयों पाँणीं की फ़ालो आरी बंह्दें गुऐ।

¹⁶ कौदा नाँव के टापू की आड़ दे पंह्ऊँचिंयों, आँमें कैशे ही दाँई पाँणीं की जहाँजों के डोंगी-फ़ाऊँड़ी गाशी कंबजा करी पाया।

¹⁷ तबे कपताँन अरह् मल्लाहों ऐ सेजो पाँणीं को जहाँज त्तल़ौ शो ऊबो ऊँप्हर तोड़ी रंषें लंई बाँनी दितो; ईन्देंखे के जहाज कोद्दी टापू के बाल़ू मुँझी अड़की ने ज़ाँव, ईन्देंखे तिन्ऐ लंगर दाँणिंक ऊदोड़ो कोरो, अरह् जहाज पाँणीं गाशी बागुरी ऐ बंहणों दितो।

¹⁸ दुज़े देसे तूफ़ान बैजाऐ त्तेज हुवा, अरह् फ़ालो अरह् भयंकर आँधी के हंलारे के कारण तिन्ऐं पाँणीं के जहाजों को समाँन ऊदो फ़ेरकाँणों शुरू करी दितो,

¹⁹ अरह् च़ीज़े देसे तिन्ऐं आप्णे हाथै जहाजो को साज-समाँन भे फेरकाऐ दितो;

²⁰ जबे कंई देसो तोड़ी ना तअ सुरूज ना तारे दे:खाई पड़ी; अरह् तूफानी भैटे जोराल़ी चाली, तअ अमाँरे बंचणों का भोरोषा भे च़ूटी गुवा।

²¹ जब बैजाऐ बख्तो तोड़ी भूखी रंहणों पाछ़ी, संत्त-पौलुस ऐ आँमों मुँज़ी खह्ड़े हंऐयों बुलो; “हे साथियों! ठीक तअ ऐजो थियों के तुँऐं मेरी बात माँनी पाँदे; अरह् क्रेते टापू गाच्छ़ै आँमें चहाँल्दे ही नें; तबे आँमों ऐजा बादा नुक्साँन संहणाँ ही ने पड़दा थिया।

²² परह् ऐबे हाव तुँओं शी ऐजी अरज करू के तुँऐ सबैर मारो, किन्देंखे के आँमों जहाजो का नुक्साँन तअ संहणाँ पड़दा; परह् तुवाँरे कोसी के भे जीयाँन-प्राँण का किऐ भे नुक्साँन ने हंदी, दीड़-हिमम्त्त थुऐ।

²³ किन्देंखे के मेरे पंण्मिश्वर ऐ अरह् जिन का हाँव सेवक असो, तिनके स्वर्गदूत्त ऐं ऐत्त्लो रात्ती मुँह कैई आऐयों मुँखे बुलो;

²⁴ ‘हे पौलुस, डरे ने! ताँव्खे महाँ राजा कैसर के सहाँम्णें खड़ो रंहणों जरूरी असो; देख, पंण्मिश्वर ऐ बादे झोणें जै-तोड़े तेरी गईलो यात्रा दे असो, तिनू ताँव्खे देऐ थुऐं।’

²⁵ ईन्देंखे, हे साथियों! दीड़-हिम्मत बाँनों; मुँह पंण्मिश्वर गाशी बिश्वाष असो, के जेष्णों मुँह कैई बुली थो, तेष्णों ही हंदो।

²⁶ ऐबें आँमें कोसी टापू गाशी, जरूर पंह्ईचीं ज़ाँदे।”

जहाज च़ूटो

²⁷ च़ौऊँदो देसो रात्ती बुरा-बर आँमें अन्द्रिया सागर दे भट्क्दे लागी रूऐ थिऐ, अरह् सेजी आँमों खे भट्कोंदे च़ौऊँदुई रात्त थी; तअ तबे भे आँमें बिचों संमुदों दे थिऐ; अरह् किऐ आधी रात्त हंणों का मंह्ल्लाह के आप्णाँ अनुमाँन लागा थिया; के ऐबे आँमें कोसी देश के नंजीक पंह्ईच्दें लागे।

²⁸ जबे तिनू मंह्ल्लाह ऐं थाँह लंऐ पाऐ, तअ तबे किऐ संईत्तिष मीटर गंह्ईरो पाँणीं थियों; अरह् जबे आँमें हजो आगुड़े हुटे, तअ हजो मंह्ल्लाह ऐ थाह लंऐ, तअ तबे भे किऐ छब्बीष मीटर गंह्ईरों पाँणी थियों।

²⁹ जबे कपताँन अरह् मंह्ल्लाह के ऐजा डर थिया, के कंद्दी ऐशो ने हंईयों, के आँमें ऐकोऊँरी-कंऐड़ी शे टकराँव; तअ तबे तिन्ऐं पाँणीं के जहाँजो के पाछ़्ले चार लंगर ऊँदे छ़ूड़े, अरह् आँमें बादे झुणें बैजाऐ हिछ़्या शे रात्त बियाँणों की ठंह्ल़णाँई ताक दे थिऐ।

³⁰ परह् मंह्ल्लाह पाँणीं के जहाजो गेच्छ़ौ भागणों चहाँव थिऐ, ईन्देंखे तिन्ऐ पाँणीं के जहाँजों के आगू दाँई के लंगर ऊँदें छ़ूड़णों का भाँना करियों डोंगी-नाव संमुन्द्रो दी ऊदी छ़ूड़ी दित्ती।

³¹ तबे संत्त-पौलुस ऐ सूबेदार अरह् फऊँजी के जवाँनों खे बुलो, “जे ऐजे लोग जहाजो दे ने रूऐ, तअ तुँऐं लोग भे बंची ने सक्दे।”

³² तबे फऊँजिऐं रंषें काटियों डोगी मतल्व नहाँन्ड़ी नाव ऊदी पाड़ी।

³³ जबे धुरोह् ऊँक्षों दी लागी, तअ संत्त-पौलुस ऐं सोभी लोगो खे आप्णीं गंईलो भोजन कर्णो का होंस्ला दिता; संत्त-पौलुस ऐ बुलो, तुऐ लोगों फिकर कर्दे-कर्दे अरह् बिना किऐ खाई-पीं, च़ौऊँदो देसो रात्ती हंऐ रूऐ; अरह् हेबी तोड़ी तुऐं लोगे किऐ भे ने खाऐ थंई।

³⁴ ईन्देंखे “हाँव तुँओं लोगो खे ऐजो बुलू, के ईन्दी तुवाँरा भला असो; के तुओं मुँझ्शा कोसी का बाल़ भे बाँका ने हों।”

³⁵ ऐजो बुलियों संत्त-पौलुस ऐ रोटी करी, अरह् सोभी के सहाँम्णें पंण्मिश्वर का धन्यबाद करा; अरह् च़ूड़ियों खाँदा लागा।

³⁶ ईन्दें लई सोभी के दीड़-हिमम्त्त आऐ, अरह् तबे तिनू सोभिऐं भे भोजन करा।

³⁷ पाँणीं के जहाजो दे आँमें कुल मिलाऐयों दो षौ छ़ियात्तर लोग थिऐ।

³⁸ जबे सोभी लोग खाऐ-पीयों छ:की गुऐ, तअ तिन्ऐं गींऊँ संमुन्द्रो दे फ़ेरकाऐयों जहाज हल़्को करी दितो।

³⁹ जबे देस आओं, तअ तिन्ऐं सेजो देश ने पंह्छयाँणी के ऐजो कुँण्जो देश असो; परह् तबे तिनके ऐक टापू देखाई पड़ा, अरह् तिन्ऐं ऐजा पाक्का ईरादा करा, के जे हऐ सको; तअ आँमें ऐजो पाँणीं को जहाज ऐथी ऐसी ही टापू गाशी लाऊँबे।

⁴⁰ तबे तिन्ऐं लंगर खोलियों संमुन्द्रो दे छुड़ी दिते, अरह् साथी पतवारों के बंधण भे ढीले करी दिते; अरह् आगलो पाल बागुरी दो ताँणियों तेसी टापू के काट्ल़ो की ढबै चाल पड़े।

⁴¹ परह् सेजो जहाँज संमुँन्द्रो के बाल़ू मुँजी गड़ी गुओं, तबे तिन्ऐं जहाज तेष्णों ही रंहणों दितो; अरह् जहाँजो का आगला हिस्सा तअ गड़ा अंदा रूवा; परह् पाछ़ला हिस्सा फ़ालों की चपेट दा आऐयों च़ूट्दा लागा।

⁴² तबे फऊँजी के सपाई के मंन दा ऐजा बिचार आया, के कंद्दी ऐशो ने हंईयों के ऐजे कंय्दी बाऊँऐ देऐयों भागी लागों; ईन्देंखे सेजे सपाऐ तिनू कंय्दी माँरी देणें चहाँव थिऐ।

⁴³ परह् फ़ऊँजी के सुबेदार ऐं संत्त-पौलुस बचाँणों की ताँईऐं तिन का सेजा पलान टाल़ी दिता; अरह् तेने ऐजी अज्ञाँ दिती, के जुण्जे लोग बाऊँऐ जाँणों से संमुँन्द्रों दी छ़ाल़ी माँरियों बाऊँऐ देऐयों पाँडे पाईले ढबै टापू के काट्ल़ो गाशी ज़ाव।

⁴⁴ अरह् ओके बादे लोग फाटैके, के जहाँजों की ऊँकी चींजों के सहाँरे पाछ़े शे पाँडे आँव; तेबे आँमें बादे के बादे लोग पाँडे पाईले ढबै सुऐ करियों पंह्ऊँची गुऐ।