प्रेरितो कै काम 24 - Sirmouri

हाकम फेलिक्स के सहाँम्णें संत्त-पौलुस

¹ पाँच देसो बित्त्णों गाशी, महाँ-याजक हनन्याह कुछ बुड़े बुजूर्गो, अरह् तिरतुल्लुस नाँव का कुँऐं बकील आपु आरी आँणिंयों कैसरिया दा पंह्ऊँचा! तबे तिन्ऐं हाकमों के सहाँम्णें संत्त-पौलुस के बिरूद दा ऐक अरजीं पत्री हाजीर करी।

² जबे संत्त-पौलुस ऊडा बईदा गुवा, तअ तबे तेने बकिल-तिरतुल्लुस ऐ संत्त-पौलुस गाशी दोष-ईल़्जाँम लाँणा शुरू करा: “हे बड़ा हाकम-फेलिक्स, तेरे जाँणें अमाँरा बैजाऐ भला हुवा; अरह् तेरे ईन्तजाँम शा ईयों जात्ती खे कैतोड़ी बुराई सुधारी ज़ाँव।

³ ऐजी बात आँमें बादे लोग ऐशी ही दाँई ढीकों हर जागे दे धन्यबाद करियों माँनों।

⁴ हाँव तुवाँरा जादा बख्त्त ने लंणाँ चहाँदा, अरह् मेरी तुँओं कैई शी ऐजी ढाल-अरज असो, के तुऐं कृपा करियों; मेरी दो बातो शुँण्णों की कृपा करह्।

⁵ अमाँरा अनुमाँन असो, के ऐजा आदमी आँमों खे मुँसीबत्त खड़ी कर्णों वाल़ा असो; अरह् ऐ ऐक ऐशा आदमी असो, जू यहूददियों के बीच दा मंत्त-भेद् पंऐदा करह्; अरह् ऐ ऐक खत्तरनाँक नासरी मंत्त का मुँख्या असो।

⁶ ऐने अमाँरी देऊँठी अ-शुद्ध गाँन्दी कर्णो के कोशिष करी लऐ थी; अरह् तबे आँमें ऐसी बाँनी पाया, (ऐसी खे आँमें आप्णें रित्ति-रूवाज के मुँताबिक सजा देणी चहाँव थिऐ;

⁷ परह् पल़ट्ण के सरदार लूसियास ऐ तेसी जोरा-जवरी अमाँरी हाथों शा छीनींयों छुड़ाऐ दिता;

⁸ अरह् तुऐ आपु ऐसी कैई शी पुछ़-ताच्छ़ करियों, तिनू बादी बातों की सच्चाई का पता लाव; जिन्दें के बारे दा आँमें ऐसी गाशी अरोप लाऐ लुवा।) तुँऐं आपु ही ऐसी जाँची पर्खियों जाँणी पाँदें।”

⁹ यहूदियों ऐ भे ऐस्को साथ देऐयों बुलो, के ऐजी बातो बिल्कुल ऐष्णी ही असो।

संत्त-पौलुस का जबाब

¹⁰ जबे तेने हाकम-फेलिक्स ऐं संत्त-पौलुस खे बुल्णों का ईशारा दिता, तअ तेने ऐजा जबाब दिता: “मुँऐं ऐजों जाँणियों खुशी हंऐयों आप्णीं सफाऐ देऐ लऐ; के तुऐं बैजाऐ साल्ह शे ईयों जात्ती का नियाव कर्णो वाल़े नींयाँईच़ू असो।

¹¹ तुऐं आपु भे जाँणी सको, के जबे शुभा हाँव यरूशलेम दा भजन करदा आया, तअ हेभी मुँह ईथै बारोह् देसो शे जादा देसो ने हंऐ रंई।

¹² ईन्ऐं मुँह ना देऊँठी दा, अरह् ना यहूदी चौत्रें दा; अरह् ना नंगर दा कोसी की गईलो बादबिबाद कर्दे, के भीड़ कंट्ठी कर्दे ने देखी थई;

¹³ अरह् ना तअ ईनू बातो का, जिन्दे के बारे दा, ईन्ऐ ऐबे मुँह्दा दोष-ईल़्जाँम लाऐ लुवा; ईनू सब बातो भे ऐ तुवाँरे सहाँम्णें साच्चै ने प्रमाँणिंत्त हंऐ सक्दे।

¹⁴ “हाँव तुवाँरे सहाँम्णें ऐतोड़ो जरूर कंबूल करूबा, के जिन्देंखे ऐजो लोग कुँ-बाट बुलो; हाँव तियों सू-बाट के मुँताबिक आप्णें पुराँणिऐं के पंण्मिश्वर की आरार्धना करू, किन्देंखे के जुण्जो किऐ, ऋषी-मूसा खे भेटे गुऐ अज्ञा-निय्म दो; अरह् ऋषियों की पबित्र-ग्रन्थों दो लिखी थुओं: हाँव तिदा सोभी दा बिश्वाष करू।

¹⁵ अरह् मेरे पंण्मिश्वर दा भोर्षा असो, जेष्णाँ ईन के भे असो; के धर्मी अरह् अ-धर्मी दुई ने हजो पाछ़ू ऊँबे जीऊँदें हंदे।

¹⁶ ईन्देंखे हाँव पंण्मिश्वर अरह् आदमी की नंजरी दे आप्णीं अंन्त्तर-आत्त्मा अरह् जमीर सदा नींर-दोष रंहणों के कोशिष करदा रंऊँ।

¹⁷ बैजाऐ साल्ह बित्त्णों गाशी, हाँव आप्णे लोगो खे दाँण देंदा, अरह् देऊँठी दी भेंट चड़ाँदा आऐ रूवा।

¹⁸ ईन्ऐं मुँह देऊँठी दा, शुद्ध दषा दा, बिना भीड़ आरी; अरह् बिना झ़ह्गड़े कर्दे के ऐसी काँम-काज़ दा देखा परह् तेथै एशिया के किऐ यहूदी थीऐ; अरह् तिनखे ऐजो ठीक थियों,

¹⁹ जे तिनके किऐ मेरे बिरूध बुल्णों थियों, तअ ईथै तुवाँरे सहाँम्णें आऐयों मुँह गाशी दोष-ईल़्जाँम लाँदे;

²⁰ भाँव ऐजो ही बुल्दे के जबे हाँव बड़ी खुम्ल़ी के सहाँम्णें खह्ड़ा थिया, तअ ईन्ऐं मुँह्दा कुँण्जा दोष-कसूर देखा?

²¹ होर, ऐक बात जरूर असो; के मुँऐं तिनके बीच दो खह्ड़े हंऐयों जूराल़ो ऐजो बुलो थियों; के ‘मंरे अंदे के दुज़ाल़िऐ पाछू ऊँबे जीवणों के बारे दी; जिन्दें के बारे दा ऐत्त्लो मुँह गाशी मुँक्दमाँ चाली रूवा।’”

²² हाक्म-फेलिक्स कैई ऐसी “बाट” के बारे दी आच्छ़ी जाँणकारी थी, तबे तेने सेजी शुँणवाँऐ बंद करी, अरह् यहूदी बुड़े-बुजूर्गो खे बुलो; “जबे पल़ट्ण का सरदार लूसियास आला, तबे हाँव तुँवारी बातो का नियाँव करूबा।”

²³ तबे: पल़्टंण के सुबेदार खे अज्ञाँ दिती, के संत्त-पौलुस देख्ह-रेख्ह अरह् पंह्ऐरे दा थुऐ; परह् ऐस्खे किऐ अजादी असो; के ऐस्के साथी ऐस कैई आऐ सको, अरह् ऐस्की सेंवा-टेह्ल करी सको;

फेलिक्स अरह् द्रंसिल्ला के सहाम्णें संत्त-पौलुस

²⁴ कुछ़़ देसो बित्त्णों गाशी, हाकम-फेलिक्स आप्णी यहूदी घरवाल़ी द्रुंसिल्ला की गंईलो आया; तबे तेने संत्त-पौलुस बंईद्णों खे शुज़ा दिता, अरह् तेस कैई शी प्रभू यीशू दा बिश्वाष के बारे दी बातो शुँणी।

²⁵ जबे संत्त-पौलुस धार्मिक्त्ता, आत्त्मसंय्म, अरह् आखरी नियाँव के बारे दो बुल्दे लागे; तअ हाकम-फेलिक्स दा डर समाँया अरह् तेने तेस्खे बुलो; “तू ऐसी बख्त्ते ईथै शा आगू ज़ा;” परह् बख्त्त भेट्णों गाशी, हाँव ताँव हजों बंऐदी सकूँ।

²⁶ तेसी हाकम फेलिक्स के संत्त-पौलुस कैई शे किऐ कुँढ़-रीषपत्त के रूपिया भेंट्णों के भे ढेठ थी; तबे ही से तेसी हजो भे बार-बार बय्दी-बऐदियों तेसी आरी बात-चींत्त कर्णी चहाँव थिया।

²⁷ परह् जबे दो साल्ह बित्त्णों गाशी, तेस्की जागा दा, हाकम पोर्कियुस-फेस्तुस बंणाँया गुवा; तअ तबे हाकम-फ़ेलिक्स ऐ यहूदी लोग खुशी कर्णो की ताँईऐ संत्त-पौलुस कंय्दखाँने दा ही छ़ुड़ी दिता।