प्रेरितो कै काम 23 - Sirmouri

¹ संत्त-पौलुस ऐ तियों बड़ी खुम्ल़ी की ढबे नीह्जाऐयों देखियों बुलो; “हे भाईयों! मुँऐं हेबी तोड़ी पंण्मिश्वर की नंजरी दा पबित्र-शुद्ध जीवन बिताँऐ थुवा।”

² ईन्दें गाशी महाँ-याजक हनन्याह ऐं आपु कैई खह्ल़िऐ अंदे लोगो खे अज्ञाँ दिती, के संत्त-पौलुस के मुँहों दी थाप्पै लाव।

³ तबे संत्त-पौलुस ऐ महाँ-याजक खे बुलो, “ओ केकारू लई छटियाई अंदी भीत्तो! पंण्मिश्वर तुओं आपु माँरला! तुऐं ऋषी मूसा खे भेटे गुऐ अज्ञाँ-निय्म के मुँताबिक मेरा नियाँव कर्दे बऐठी रूऐ, अरह् तुऐं अज्ञाँ का बिरूध करियों मुँह्दी थाप्पै लाँणों की अज्ञाँ देऐ लंऐ?”

⁴ तबे जुण्जे लोग संत्त-पौलुस कैई खह्ड़े थिऐ, तिन्ऐं बुलो, के “तुऐं पंण्मिश्वर के महाँ-याजक खे बुरो-भलो कैई बुली लो?”

⁵ संत्त-पौलुस ऐ बुलो, “हे भाईयों! हाँव ने ऐजो जाँणू थिया; के ऐजा महाँ-याजक असो, किन्देंखे के पबित्र-ग्रन्थों दो ऐजो लिखी थो; के ‘आप्णी प्रजा के हाकम’ के नींदया ने करे।”

⁶ संत्त-पौलुस ऐजो जाँणों थिया, के बड़ी खुम्ल़ी दे दो द्ल़ असो: ऐक सदूकियों का, अरह् दुज़ा यहूदी भाट-बाँम्ण का; ईन्देंखे तेने लेरोह् माँरियों बुलो, “हे भाईयों! हाँव यहूदी भाट-बाँम्ण असो; अरह् यहूदियों के अलाद असो! देखो, ईन्ऐं मँरे अँदे के दुज़ाल़िऐ ऊँबे जीवणों के भोर्षे के कारण मुँह गाशी मुँक्दमाँ करी लुवा।”

⁷ जबे संत्त-पौलुस ऐ ऐजी बात बुली, तअ यहूदी भाट-बाँम्ण अरह् सदूकियों मुँझी बईर पय्दा हुओ; अरह् तियों बड़ी खुम्ल़ी दी फूट पढ़ी।

⁸ किन्देंखे के सदूकियों का ऐजा बिचार थिया, के मँरे अँदें हजो दुज़ाल़िऐ ऊबे जीऊँदे हंदे ही ने; अरह् ना स्वर्गदूत्त आथी; अरह् ना किऐ आत्त्मा आथी, परह् यहूदी भाट-बाँम्ण ऐजो सब कुछ मानों थिऐ। परह् यहूदी भाट-बाँम्ण ऐजी बादी बातो माँनों थिऐ।

⁹ तबे तअ तेथै हारकुँजी हऐ, अरह् यहूदी द्ल़ के किऐ भाट-बाँम्ण ऊँबे बीऊँजियों झ़ह्गड़िन्दें लागे, अरह् ऐजो बुल्दे लागे; “आँमें ऐसी आदमी का किऐ दोष-कसूर ने जाँण्दें। अरह् ऐजो हंऐ सको, के आत्त्मा ऐ, के कोसी स्वर्गदूत्त ऐ ऐस्खे किऐ बुली थो, तअ तबे का असो?”

¹⁰ जबे बैजाऐ बाद-बिबाद बड़ा, तअ पल़ट्ण के सरदार ऐ तेसी डरह् को के कद्दी ऐशो ने हऐयों के ऐजे लोग संत्त-पौलुस के रींडे-रींडे ने बाँणी दियों; ईन्देंखे तेने आप्णें फोऊँजी खे अज्ञाँ दिती, के “बड़ी खुम्ल़ी दे ऊदे ज़ाँव; अरह् ऐसी पौलुस ऊबा आँणिंयों किल्लै दा भीटा नींयों।”

¹¹ तियों ही रात्ती प्रभू ऐ संत्त-पौलुस कैई खह्ल़ियों बुलो, “हे पौलुस, दीड़-हिम्मत थो; किन्देंखे के जेष्णी तुँऐं यरूशलेम दी मेरी गुवाऐ-शाज़्त्त दिती, तेष्णी ही ताँव रोम दी भे मेरी गुवाऐ-शाज़्त्त देणी पड़ली।”

संत्त-पौलुस की हंत्त्याँ का कैड़ा

¹² देस हंणों गाशी कुछ़ यहूदियों ऐ मीलियों ऐशी रंच्णाँ रंची, अरह् तिन्ऐं ऐजी षौंह्-कंस्म खाई, के ताँव तोड़ी आँमें किऐ भे खाँदे-पींन्दें ने; जाँव तोड़ी आँमें तेसी पौलुस जीयाँनिऐं ने माँरी दियों।

¹³ अरह् जिनू लोगे ऐं ऐजी रंच्णाँ-रंचीं थंऐ थी; सेजे लोग च़ाल़िष शे जादा थिऐ।

¹⁴ तिन्ऐं मुँख्या-याजकों अरह् बुड़े बुजूर्गो कैई ज़ाऐयों बुलो, “आँमें ठाटी थो, के जाँव तोड़ी आँमें पौलुस मारी ने दियों, ताँव-तोड़ी जे आँमें किऐ चाख्ह भे तअ आँमों खे फीट्कारा-लाँणत् असो।

¹⁵ ईन्देंखे बड़ी खुम्ल़ी की संहम्त्ती शो पल़ट्ण के सरदारो खे बुलो गुओं, के पौलुस आँमों कैई डेयाल़ों, किन्देंखे के आँमें आपु तेस्के माँम्ले की ठीक-ठीक जाँच-परख कर्णी चहाँव; अरह् जैई से ईथै आला, तैई आँमें तेसी माँरी देऊँबे, आँमें आगे ही तैयार रंह्दें।”

¹⁶ परह् संत्त-पौलुस के भाँण्जे ऐ ऐजो सब-कुछ शुँणीं पाव, अरह् से आप्णें माँमा बंचाँदा किल्लै दा पंह्ईचा, अरह् भींटे ज़ाऐयों तेने संत्त-पौलुस कैई सेजो सब-कुछ़ साफ-साफ बुली दितो।

¹⁷ तबे संत्त-पौलुस ऐ तेसी सुबेदारोह् मुझ्षा ऐक झोणा आपु कैई बऐदियों बुलो, “ऐसी जवाँन पल़ट्ण के सरदारो कैई नींयों, ऐ तेस कैई किऐ बुल्णों चहाँव।”

¹⁸ तेने तेसी टंडका पल़ट्ण के सरदारो कैई नींया, अरह् तेस्खे बुलो; के “कय्दी पौलुस ऐ मुँह बऐदियों ढह्लियाऐयों ऐजा जवान तुओं कैई डेयाल़ी थुवा, किन्देंखे के ऐ किऐ खास बात ताँव कैई बुल्णीं चहाँव।

¹⁹ पल़ट्ण के सरदार ऐं तेस्का हाथ थाँहम्बड़ियों तेसी ज़ोई दुरका नींह्ऐयों पुछ़ो, तू मुँह कैई कुँण्जी खास बात बुल्णीं चहाँऐ?”

²⁰ तेने बुलो, “यहूदी ऐ ऐजा कैड़ा करी थुवा, के ताँव ढह्लियाऐयों दोत्ती पौलुस बड़ी खुम्ल़ी दा बंईदा ज़ाँदा; ऐजो जाँणिंयों के तिनके ऐस्की सूऐं-जाँच परख्ह कर्णी;

²¹ परह् तुऐं तिनकी बात ने माँनें, किन्देंखे के तिनू मुँझ़ी किऐ च़ाल़िष शे भे जादा लोग असो; जुण्जे पौलुस की घात्त-माँर्णो की ताक दे तैयार असो; अरह् तिन्ऐं षौह्-कंस्म करी थंई, के आँमें ताँव-तोड़ी किऐ खाँदी ने पींदी, जाँव तोड़ी आँमें पौलुस ने माँरा से तियों ही ठह्ल़णाँई दे असो।”

²² तबे पल़ट्ण के सरदार ऐ तेसी जवाँन खे ऐजी अज्ञाँ देऐयों बिदा करा, के “कोसी कैई ने बुले, के तुँऐं ऐजी बात मुँह कैई बुली थऐ।”

संत्त-पौलुस हाकम-फेलिक्स कैई डेयाल़ा

²³ तबे तेने सुबेदार ऐ आप्णें दो सपाई खे बऐदियों बुलो, “ऐत्त्लो रात्ती नौ बाजे तोड़ी कैसरिया ज़ाँणों खे दो षौ सपाऐ, सत्तर घूड़-शुवार, अरह् दो षौ भाले वाल़े जवाँन तैयार थुऐ।

²⁴ अरह् पौलुस खे भे घोड़ै का ईंन्त्तजाँम करे, जिन्दें लंई से तेसी सुवाँ करियों हाकम फेलिक्स कैई पंह्ऊँचाल़ी सको।”

²⁵ तेने तेसी ढंग शी ऐक पत्री भे लिखी:

²⁶ “श्री माँन हाकम फेलिक्स खे क्लौदियुस लूसियस का नमंष्कार;

²⁷ महाराज! यहूदियों ऐ जबे ऐसी आदमी पौलुस थाँहम्बड़ी पाया, अरह् से ऐसी माँरी देंणाँ चहाँव थिऐ; तअ तेख्णीं मुँऐं आप्णें सपाई आरी तेथै ज़ाऐयों ऐसी ऊँडा छ़ुड़ाया, किन्देंखे के मुँह कैई ऐजा पता थिया; के ऐ रोमी नाँगरिक असो।

²⁸ हाँव ऐजो जाँण्णों चहाऊँ थिया, के से ऐसी गाशी किदे की ताँईऐं दोष-ईल़्जाँम लाँणा चहाँव, ईन्देंखे ऐसी मुँऐ बड़ी खुम्ल़ी दा नींयाँ।

²⁹ तेथै मुँह कैई ऐजा पता लागा, के ऐ आप्णें अज्ञाँ-निय्म के ही कारण ऐसी गाशी, दोष-ईल़्जाँम लाओं, अरह् ऐष्णाँ किऐ भे ऐस्का दोष-ईल़्जाँम ने आथी; के ऐस्खे मंऊँत्ती की सजा देऐ ज़ाँव, के हमेशा खे कंय्दी दा पाँया ज़ाँव।

³⁰ जबे मुँह कैई ऐजा पता लागा, के ऐसी आदमी के बारे दा माँर्णो का कैड़ा, अरह् किऐ रंच्णा रंचीं लंऐ; तअ मुँऐं ऐसी तेख्णीं ताँव कैई डेयाल़ी दिता, अरह् मुँऐं ऐस्के मुदोई खे भे ऐजी अज्ञाँ देऐ थंऐ; के तुऐं भे हाकमं फेलिक्स के सहाँम्णें ही आप्णा मुकदमा करह्।”

³¹ तबे: जेष्णी फऊँजी खे अज्ञाँ भेंटी थी, तिन्ऐं तेष्णाँ ही तिन्दे का पाल़्ण करा; अरह् संत्त-पौलुस तिन्ऐ रात्ते-रात्त अन्तिपत्रिस नंगर दा पंह्ईचाल़ा।

³² दुज़े देसे सेजा फोऊँजीं का सुबेदार आप्णें घूड़-शुवार अरह् भाले वाल़े सपाऐ; संत्त-पौलुस की गईलो ज़ाँणों खे तैथी छ़ूड़े; अरह् आपु से पाछ़ू आप्णी पंल़्टण की छ़ाँऊँणी दे आऐ।

³³ तिनू घूड़-शुवारे कैसरिया पंह्ऊँचियों, तेसी हाकम फेलिक्स कैई सेजी सुबेदार की पत्री दिती, अरह् संत्त-पौलुस भे तेस्के सहाँम्णें हाजिर करी दिता।

³⁴ तेने हाकम फेलिक्स ऐ सेजी पत्री पढ़ियों संत्त-पौलुस कैई शो पुछो, “के तुऐ कोसी ईलाके के असो?”

³⁵ अरह् जबे तेने हाकम फेलिक्स ऐ ऐजो जाँणी पाव, के ऐ किलिकिया का असो; तअ तबे तेने तेस्खे बुलो, के “जबे तेरे मुँदोऐ ईथै आऐ ज़ाले, तअ हाँव तेरे मुकदमें के शुणाँऐ करूबा।” अरह् तेने ताँव तोड़ी तेसी राजा हेरोदेस के मंह्लों दा पंऐरे आरी थंऐ दिता।