प्रेरितो कै काम 22 - Sirmouri

भीड़ो के सहाम्णें संत्त-पौलुस का भाष्ण

¹ “हे भाईयों! अरह् गुरू जनों! मेरे पक्ष दा मेरा जबाब शुँणों।”

² जबे लोगे ऐ ऐजो शुँणों, के ऐने इब्रानी भाषा दो किऐ बुली लो; तअ से बादे चुप्प-चाँण रूऐ, अरह् तबे संत्त-पौलुस ऐं बुलो;

³ “हाँव यहूदी असो! हाँव किलिकिया के तरंसुस नंगर दा पय्दा हऐ रूवा; अरह् मुँऐ ऐसी नंगर दे ही गुरू-गमलीएल के लात्तो कैई बऐठियों शिक्क्षा-दिक्क्षा लऐ थंऐ; मुँऐं आप्णें पुराँणियाऐं के रित्ती-रूवाज के बिधी-बिधान का बादा अध्यन करी थुवा; हाँव पंण्मिश्वर का तेष्णा ही आरार्धना कर्णों वाल़ा बंणाँ, जेष्णें तुऐं असो।

⁴ मुँऐ मरोद् अरह् तिरंई दुईन्नें बाँनी-बानियों, अरह् कय्दी दे पाँऐ-पाँऐयों, तेसी मंत्त-शीख्ह के लोग ऐते ज़ुगे सताऐ, अरह् तिनू मंराऐ भे दिते।

⁵ महाँ-याजक अरह् बादे बुड़े बुजूर्गो की बादी बड़ी खुम्ल़ी मेरी ईनू बातो के गुवाह्-शाज़्त्त असो; अरह् तिन्ऐं ही मुँह पत्री देऐयों दमिश्क के भाईयों कैई डेयाल़ा, के हाँव तेथै के लोग जू ऐसी मंत्त-शीख्ह के माँनणों वाल़े असो; तिनू बाँनियों यरूशलेम दे आँणू, अरह् तिनखे सजा देंयाऊँ।”

आप्णे मंन बद्ल़्णों का बखाँण

⁶ “जबे हाँव हाँड्दे-हाड्दे दमिश्क के नंजीक पंह्ईचा, तबे ऐशो हऐयों के दोपारंह् के उडे-पूडे दड़ा-दड़ ऐक बड़ी बिजूल़ी जेऐ मेरे चौऊँँ ढबे चंमम्की।

⁷ तबे हाँव धनियों पड़ा, अरह् ऐजी धाव शुँणाँई पड़ी ‘हे शाऊल-हे शाऊल, तू मुँह कैई सताँऐ?’

⁸ मुँऐ जबाब दिता, ‘हे प्रभू, तू कुँण असो?’ तेने मुँखे बुलो, ‘हाँव यीशू नासरी असो, जेसी तुऐं सताऐ लुवा।’

⁹ मेरे साथी ऐ भे बिजूल़ी जेऐ चंमम्कोंदे तअ देखी, परह् जुण्जी धाव मेरे शुँणाँई पड़ी, सेजी धाव तिनके शुँणाँई दी ने पड़ी।

¹⁰ तबे मुँऐं बुलो, ‘हे प्रभू, हाँव का करू?’ प्रभू ऐ मुँखे बुलो, ‘बींऊँजियों, दमिश्क दा ज़ा, अरह् जुण्जो किऐ ताँव कर्णों पड़ो, सेजो तेथै ताँव कैई बुलो ज़ाँदो।’

¹¹ जबे तेसी त्तेज प्रकाष के कारण मेरे किऐ ने देखाई पड़ी, तअ तबे हाँव आप्णे साथी के हाथ थाँहम्बड़ियों दमिश्क दा आया।

¹² “तबे हनन्याह नाँव का ऐक आदमी तेथै आया, से ऋषी मूसा खे भेटे गुऐ अज्ञाँ-निय्म के मुँताबिक चाल्णों वाल़ा, भगत्त अरह् सोभी यहूदियों मुँझी माँना-गीणा आदमी थिया;

¹³ से तेथै मुँह कैई आऐयों खह्ड़ा हुवा, अरह् तेने मुँखे बुलो, ‘हे भाऐ शाऊल! हजो देख्दा लाग।’ तेख्णी मेरी आखी खुली गऐ, अरह् मुँऐं तेसी देखा।

¹⁴ तबे तेने बुलो, ‘अमाँरे पुराँणियाऐं के पंण्मिश्वर ऐ ताँव, ईन्देंखे छाँटी थुवा, के तू तिनकी हिछ़या जाँणें, अरह् तेसी धर्मी देखे अरह् तिनके मुँहों शी बातो शुँणें।

¹⁵ किन्देंखे के ताँव पंण्मिश्वर की ढबे शी, बादे आदमी के सहाम्णें तिनू बातो के गुवाऐ-शाज़्त्त देंणी पड़ो; जुण्जी तुऐं देखी थंई, अरह् शुँणीं थंई।

¹⁶ ऐबे तुऐं बैरियाऐ कैई लो? बीऊँज, अरह् नहाँण-नहाँ, अरह् प्रभू यीशू के नाँव शे आप्णें पाप धोऐ दे।’

गऐर-यहूदी मुँझी प्रचार का बखाँण

¹⁷ “जबे हाँव यरूशलेम दा पाछ़ू आया, अरह् मुँऐ देऊँठी दी प्रार्थना करी लई थी, तअ हाँव पबित्र-आत्त्मा शा बै-होष हंऐयों आँईना-आँईना गुवा।

¹⁸ अरह् मुँऐं का देखो, के प्रभू ऐ मुँखे ऐजो बुली लो; के ‘शीघा-शीघा यरूशलेम शा झट् नीक्ल़ी ज़ा; किन्देंखे के ऐ मेरे बारे दी तेरी गुवाऐ-शाज़्त्त माँन्दे ने।’

¹⁹ मुँऐ बुलो; ‘हे प्रभू! ऐजे लोग ऐजो जाँणों ऐ, के हाँव ही सेजा आदमी असो; जुण्जा बिश्वाषी लोग ऐक नाँम यहूदी च़ौत्रे शे बाँनियों आँणू थिया; अरह् तिनदे कोड़ो मंराऊँ थिया।

²⁰ अरह् जबे ईनू लोगे ऐ, तुवाँरे गुवाह्-शाज़्त्त स्तिफनुस को लह्ऊँ बुवाऐ लों थियो; तअ हाँव भे तेथै खह्ल़िया अंदा थिया, अरह् जिनू लोगे ऐं तेसी माँरी लुवा थिया; हाँव तिनकी खट्णों का जंगवाल़ा थिया।’

²¹ अरह् प्रभू ऐ मुँखे बुलो, ‘आगू ज़ा: किन्देंखे के हाँव ताँव गऐर-यहूदी लोगो कैई दुर-दुर डेयाल़ी देऊँबा।’”

²² तिनू लोगे ऐ संत्त-पौलुस की बातो ईथै तोड़ी तअ जरूर शुँणीं, परह् ईदें पाछ़ी से बैजाऐ लेल्याऐ; के “ऐजा आदमी ईयों धर्ती गाशी रंहणों ज़ूगा ने आथी, ऐसी खह्त्तम करह्!”

²³ तबे सेजे लोग लेल्लयाँदें लागे, अरह् आप्णें खोट्णों ऊपाड़ियों अरह् धूड़-माँट्टी ऊड़ाँदे लागी रूऐ थिऐ।

²⁴ तबे पल़ट्ण के सेरदारे बुलो, “ऐसी आदमी गाँव दा नींहयों; अरह् ऐस्दे कोड़े माँरियों पर्खियों जाँचो, जिन्दें लई ऐजा पता लागो, के ऐजे लोग संत्त-पौलुस के बिरूध ऐत्रे कैई ले-लेल्याऐ रूऐ।”

²⁵ जबे तिन्ऐं कोड़ै लाँणों खे तेसी बाँनी लुवा थिया, तअ संत्त-पौलुस ऐ तेथै खह्ल़ी अंदे सुबेदारो कैई शो पूछ़ो; “कियो तुऐं काँनून के मुँताबिक ऐशे आदमी दे कोड़ै लाऐ सको; जुण्जा रोमन नाँगरिक असो; अरह् जेसी दोषी-कसूरबार भे बंणाँऐ ने थंई?”

²⁶ तबे ऐजो शुँणियों सेजा पल़ट्ण का सेरदार ऐजा शुझ़ा देंदा हुटा अरह् बुल्दा लागा; के “तुऐं ऐजो का करी लो? ऐजा आदमी तअ रोमन नाँगरिक असो।”

²⁷ तबे तेने पल़ट्ण के सरदारे संत्त-पौलुस कैई आऐयों बुलो, “मुँह कैई बुल, कियों तू रोमी असो?” तेने बुलो “होर”

²⁸ ऐजो शुँणियों पल़ट्ण के सरदार ऐ बुलो, “मुँऐ रोमी हणों का पद्-भार बैजाऐ रूपिऐं देऐयों पाऐ थुवा।” संत्त-पौलुस ऐ बुलो, “हाँव तअ जन्मों शा ही रोमी असो।”

²⁹ तबे: जुण्जे लोग तेसी परंख्णाँ चहाँव थिऐ, से तेख्णी संत्त-पौलुस कैई शे दुर्के हुटे; अरह् पल़ट्ण का सरदार भे ऐजो जाँणियों के ऐ रोमी असो, अरह् मुँऐ ऐसी बाँनी लुवा तअ से आपु भे डरी गुवा।

बड़ी खुम्ल़ी के सहाँम्णें संत्त-पौलुस

³⁰ दुज़े देसे सुबेदार ऐ ऐजो ठीक-ठीक जाँण्णों की हिछ़या शो के ऐजे यहूदी लोग ऐसी ऐत्रा दुषी-कसूर बार कैई बाणों ऐजो जाँण्णों खे तेने संत्त-पौलुस के बाँनणों खुली दिते, अरह् मुँख्या-याजकों अरह् बड़ी खुम्ल़ी कंट्ठी कर्णो के अज्ञाँ दिती; अरह् तेने संत्त-पौलुस आँणिंयों तिनके सहाँम्णें खह्ड़ा करी दिता।