प्रेरितो कै काम 16 - Sirmouri

संत्त-पौलुसे ऐ तीमुथियुस साथी नींयाँ

¹ तबे संत्त-पौलुस अरह् सीलास दिरबे अरह् लुस्त्रा दे भे हुटे। तेथै तीमुथियुस नाँव का ऐक चैला थिया, जू कोसी बिश्वाषी यहूदीन तिरंई का बैटा थिया, परह् तेस्का बाबा यूनानी थिया।

² अरह् लुस्त्रा अरह् इकुनियुम के भाई-बंईणों मुँझी से जाँणा-गिंणा आदमी थिया।

³ संत्त-पौलुस तिमुथियुस आप्णी गईलो यात्रा दा नींणा चहाँव थिया; अरह् तेने तेसी साथी नीयाँ, परह् तेथै रंहणों वाल़े यहूदी लोगो के जाँणें तेस्का खतना कराया गुवा। किन्देंखे के से बादे जाँणों थिऐ के ऐस का बाबा यूनानी थिया।

⁴ अरह् नंगर-नंगर दे ज़ाँदे-ज़ाँदे तिन्ऐं तेथै के लोगो कैई सेजी बिधी-निंय्म के बारे दो बुलो, जुण्जे यरूशलेम दे खास-चैले अरह् तेथै के अगुऐ ऐं बंणाँऐं थुऐ थिऐ।

⁵ ऐशी दाँई कलीसियाँ ऐ बिश्वाषो दी पाक्की हंदी गई, अरह् से गिनती दे रोज बढ़्दे गुऐ।

त्रूआस दा: संत्त-पौलुस ऐ दर्शण देखा

⁶ पबित्र-आत्त्मा संत्त-पौलुस, सीलास, अरह् तिमुथियुस खे आसिया ईलाके दा बचन का प्रचार कर्णो शा भाजी गुवा; ईन्देखे तिन्ऐं फ्रूगिया अरह् गलातिया ईलाके का दोंरा करा।

⁷ अरह् तिन्ऐ मूसिया ईलाके के नंजीक पंह्ऊँचियों, बितूनिया दो ज़ाँणों चहाँव; परह् प्रभू यीशू की आत्त्मा ऐ तिनू ज़ाँणों ने दिती।

⁸ तबे: से मूसिया ईलाके बाटी त्रोआस दे आऐ।

⁹ तेथै संत्त-पौलुस ऐ रात्ती ऐक दर्शण देखा, के ऐक मकिदुनी मरोद् खह्ड़ा हुआ, अरह् से तैस्खे ढलियाऐयों बुल्दा लागा, “पाँडा-पाईले-ढबे मकीदुनिया ईलाके दा आ, अरह् अमाँरी मद्त करह्।”

¹⁰ तेस्का ऐजा दर्शण देखियों ही, आँमें तेख्णी मकीदुनिया ज़ाणों खे चहाँव, ऐजो जाँणियों के पंण्मिश्वर ऐ आँमों तिनखे खुषख्बरी शुँणाँदे बय्दी थुऐं।

फिलिप्पी दा: लुदिया का मंन बद्ल़ा

¹¹ ईन्देंखे त्रोआस शो जहाज खुलियो आँमें सीधे सुमात्राके तट दे हुटे; अरह् दुज़े के नियापुलिस दे आऐ।

¹² तेथै शे आँमें फिलिप्पी दे पंहईचे, जुण्जा मकीदुनिया का इलाके का खास नंगर अरह् रोमियों के बस्ती असो; अरह् आँमें तेसी नंगर दे किऐ देसो तोड़ी रूऐ।

¹³ बिषाँव के देसे आँमें नंगर की ज़ाँगी शे बाईडे दाई नंदी के टिराँव्टी दे ऐजो जाँणियों हुटे, के तेथै प्रार्थना कर्णो की जागा हली; अरह् बऐठियों तिनू तिरंई आरी जुण्जी तेथै कंट्ठी हऐ रंह्ई थी, तिनकी गईलो बातो कर्दे लागे।

¹⁴ लुदिया नाँव का थुआथीरा नंगर की बतिया के रंगो के खट्णों बिकणों वाल़ी, ऐक भगतिण तिरंई ऐं अमाँरी बातो शुँणी लई थी। अरह् प्रभू ऐ तियारा मंन खुली दिता, के संत्त-पौलुस की बातो गाशी मंन लाँव।

¹⁵ जबे तिऐं आप्णे घराने सहमेंत्त नहाँण-नहाँव, तअ से आँमों ढह्लियाँदी लागी, के “जे तुऐ मुँह प्रभू की बिश्वाष्णी जाँणों, तअ मेरे कागी मेरे घरोह् दे रंह्,” अरह् तिऐं आँमों मंनाँऐयों तेथै शे आगू आप्णें कागी नीऐं।

संत्त-पौलुस अरह् सीलास कय्दी दे

¹⁶ जबे आँमें प्रार्थना कर्दे आरार्धना के चौत्रे दे ज़ाँदे लागे थिऐ, तअ आँमों ऐक दासी भेंटी, जुण्जी ऊँतारीक थी, अरह् ओत्रियों से आप्णे माँलिक खे बैजाऐ कंमाँऐयों धंन लियाँव थी।

¹⁷ से संत्त-पौलुस अरह् आँमों पाछी आऐयों लेल्याँदी लागी, के “ऐजे आदमी परम-पिता पंण्मिश्वर के दास असो; जुण्जे आँमों कैई शी छुट्कारे की बातो के कंथा शुँणाँव।”

¹⁸ से बैजाऐ देसो तोड़ी तेष्णों ही कर्दी रंऐ; अरह् संत्त-पौलुस तिदा दुखी हुआ, अरह् तेने पाछू फीरियों तियों दुष्ट-आत्त्मा खे बुलो, “हाँव ताँव्खे यीशू मसीया के नाँव शी अज्ञाँ देऊँ, के ईयों शी निक्ल़ी ज़ा” अरह् से तियों शी तेख्णी नीकल़ी गऐ।

¹⁹ जबे तियाँरे माँलिक ऐ ऐजो देखो, के अमाँरी कंमाँई का जरीया ऐबे खत्त्म हऐ गुवा; तअ तेने संत्त-पौलुस अरह् सीलास थाँहम्बड़ियों चराई बाटो दे मुँख्या कैई खीचियों नींऐं;

²⁰ अरह् तीनू फौजदारी का हाकम ठाँणेंदार कैई नींऐं, अरह् बुलो, “ऐजे लोग जू यहूदी असो, ईन्ऐं अमाँरें नंगर दी हारकुँण्जी करी लई।

²¹ अरह् ऐष्णें रित्ती-रूवाज बुली लुऐ, जिनू माँनणें अरह् पुरे कर्णें आँमों रोमी लोगो खे ठीक ने आथी।”

²² तबे भीड़ के लोग संत्त-पौलुस अरह् सीलास के बिरूध दे कट्ठै हऐयों तिन्दें पिचराल़िऐं, अरह् हाकमे तिनके खोट्णों चीरियों उडे खुलाऐ, अरह् बैत्त मार्णों की अज्ञाँ दिती।

²³ बैजाऐ बैत्त की लाऐयों तिन्ऐं तिनू कय्दखाँने दे पाँऐ; अरह् ठाँणेंदार खे अज्ञाँ दिती के ईनकी च़ौक्क्षाऐ थुऐं।

²⁴ तेसी ठाँणेंदारे ऐष्णी अज्ञाँ भेंट्णों गाशी, तिनू भीत्त्ली कुठ्ड़ी दे थऐं दिते; अरह् तिन के लात्त फड़के दे कीलियों थुऐ।

संत्त-पौलुस अरह् सीलास कय्दी शे छुटे

²⁵ आधी रात्ती के उडे-पूडे संत्त-पौलुस अरह् सीलास प्रार्थना कर्दें-कर्दें पंण्मिश्वर के भजन गाँदे लागे; अरह् ओकी कंय्दी ऐ भे तिनू शुँणी लुऐं थिऐ।

²⁶ तबे ऐक-दंम बैजाऐ बड़ो भूईचोल़ लागो, ऐते ज़ुगौ के कंय्दखाँने की पह्-नींव झ़िकी गई; अरह् तेख्णी बादे कुवाड़ खुली गुऐ, अरह् कय्दी की बैड़ी खुली गई।

²⁷ तबे ठाँणेंदार ऊबा बींऊँजा, अरह् कंय्दी के दुवार खुले देखियों तेने जाँणों के बादे कय्दी भागी गुवे, तबे: तेने आप्णी तरवार गाड़ी अरह् आपु-आप्खे मार्णों की कोशिष करी।

²⁸ परह् संत्त-पौलुस ऐ जुराल़ों लेरंह् मारियों बुलो, “आप्णों ने तारे, किन्देंखे के आँमें बादे झोणें ईथी असो।”

²⁹ तबे तेने ठाँणेंदारे ऐ दिवा अंणाँया अरह् कंय्दखाँने दा से भींटा हुटा, अरह् से काँम्ब्लियों संत्त-पौलुस अरह् सीलास के लात्तो गाशी पड़ा;

³⁰ अरह् तिनू बाईडे आँणियों बुलो, “हे बड़े सजंन लोगो मुँक्त्ति पाँणों खे हाँव का करू?”

³¹ तिन्ऐं बुलो, “प्रभू यीशू गाशी बिश्वाष करह्, तअ तू अरह् तेरा बादा घराना मुँक्त्ति पाला।”

³² अरह् तिन्ऐं तेसी अरह् तेस्के बादे घराने के लोगो खे प्रभू का बचन शुँणाँया।

³³ रात्ती तेसी ही बख्त्ते तेने ठाँणेंदारे ऐ संत्त-पौलुस अरह् सीलास के घाव धुऐ, अरह् तिन्ऐं आप्णें बादे कुड़बे आरी तेख्णीं नहाँण-नहाँव।

³⁴ तबे तेने ठाँणेंदार ऐ तिनू आप्णे कागी नींऐं अरह् तिनखे भोजन बंणाँया, अरह् बादे घराँने सहमेंत्त पंण्मिश्वर गाशी बिश्वाष करियों मंजा करा।

³⁵ जबे रात्त बियाऐयों देस हुओ, अरह् तेने हाकम ऐ सपाही कैई शुज़ा भेजा, के तिनू आदमी छुड़ी दियो।

³⁶ तबे तेने ठाँणेंदारे ऐ सेजी बातो संत्त-पौलुस कैई बुली, के “हाकम ऐ तुँओं छुड़ी देणों की अज्ञाँ देऐ थऐ, ईन्देंखे ऐबे सोंऐं करियों ज़ाओ।”

³⁷ परह् संत्त-पौलुस ऐ तेस्खे बुलो, “आँमें जू रोमी आदमी असो, बिना दोष-ईल़्जाँम के आँमों लोगो के सहाँम्णिऐ आँमों माँरे, अरह् कंय्दी दे पाँऐ दित्ते। अरह् ऐबे आँमों चुप-चाँण छ़ूड़ी लुऐं? ऐष्णों ने हंदी; परह् ऐबे से आँमों आपु आऐयों ईथै शे बाँईडे नींला।”

³⁸ तबे सपाईऐं ऐजी बातो हाकमों कैई बुली, अरह् ऐजो शुँणियों के से रोमी असो तअ सेजा हाकम डरी गुआ,

³⁹ तबे तेने हाकम ऐं आपु आऐयों तिनू ढह्लियाऐयों बुलो, के “हे श्री माँन! ऐसी नंगर शे आगू ज़ाव।”

⁴⁰ संत्त-पौलुस अरह् सीलास कंय्दी शे नीक्ल़ियों लुदिया कागी हुटे, अरह् तिन्ऐ बिश्वाषी भाऐ-बंईणों शी भेंट-मील करियों शाँण्त्ति दिती; अरह् तबे से तेथै शे आगु हुटे।