प्रेरितो कै काम 14 - Sirmouri

इकुनियुम नंगर दे संत्त-पौलुस अरह् संत्त-बरनबास

¹ इकुनियुम नंगर दी ऐशी घट्णाँ घटी: के संत्त-पौलुस अरह् संत्त-बरनबास ऐ यहूदियों के चौत्रे दे हुटे, अरह् ऐशा बखाँण करा; के यहूदी, अरह् यूनानी, दुईन्नें बैजाऐ भहित्ते लोग बिश्वाषी बंणें।

² परह् जिनू यहूदियों ऐ बिश्वाष ने करी, तिन्ऐं गऐर-यहूदी लोग भड़काऐ; अरह् तिनू लोगो के मंन दा, बिश्वाषी भाऐ-बंईणों खे बिरूध पय्दा करा के से तिनके बंऐरी बंणीं गुऐ।

³ संत्त-पौलुस अरह् बरनबास बैजाऐ देसो तोड़ी तेथै रूऐ, अरह् प्रभू गाशी भोर्षा करियों, नींडर हऐयों प्रचार कर्दे रूऐ; अरह् प्रभू ऐं भे तिनके हाथै बैजाऐ चींह्न-चंम्त्तकार देखाऐयों आप्णीं कृपा की खुषख्बरी का नंतिजा देखाया।

⁴ अरह् तेथै नंगर-नंगर दे लोगो मुँझी फूट पढ़ियों; दो गुट बंणें कुछ लोग यहूदी के ढबे अरह् कुछ लोग प्रभू यीशू के खास-चैले के ढबे हऐ गुऐ।

⁵ जबे गऐर-यहूदियों अरह् यहूदियों के हाक्में ऐ मीलियों खास-चैले की गईलो बुरा बर्ताव करणाँ, अरह् तिनू गाशी पथराव कर्णों की कोशिष करी।

⁶ परह् जेई संत्त-पौलुस अरह् संत्त-बरनबास कैई ईयों बातो का पता लागा; तेई से तेथै शे लुकाउनिया के लुस्त्रा अरह् दिरबे जैष्णें नंगरोंह् शे उडे-पुडे के ईलाके दे भागियों बंची गुऐ।

⁷ तेथै भे से खुषख्बरी का प्रचार कर्दे गुऐ।

संत्त-पौलुस अरह् संत्त-बरनबास लुस्रा अरह् दिरबे दे

⁸ लुस्त्रा नंगर दा ऐक आदमी बईठा अंदा थिया, जेस्की बाँगणी शूक्की रंही थी, से तेष्णा ही पय्दा हुआ थिया, अरह् से हाँड्णों के तअ सार भे जाँणों ने थिया।

⁹ तेने आदमी ऐ संत्त-पौलुस कैई शे बचन शुँणी लुऐ थिऐ, तबे संत्त-पौलुस ऐ तेस्की ढबे निजाऐयों देखो के ऐस्के मंन दा चाँग्गै हणों का बिश्वाष असो।

¹⁰ संत्त-पौलुस ऐ जूराल़ो बुलो, “आप्णी बाँगणी के सहारे सीधा खह्ड़ा हों” से ऊष्टियों आप्णी बाँगणीं के सहारे खह्ड़ा हुआ, अरह् ऊडा-पुडा हाँडा।

¹¹ जबे लोगे ऐं ऐजो देखो, तअ से आप्णीं लुकाउनिया भाषा दो जुराल़ों बुल्दे लागे; “देखो, कुँऐं देव्ता अमाँरे बीच दा आदमी के रूप-भेंषों दा आऐ रूवा।”

¹² सेजे लोग संत्त-बरनबास खे ज्यूस, अरह् संत्त-पौलुस खे हिरमेस बुल्दे लागे, (संत्त-पौलुस खे हिरमेस ईन्देंखे बुला, के से मुँख्या बखाँण कर्णो वाल़ा थिया।)

¹³ नंगर शी बाँऐडी दाँई ज्यूस देव्त्ते के देऊँठी थी, अरह् तेथै का पुज्जगी फुलों की माँल़ा लई बाकरा साथी आँणियों फाट्क खल़ी कैई पंह्ईचा; से तिनू बैजाऐ बै-शुमाँर लोगों की भीड़ आरी तिनखे बल़ी चड़ाँणी चहाँव थिया;

¹⁴ परह् जबे तिनू खास-चैले बरनबास अरह् पौलुस ऐ ऐजो शुँणों, तिन्ऐं पंण्मिश्वर की निदया कर्णों के बिरूध दे आप्णे खट्णों ऊपाड़े अरह् लोगो की भीड़ो मुँझी घुसरियों जूराल़ो बुल्दे लागे,

¹⁵ “ओ, प्यारे दोस्त्तो! तुँऐं ऐजो का करी लो? आँमें भे तअ तुँओं ही जेष्णें सुख्ह-दु:ख्ह भोगणों वाल़े आदमी असो: ईथै आँमें तुँओं कैई शे खुषख्बरी शुँणाँदे आऐ रूऐ, के तुँऐं ईनू बै-कार की बातो शे पाछू फीरियों तेसी जींऊँदे पंण्मिश्वर के ढबे फिरो; जेने स्वर्ग, धर्ती, संमुन्द्र, अरह् ईन्दों जुण्जो किऐ असो ऐ सेजो सब-कुछ आप्णे ही हाथै बादो बंणाँऐ थुओं।

¹⁶ तेने पुराँणें ज़ूगौ दी बादी जात्तियों खे आप्णी-आप्णी बाटो दी ज़ाणों दिती।

¹⁷ परह् तुँओं तेने आप्णी गुवाऐ-शाज़्त्त दिऐ बीना ने छुड़ी; किन्देंखे के तेने तुँवारी गईलो भलाऐ करी थंऐ; अरह् तुँओं खे तेने अस्माँनों शी बर्षा दिती, अरह् बख्त्तो-बख्त्तो दी तुवाँरी जिम्मी की शाख्ह खे बर्षा दिती, के तुवाँरे पेटो खे भोजन दियों, अरह् तुवाँरे मंन खुषी शे भरी दित्ते।”

¹⁸ ऐजो बुलियों तिन्ऐं लोग बैजाऐ मुष्किल-कंठ्णाँई शे हट्ठीं रूके; के ऐजे लोग कोद्दी आँमों खे किऐ बल़ी ने चड़ाँव।

¹⁹ परह् अन्ताकिया अरह् इकुनियुम शे कुछ़ यहूदी लोग तेथै आऐ, अरह् तेथै के लोग आप्णी गईलो मिलाऐं दित्ते; अरह् तिन्ऐ संत्त-पौलुस गाशी पथराच़ करी, अरह् तेसी मँरा अँदा जाँणियों नंगर शा झ़िड़ी-खींच़ियों बैरंईम्मीं शा ऊँदा बाईरी ऊँदा फैरकाऐ दिता।

²⁰ जबे चैले संत्त-पौलुस के चौऊँ ढबै कंट्ठै हुऐ, तअ से बादे झ़ुहणें हजों बीऊँजे अरह् तेसी नंगर दे हुटे; अरह् दुज़े के से बरनबास की गंईलो दिरबे खे हुटे।

सीरिया के अन्ताकिया खे पाछू आऐ,

²¹ तिन्ऐ तेसी नंगर दे खुषख्बरी का प्रचार करा, अरह् तबे तेथै बैजाऐ भहित्ते चैले बंणाँऐं; अरह् तिन्दें पाछ़ी से लुस्त्रा अरह् इकुनियुस बाटी अन्ताकिया खे पाछ़ू आऐ।

²² खास-चैले ओकी चैले के मंन पाक्कै कर्दें रंह् थिऐ, अरह् तिनखे से बिश्वाष दे बड़्णों खे हिमम्त्त दियों थिऐ; अरह् से बुलो थिऐ, के आँमों भाँव बैजाऐ दुंख्ह-कल़ेष संह्ऐन कर्णें पड़ले; तबे भे आँमें पंण्मिश्वर के राज्य दे जरूर ज़ाँदे।

²³ संत्त-पौलुस अरह् संत्त-बरनबास ऐ ऐक नाँम कलीसिया दे तिनखे बुड़े बुजूरग चूणें-छाँटे, अरह् बरत्त आरी प्रार्थना करियों तिनू प्रभू के हाथों दे देंऐ दिते, जिनका तिन्ऐं बिश्वाष करा थिया।

²⁴ तबे से पिसिदिया ईलाके बाटी से पंफूलिया ईलाके दे पंह्ईचें;

²⁵ अरह् पेरगे नंगर दे खुषख्बरी शुँणाँऐयों से अंत्तालिया नंगर दे आऐ,

²⁶ तेथै शे से पाँणी के जहाज दे बड़े नंगर अन्ताकिया खे हुटे, जेथै से तेसी काँम-काज़ खे जुण्जा तिन्ऐं पुरा करा थिया, तेथै से पंण्मिश्वर की कृपा दे दित्ते गुऐ।

²⁷ तेथै पंह्ऊँचियों तिन्ऐं कलीसिया के ऐक खुम्ल़ी बंईठाल़ी, अरह् बुलो; के पंण्मिश्वर ऐं तिनके जाँणें का-का करो, अरह् केष्णें तिन्ऐं गऐर-यहूदियों खे बिश्वाष का दुवार खुलो।

²⁸ अरह् से बैजाऐ बहित्ते देसो तोड़ी आप्णें चैले की गईलो रूऐ।