2 तीमुथियुस 2 - Sirmouri

मसीया यीशू का संत्तिका भगत्त सपाँऐ

¹ ईन्देंखे “हे मेरा बैटा”, तू तेसी कृपा शा जू मसीया यीशू दा असो, तिन्दा बल़वाँन हऐ ज़ा,

² अरह् जू बातो तुँऐं भहीते गुवाह्-शाज़्त्त के सहाँम्णें मुँह कैई शी शुँणी थई, तिनू बातो तेसी ईमाँनदार बिश्वाषी भाई कैई दे; जू ओकी कैई शे भे शिखाँणों ज़ूगा हों।

³ मसीया यीशू के आछे ज़ूद्धै के जेष्णाँ मेरी गईलो दु:ख्ह भोग।

⁴ जबे कुँऐं ज़ूद्धा लड़ाई करदा ज़ाँव, तअ से ऐशी कोशिष करह्; के आप्णें भर्त्ती कर्णो वाल़ा हाकम खुशी करी सको; ईन्देंखे से आपु आप्खे संईसारी के काँम-धाँन्धै दा ने फंशाँदा।

⁵ अरह् जे कुँऐं अखाड़े-ज़ुब्ड़ी दा लड़णों वाल़ा, जे बिद्धी-बिधान शा ने लड़दा तअ तेसी जीत्त को मुँकुट-ताज ने भेंट्दो।

⁶ परह् जुण्जा कुँऐ जिम्दार मेंह्नत्त-कष्ट करह्, तेसी आगली शाख्हों का हिस्सा आगे ही भेटा चेंई।

⁷ जुण्जों किऐ हाँव ताँव्खे बुलू, तिन्दे का ख्याल करह्; अरह् प्रभू ताँव्खे बादी बातो की संह्म्झ देला।

⁸ प्रभू यीशू मसीया चींत्ते थुऐ, जू दाऊद के वंष दे पय्दा हुऐ, अरह् मँरे अँदे मुँझ्शे ऊबे जीऐ; अरह् ऐजो मेरी खुषख्बरी के मुँताबिक असो।

⁹ जिन्देकी ताँईऐं हाँव कू-कर्णी के जिऐ दु:ख भुगतू, जिन्दें के ताँईऐ हाँव कंय्दी भे असो; परह् पंण्मिश्वर का बचन कय्द ने आथी।

¹⁰ ईन्देंके कारण हाँव च़ूंणें-छाटे अंदें लोगो की ताँईऐं सब-कुछ सऐन करू, के से भे तेसी छ़ुट्कारा जुण्जा के मसीया यीशू दा असो; से तेसी भे सदा की बड़ियाई आरी पाँव।

¹¹ ऐजी बात साच्ची असो, के जे आँमें तिनकी गईलो मँरी रूऐ, तअ तिनू आरी आँमें पाछु ऊँबे जीऊँदे भे हंदे;

¹² जे आँमें दु:ख्ह सबैर माँरियों संह्दे भे रंऊँबे: तअ तिनकी गईलो आँमें राज भे जरूर कर्दे; जे आँमें तिनू छुड़ी देऊँबे, तअ से भे आँमों छुड़ी देंदे।

¹³ आँमें भाँव बंईमाँन भे बंणों: तबे भे से ईमाँनदार असो, किन्देंखे के से आप्णा स्वभाव ने बंद्ल़ी सक्दे।

झ़ूट्ठै शिक्क्षा देणों वाल़े शे च़ौक्क्ष रूऐ

¹⁴ ईनू बातो के संहम्झ़ लोगो कैई दें, अरह् प्रभू के सहाँम्णें च़ीत्ते कराँदा रंह्; के से बचन गाशी बाद-बिबाद ने करियाँ करह्, जिन्दें लंई किऐ फ़ाय्दा ने हंदी; परह् शुँण्णों वाल़े ईन्दें लंई बिगड़ी ज़ाँव।

¹⁵ संच्चाई के बचन ठीक-ढ़ंग शे बखाँण करियों, पंण्मिश्वर के ऐशे धारण कर्णो ज़ूगै सेवक बंण्णों के कोशिष करह्; के तिनकी सहाँम्णें शोर्मिन्दो ने हंणों पड़ो।

¹⁶ परह् गाँदे-बुरे बक्बास शा दुरका बंचियों रूऐ; किन्देंखे के ऐशे दाँई लोग बैभगत्ति दे बढ़्दे ज़ाँव,

¹⁷ अरह् ऐष्णीं शिक्क्षा, नींकारों दु:ख्णों जियों बड़्दो ज़ाँव; अरह् सेजै भाऐ-हुमिनयुस अरह् भाऐ-फिलेतुस भे तेष्णें के ही साथी असो,

¹⁸ किन्देखे के सेजे भाऐ ऐजो बुल्दे-बुल्दे के दुज़ाल़िऐ पाछ़ू ऊबो जीऊँणों तअ कंद्दी हंऐ रूओं; अरह् से सच्चाई शे भट्की गुऐ; अरह् पताने तिन्ऐं कैतोड़े का बिश्वाष ऊल़्टा-पुल़्टा करी दिता।

¹⁹ तबे भे पंण्मिश्वर कि पाक्की पह्-नींव अट्ल़ असो, जिन्दें गाशी ऐजी मुँहर-छ़ाप लागीं रंऐ; के “प्रभू तिनू जाँणों ऐं, जुण्जें प्रभू के असो,” अरह् जुण्जा कुँऐं प्रभू का नाँम लों, से अपराध के शा बंचा अंदा रंह्।

²⁰ सैठो आदमी के घरह् दे सिर्फ सुन्नें-चाँदी के ही बाँस्णों ने हंदी, परह् लाकड़ी अरह् माटी के बाँस्णों भे जरूर हों ऐ; कुँऐं-कुँऐं बाँस्णों ईज्जती खे, अरह् कुँऐं-कुँऐं बाँस्णों बर्तोणों खे भे जरूर हों।

²¹ ईन्देंखे जुण्जा कुँऐ आदमी आपु आप्खे ईनू गंन्दिगी शा साफ करी दीयों; तअ से आदर-ईज्जत्त को बाँसोंण, अरह् शुँच़ा-शाँख्ल़ा बंणों; अरह् से आप्णें माँलिक के काँम आँदा, अरह् बादे भले काँम-धाँन्धे कर्णो खे तैयार रंह्दा।

²² परह् तू जवाँनी की हिछ़याओं शा दुरका भाग; अरह् जुण्जी बात पंण्मिश्वर के आच्छ़ी लागो, तिन्दे पाछ़ी चाल। जेष्णें के बिश्वाष, प्यार, अरह् मेल-झोल तिनू आदमी आरी करह्; जुण्जे पंण्मिश्वर कैई साफ़ मंन शी पुकार करह्।

²³ परह् मुँरूख्ता अरह् अजाँण्दे बाद-बिबादों शे दुर्के रूऐ; किन्देंखे के तुऐं जाँणें ऐं, के ईन्दें लई सिर्फ झ़गड़े ही पय्दा हों।

²⁴ किन्देंखे के प्रभू का दास-सेवक झोगड़ू ने हुआ चेंई, परह् से सोभी की गईलो, नंरम, अरह् शिक्क्षा देणों खे जाँणकार; अरह् संह्ऐनशील हुवा च़ेंई;

²⁵ परह् से बिरोध कर्णो वाल़े लोग भे नंरमाँई शे संहम्झ़ाऐ दियों, किन्देखे के ऐजो कुँऐं ने जाँण्दा के कबे पंण्मिश्वर तिनका मंन पंसताँवे लंई बद्ल़ी दियों; अरह् तिनखे भे सच्चाई का ज्ञाँन भेंटी ज़ाँव;

²⁶ अरह् से संक्न्नै-च़ौक्क्ष हऐयों शैतान के तेसी फ़ाँदे-ज़ाल़ शे छ़ुटी ज़ाँव; जेसी जाँल़-फ़ाँदें दे शैतान ऐं आप्णी हिछ़या पुरी कर्णो खे तिनू जक्ड़ी थुऐं।