2 तीमुथियुस 1 - Sirmouri

नंमष्कार

¹ पौलुस के ढबे शे जू, मसीया यीशू दा तेसी जीवन के बाय्दे के मुँताबिक, पंण्मिश्वर की हिछ़या के कारण प्रभू यीशू मसीया का खास-चैला असो,

² प्यारा बैटा तीमुथियुस, के नाँव: अमाँरे पिता पंण्मिश्वर अरह् अमाँरे प्रभू मसीया यीशू की ढबै शे कृपा अरह् कृपा दे शाँण्त्ति भेंटो।

धन्यबाद अरह् दीड़-हिम्मत देणी

³ हाँव रात्त-देस आप्णी प्रार्थनाओं दे तुओं चींत्ते कर्दे पंण्मिश्वर का धन्यबाद करू, जिनकी सेवा हाँव आप्णें शुद्ध बीचार शी तेष्णीं ही करू; जेष्णीं के मेरे पुराँणिऐं करह् थिऐ।

⁴ अरह् तुवाँरे आशुओं का शुज़ा करियों देसो रात्ती ताँव आरी भेंट-मिल कर्णो कि हिछ़या करू, के हाँव आनन्द-खुशी शा भरी ज़ाँऊ।

⁵ मेरे तुवाँरे नीष-कप्ट बिश्वाष चीत्ते आँव, जुण्जा सोभी शा आगे मुँऐ तुवाँरी नाँनीं लोइस अरह् तुवाँरी माँ यूनिके दा देखा थिया; सेजा ही बिश्वाष जरूर तुओं दा भे असो।

⁶ ईन्देंखे हाँव ताँव कैई शो भे चित्ते कराऊँ, के तू पंण्मिश्वर का सेजा बरंदाँन जुण्जा मेरे हाँथ थंणों के कारण ताँव भेंटा तेसी चंम्काऐ दे।

⁷ ऐजो ईन्देंखे के पंण्मिश्वर ऐं आँमों खे डर-भंऐ के ने, परह् शक्त्ति, प्यार, अरह् सऐन के आत्त्मा देऐ थऐ।

⁸ ईन्देंखे अमाँरे प्रभू के गुवाऐ-शाज़्त्त शे, अरह् मुँह शी जू तिनका कय्दी असो; सरमाऐं ने, परह् तेसी पंण्मिश्वर की शक्त्ति के मुँताबिक शी खुषख्बरी खे मेरी गईलो दु:ख्ह भोगणों खे मेरी गंईलो शामिल हऐ ज़ाव।

⁹ जिन्ऐं आँमों खे छ़ुट्कारा दिता, अरह् पबित्र बुलावे लंई बईदे, ऐष्णों अमाँरी काँम-काज़ के कारण ने हई; परह् तिनके ईरादे अरह् तेसी कृपा के मुँताबिक असो, जू मसीया यीशू के कारण ज़ूगौ-ज़ूगौ शा ऊँबा आँमों गाशी हुआ।

¹⁰ परह् ऐबे अमाँरे छुट्कारा देणो वाल़े मसीया यीशू के पर्गट हणों के कारण खुलासा हुआ; तिन्ऐं मंऊँती का नाँष करा, अरह् अमर-जीवन तियों खुषख्बरी के कारण प्रकाष-माँन करी दिता।

¹¹ ईयों खुष्ख्बरी खे मुँह प्रचारक, अरह् खास-चैला, अरह् शिक्क्षा देणो वाल़ा भे बंणाया गुआ।

¹² ऐजा ही कारण असो, के हाँव दु:ख्ह भे संऐन करू, परह् तिन्दा हाँव सरमाँदा ने आथी; किन्देंखे के हाँव ऐजो जाँणू ऐं के मुँऐ कंस्दा बिश्वाष करी थुवा, अरह् मेरे ऐजी पुरी ढैठ असो, के से तेसी देसो तोड़ी मेरी रंक्षा पुरी कर्णों ज़ूगै शक्त्ति शाली असो।

¹³ जुण्जी आच्छ़ी बातो तुँऐं मुँह कैई शी शुँणी थई, तिनू तेसी बिश्वाष अरह् प्यार आरी, जू मसीया यीशू दा असो; तिनू आप्णीं ताँईऐ ऐक नंमुँने के तोर दे च़ींत्ते थुऐ।

¹⁴ पबित्र-आत्त्मा के कारण, जिनका आँमों दा बास असो, तियों पबित्र-आत्त्मा की मंद्दत्त शी जुण्जी अंनमोंल खुष्खबरी तुओं कैई देऐ थंऐ, तिन्दें की आच्छ़ी रंख्वाल़ी करे।

¹⁵ तुओं कैई ऐजा तअ पता ही हंला, के आसिया ईलाके के बादे बिश्वाषी भाऐ लोग मुँह शे दुर्के हऐ गुऐ; अरह् तिन्ही मुँझी भाऐ-फूगिलुस अरह् भाऐ-हिरमुगिनेस भे असो।

¹⁶ भाई-उनेसिफुरूस के घराने गाशी प्रभू दया-रंय्म करह्, किन्देंखे के तेने कई बई मेरे जीयों दी शैल़ाऐ पाड़ी थऐ, किन्देंखे के से मुँह्दा तबे भे सरमाई ने जबे हाँव कय्दी दा थिया।

¹⁷ परह् जबे से रोम दा आया, तअ बड़ी कोशिष करियों से जुईयों मुँह कैई शा भेंट-मील करदा आया।

¹⁸ (प्रभू ऐशो करह्, के तेसी देसे तेसी गाशी दया-रंय्म हों)। अरह् जुण्जी-जुण्जी सेवा तेने इफिसुस दी करी, तियों भे तू आच्छ़ी ढंग शी जाँणें।