2 थिस्सलुनीकियों 2 - Sirmouri

नाँषू बैटा

¹ हे भाऐ-बंईणों, ऐबे आँमें आप्णे प्रभू यीशू मसीया के आणों गाशी, अरह् तिन कैई कठै हणों के बारे दी तुँओं खे ढाल-अरज करह्,

² के कोसी आत्त्मा के बचन के कोसी पंत्री के जाँणें, जुणजी के अमाँरी ढबै शी जेऐ हों; ऐजो जाँणियों के प्रभू को देस आऐ पुझ़ों; ईन्दें लंई तुवाँरा मंन डामाँडोल ने हों, अरह् ना तुऐ डरह्।

³ कैशे ही भी दाँई तुँऐं कोसी के धोखे दे ने आऐं, किन्देंखे के सेजो देस ताँव-तोड़ी ने आँदी, जाँव तोड़ी लोग पंण्मिश्वर शे दुर्के ने हुऐ ज़ाँव, अरह् सेजा पाप का नाँशू बैटा पर्गट ने हों।

⁴ से आपु खे बादी चींजो शा बड़ा बंणदा, अरह् बिरूध करला, तिनका जू पंण्मिश्वर के आदर्णिऐं असो, अरह् से पंण्मिश्वर की देऊँठी दा बऐठियों आपु-आप्खे पंण्मिश्वर बुल्दा।

⁵ कियों तुवाँरे चिते आथी ने, के जबे हाँव तुवाँरे कागी थिया, तअ तुँओं कैई ऐजी बातो बुलिया करू थिया?

⁶ तुँऐं तियों चीज जाँणों, जिऐ तिनू हेभी तोड़ी रूकी थुऐ, जू से आप्णे ही बख्ते पर्गट हों।

⁷ किन्देंखे के अधर्म का भैंद् हेभी भे काँम-काज़ करदा रंह्, परह् हेभी ऐक रूकणों वाल़ा असो; अरह् जाँव तोड़ी से दुरका ने हंऐ ज़ाँव, ताँव तोड़ी से रूकियों थंदा।

⁸ तबे सेजा पापी आप्णी बादी शक्त्ति शा पर्गट हंदा, जेथू प्रभू यीशू आप्णें मुँह शी फ़ूको माँरियों माँरी देंदे; अरह् आप्णें आँणों के त्तेज शा भंस्म करी देंदे।

⁹ तेसी पापी की आँवणीं शैतान के काँम-काज़ के मुँताबिक हंदी, मतल्व से झूठी शक्त्ति, अरह् चीह्न-चंम्त्तकार आरी;

¹⁰ अरह् नाँष हंणों वाल़े खे अधर्म के साँत-भाँते, छल़-कप्ट आरी हंदा; किन्देंखे के तिन्ऐ संच्चाई शो प्यार ने करी, जिन्दें लंई तिन खे छुट्कारा भेंट्दा।

¹¹ ईन्देंखे पंण्मिश्वर तिनू मुझी ऐक भट्काणों वाल़ी शक्त्ति डेयाल़्दा, के से झ़ूठै गाशी बिश्वाष करह्।

¹² जै-तोड़े लोग सच्चाई का बिश्वाष ने कर्दे, परह् से अनियाँई शे खुशी हों, से बादे सजा पाँदे।

पाक्कै बंणों

¹³ हे भाऐ-बंईणों, अरह् प्रभू के प्यारे लोगो, ऐशो हुओ चेंई के आँमें तुवाँरे बारे दे सदा पंण्मिश्वर का धन्यबाद कर्दे रंह्, किन्देंखे के पंण्मिश्वर ऐ शुरू शे ही तुँओं च़ूणीं-छाँटी थुऐ; के पबित्र-आत्त्मा के जाँणें पबित्र बंणियों, अरह् सच्चाई का बिश्वाष करियों मुँक्त्ति पाँव,

¹⁴ जिन्दे खे तिन्ऐ तुँओं अमाँरी खुषख्बरी खे बय्दी थुऐ, के तुँऐं अमाँरे प्रभू यीशू मसीया दे बड़ियाऐं पाँव।

¹⁵ ईन्देंखे हे भाऐ-बंईणों, पाके रंह्; अरह् जू-जू बातो तुँऐं भाव बचन शी के पत्री शी आँमों कैई शिखी थई, तिनू पाकड़ी अंदी थुऐ।

¹⁶ अमाँरा प्रभू यीशू मसीया आपु ही, अरह् अमाँरा परंम-पिता पंण्मिश्वर, जिन्ऐं आँम शो प्यार करह्, अरह् कृपा शे सदा की शाँण्त्ति अरह् पबित्र भोर्षा देऐ थुवा।

¹⁷ तुवाँरे सासो दी शाँण्ति दियों, अरह् तुँओं ऐक नाँम आच्छ़े काँम-काज़ अरह् बचन दे पाक्कै करह्।