2 थिस्सलुनीकियों 1 - Sirmouri

नंमष्कार

¹ संत्त-पौलुस अरह् सिलवानुस अरह् तीमुथियुस के ढबे शी थिस्सलुनीकियों की कलीसिया खे, जू अमाँरे परंम-पिता पंण्मिश्वर अरह् प्रभू यीशू मसीया दे असो:

² अमाँरे परंम-पिता पंण्मिश्वर अरह् प्रभू यीशू मसीया के ढबे शी तुँओं खे कृपा अरह् शाँण्त्ति भेंट्दी रंह्।

नियाँव को देस

³ हे भाऐ-बंईणों, तुवाँरे बारे दा आँमों हर बख्ते पंण्मिश्वर का धन्यबाद करणा पड़ो, अरह् ऐजो ठीक असो, ईन्देंखे के तुवाँरा बिश्वाष बैजाऐ बढ़दा ज़ाँव, अरह् तुँओं सोभी को प्यार आपु मुझी बैजाऐ बढ़दो लागो।

⁴ ऐथै तोड़ी के आँमें आपु पंण्मिश्वर की कलीसिया दो तुवाँरे बारे दा तारीफ करह्, के जै-तोड़े कल़ेष अरह् कठणाँऐं तुँऐं सऐन करी, तिन्दे लई तुवाँरा धीरज अरह् बिश्वाष पर्गट हों।

⁵ ऐजा पंण्मिश्वर के साच्चै नियाँव का साफ परमाँण असो, के तुँऐं पंण्मिश्वर के राज्य ज़ुगे बणों, जिन्देकी ताँईऐं तुँऐं दु:ख्ह भे भूगो।

⁶ किन्देंखे के पंण्मिश्वर के नंजीक ऐजा नियाँव असो, के जू तुँओं खे कल़ेष दियों, तिनखे बद्ल़े का कल़ेश दिया ज़ाँदा।

⁷ अरह् तुँओं जू कल़ेष भेंटो, तुऐ अमाँरी गईलो चऐनं शे; तेसी बख्ते जबे के प्रभू यीशू आप्णे शक्त्तिशाली दूत्तों की गईलो, भभ्कदी आगी शे स्वर्गो शे पर्गट हले,

⁸ अरह् जू पंण्मिश्वर ने पछयाँणदे, अरह् अमाँरे प्रभू यीशू की खुषख्बरी ने माँन्दे, तिनूशा से बद्ल़ा लोंदा।

⁹ से प्रभू के सहाँम्णें अरह् तिनकी शक्त्ति के तेज शे दुर्कें हऐयों सदा खे नाँष की सजा पाँदे।

¹⁰ ऐजो तेसी देसे होंदो, जबे से आप्णे पबित्र लोगो शी बड़ियाऐ अरह् बादे बिश्वाष कर्णें वाल़े मुँझ़ी हेरानी के कारण आँदे; किन्देंखे के तुँऐं अमाँरी गुवाह्-शाज़्त्त गाशी बिश्वाष करा।

¹¹ ईन्देंखे आँमें तुँओं खे सदा प्रार्थना भे करह्, के अमाँरा पंण्मिश्वर तुँओं ईयों बुलाट ज़ूगै सम्झो, अरह् भलाई की बादी हिछा अरह् बिश्वाष की बादे काँम-काज़ के शक्त्ति शी पुरी करह्,

¹² जू अमाँरे पंण्मिश्वर अरह् प्रभू यीशू मसीया की कृपा के मुँताबिक शा, हमारे प्रभू यीशू को नाँव, तुँओं दे बड़ियाऐं पाँव, अरह् तुँऐं तिनूदी बड़याऐ पाँव।