2 पतरस 3 - Sirmouri

प्रभू की आँवणीं को देस

¹ हे प्यारे साथियों, ऐबे ऐजी दुज़ी पत्री असो, जू मुँऐं तुँओं खे लिखी लऐ, ईनू दुई पत्री दो ऐजो चित्ते कराऐयों मुँऐं तुवाँरे पबित्र मंन दो चित्ते कराणों का जत्तन करी थुवा,

² जू तुँऐं पबित्र ऋषियों के जाँणें आगे ही बुली गई, अरह् तबे प्रभू यीशू के खास-चैले के जाँणें आँमों खे छूट्कारा देणों वाल़े के जाँणें दिती गई अज्ञाँ-निय्म तुवों कैई शे हजो चींत्तै कराऐ ज़ाँव।

³ आगे तुँऐं ऐजो जाँणी पाव, के आखरी के देसो दे हस्णों वाल़े, अरह् ठाठे पाड़णों वाल़े, आँले जू आप्णी ही बुरी हिछ़या के मुँताबिक चाल्दै

⁴ जुण्जे ठाटे पाड़ियों ऐजो बुल़्ले के “कियो रे प्रभू के दुज़ाल़िऐ आँणों के बाय्दें को का हुवो? अमाँरे बुड़े बुजूरग बुढ़ाईको शो ऊबो ऐष्णो ही सब-कुछ चाली रंहो, जेष्णों के संईसारी के शुरू शो ऊबो थियों?”

⁵ किन्देंखे के से तअ जाँणी बुजियों ऐजो बिसरी गुऐ, के पंण्मिश्वर के बचन के जाँणें अस्माँन ज़ूगौ शो ऊबो ऐत्लो तोड़ी अट्ल़ असो, अरह् धर्ती भी पाँणी मुँझ्शी बंणी अरह् ऐत्लो भे पाँणी मुँझी अट्ल़ असो,

⁶ ईन्दी के जाँणें तेसी ज़ूगौ के संईसारी भे पाँणी दी ढुबियों नाँष हऐ गऐ थी, परह् ऐसी ज़ूगौ को असमाँन अरह् धर्ती तेसी ही बचन के जाँणें ईन्देंखे थऐ थुवों, के फुकियों नाँष करी ज़ाव।

⁷ परह् ऐजो अस्माँन अरह् धर्ती तेसी ही बचन के जाँणें ईन्देंखे थऐ थुऐ, के जल़ाऐ ज़ाव; अरह् तिनू नाँस्त्तिक आदमी का नियाँव अरह् नाँष हंणों के देसो तोड़ी ऐशे ही थुऐ ज़ाले।

⁸ हे प्यारे साथियों, ऐजी बात तुँओं शी चुप्पी ने रंह्, के प्रभू कैई ऐक देस भे हजार सालो जै-तोड़ो हों; अरह् हजार साल भे ऐक देस जियो असो।

⁹ प्रभू आप्णा बाय्दा पुरा कर्णो खे बैरियाँदे ने, जेष्णा के कुछ लोगो का बिचार असो, परह् से तुवाँरें बारे दा सबैर करह्, अरह् से ऐजो चहाँदा ने, के कुँऐं नाँष हों, परह् ऐजो चहाँव के सोभी खे आप्णें मंन बद्ल़ों का मुका भेटो।

¹⁰ परह् प्रभू को देस चुप्पी चोर जिया आँदा, तेसी देसे अस्माँनों दी बैजाऐ बैशुमाँर-बड़ी-बडी गुड़ाको लई अस्माँन लुप्त होंदो, अरह् अस्माँनों के ग्रह्-पीन्ड आगी लई पगल़ी ज़ाँदे, अरह् धर्ती अरह् धर्ती गाष्ली बादी चींजो अरह् काँम-काज़ जल़ी ज़ाँदी।

¹¹ जबे के बादी चींजो ऐशी दाँई पीगल़्णों वाल़ी तअ तुऐ पबित्र चाल-चलण, अरह् भग्त्ति दे कैशे आदमी हुऐ चैई,

¹² परह् तुँओं पंण्मिश्वर के तेसी देसो की बाट कैशी दाँई जुहणी पड़ो, अरह् तिनके शिघै आँणों की ताँईऐं कैष्णी कोशिष कर्णी पड़ो। जिन्दे के जाँणें असमाँन आगी लई पगल़ी ज़ाले, अरह् असमाँनों के ग्रह-पीन्ड भभ्कियों तप्पियों गल़ी ज़ाले।

¹³ परह् परमं-पिता पंण्मिश्वर के बाय्दे के मुँताबिक आँमें ऐक नुवों अस्माँन अरह् नऐं धर्ती का भूर्षा करह्, जिन्दा धार्मिक्त्ता बास कर्ली।

बीऊँजी अरह् तियार रूवे

¹⁴ ईन्देंखे, हे प्यारे साथियों, जबे के तुँऐं ईनू बातों का भूर्षा थह्, तअ कोशिष करह् के तुँऐं शाँण्त्ति शे तिनके साम्णें निरदोष-बै-कसूर भेटे चैई,

¹⁵ अरह् अमाँरे प्रभू का सबैर मुँक्त्ति जाँणों, जेष्णाँ अमाँरे प्यारे भाऐ संत्त-पौलुसे भे तेसी ज्ञाँन के मुँताबिक जू तेसी भेटा, तेने तुँओं खे भे लिखी थो।

¹⁶ तेष्णीं ही तिन्ऐ आप्णी बादी पत्री दी भे ईनू बातो की चर्चा करी थऐ, जिन्दी किऐ बातो ऐशी असो, जिनू सम्झणी कठीण असो, अ-ज्ञाँनी अरह् चंचल लोग तिन्दे का मतल्व भे पबित्र-ग्रन्थो की ऊकी बातो जेई खींची-ताँणियों आप्णे ही नाँष का कारण बंणाव।

¹⁷ ईन्देंखे हे प्यारे साथियों, तुँऐं लोग आगे ही ईनू बातो जाँणियों च़ौक्क्ष रंह्, जू अ-धर्मी-पापी के जाल़ो दे फशियों आप्णी दृड्ता आप्णें हाथे ने गुवाँल़ों।

¹⁸ परह् अमाँरें प्रभू अरह् बंचाँणों वाल़े, प्रभू यीशू मसीया की कृपा अरह् पछ़याँण दे बढ़्दे ज़ाव। तिन्ही की बड़ियाऐ ऐबे भे हों; अरह् सदा ज़ूगौ-ज़ूगौ तोड़ी हंदी रंह्। आमीन।