2 यूहन्ना 1 - Sirmouri

नंमष्कार

¹ मुह ठग्ड़ै की ढबे शी तिनू चूणीं-छाँटी अंदी तिरंई अरह् नहाँन्ड़िया के नाव, जिन शो हाँव साच्चो पियार थंह्ऊँ; अरह् सिर्फ हाँव ही ने, परह् सेजे बादे भे पियार थंह् जू सच्चाऐ जाँणो ऐ;

² सेजी सच्चाऐ जू आँमों दी पाक्की रंह्, अरह् सदा-सदा अमाँरी गईलो अट्ल़ रंह्दी;

³ परंम-पिता पंण्मिश्वर अरह् तिन का प्रभू यीशू मसीया की ढबे शी कृपा अरह् शाँण्त्ति, सच्चाऐ अरह् पियार आरी रंह्दी।

सच्चाई अरह् पियार

⁴ तुवाँरे नहाँन्ड़िया दे कऐयों सच्चाई के सभाव दे:ख्णा मुँखे बैजाऐ खुशी का कारण असो, ऐजो ठीक ऐष्णों ही असो, जैष्णों के आँमों खे पिता की अज्ञाँ असो।

⁵ हे तिरंई, मेरी ताँव खे ऐजी ढाल-अरज असो: के आँमों मुँझी आपु आरी पियार हुवों चैई, ऐजी मुँऐं तुँओं खे किऐ नंऐं अज्ञाँ ने लिखी लई, परह् ऐजी सेजी ही अज्ञाँ असो, जुण्जी आँमों खे शुरू शी ही ऊबी देऐ थऐ।

⁶ अरह् पियार ऐजो असो, के आँमें पंण्मिश्वर की अज्ञाँ के मुँताबिक चालो; ऐजी सेजी ही अज्ञाँ असो; जू तुँऐं शुरू शी ही ऊबी शुणी थंऐ, अरह् से ऐजो असो, के तुँओं पियार की बाटो दो चाल़्णों पड़ो।

⁷ संईसारी दे कऐयों दुरताँणों-भड़काँणों वाल़े चाल पड़े, जू ऐजो माँन्दा ने के प्रभू यीशू मसीया देह्-धारण करियों आमों मुझी आऐ; अरह् ऐष्णा आदमी दुष्ट हों, जू ओकी सच्चाई की बाटो शे भरमाँऐयों भटकाऐ दियों, सेजा मसीया का बिरूधी बऐरी असो।

⁸ आप्णे बारेदे च़ौक्क्ष रंह्, के जू मेंह्नत्त आँमें करी थऐ, सेजी तुँऐं गुवाऐ ने दियों, परह् तिन्दे का आछ़ा फल़ पाँव।

⁹ जुण्जा कुँऐं मसीया की शिक्क्षा के दाएरे दा ने रंह्दा, अरह् तैसी दाएरे शा बाऐरा ज़ाँव, तैसी कद्दी भे पंण्मिश्वर ने भेट्दी, परह् जुण्जा कुँऐं तियों शिक्क्षा के दाएरे दा रंह्; तैस कैई स्वर्गो का पिता भे असो, अरह् तिनका बैटा भे असो।

¹⁰ जे कुँऐं तुँओं कैई आँव, अरह् ऐजी ही शिक्क्षा ने दियों, तअ तैसी ना तअ भीटा घर दा आँणों दिऐ, अरह् ना तैस्खे नमंष्कार करे।

¹¹ किन्देंखे के जू कुँऐं ऐष्णे आदमी खे नमंष्कार करह्, से तैस्की बुरी काँम-काज़ दा तैस्का साजी बंणी ज़ाँव।

आखरी बात

¹² मेरे बैजाऐ बातो तुँओं खे लिख्णी ऐ, परह् हाँव कागत्त अरह् सियाही लई लिख्णों ने चहाँदा; परह् हाँव ऐजा भूर्षा करू, के हाँव आपु तुँओं कैई आऊँबा, अरह् आप्णें आँम्णें-सहाँम्णें तुँओं आरी बात-चीत्त करूबा जिन्दे लई आँमों सोभी की खुशी पुरी हों।

¹³ तुँवारी चूणीं-छाँटी अंदी बंईणों के नहाँन्ड़िया भे तुँओं खे नमंष्कार करह्।