2 कुरिन्थियों 8 - Sirmouri

दिल शो दाँण देणों

¹ ऐबे हे भाऐ बंईणों, आँमें तुँओं खे पंण्मिश्वर की तियों कृपा की खुषख्बरी दियों, जुण्जी मकिदुनिया की कलीसियों गाशी हंऐ।

² बैजाऐ दु:ख-क्ल़ेष के परख दी तिनकी बड़े आँनन्द अरह् बैजाऐ कंगाली दी देंण बंडी।

³ तिनके बारे दी मेरी ऐजी गुवाऐ-शाज़्त असो, के तिन्ऐं आप्णी शरदा शो अरह् आप्णी शरदा शो भे जादा मंन खुलियों दितों।

⁴ अरह् तैसी दाँण दो अरह् पबित्र लोगो की सेवा दे हिंस्सेदारी हंणों की कृपा के बारे दी, आँमों कैई बार-बार बैजाऐ ढाल-अरज करी,

⁵ अरह् जैष्णाँ आँमें भुर्षा करा थिया, तैष्णा ही ने, परह् तिन्ऐं प्रभू खे हजो पंण्मिश्वर की हिछ़्या शे आँमों खे आपु आप्णें आप संमर्पित्त करी दित्ते।

⁶ ईन्देंखे आँमें भाऐ तीतुस खे भे ऐजी सलाह् दिती, के जैष्णों तुँऐं आगे शुरू करो थियों, तैष्णी ही तुँओं मुँझी भी दाँण देणों की टह्ल पुरी करह्।

⁷ ईन्देंखे जैष्णें तुँऐं बादी बातो दे मतल्व बिश्वाष, बचन, ज्ञाँन, अरह् ओकी कोशिष दे, अरह् तेसी पियार दे जू आँमों आरी करह्, तैष्णें ही तुऐं मंद्दत कर्णो वाल़े दाँण देणों के काँम-काज़ दे भे बड़दें ज़ाव।

⁸ हाँव अज्ञाँ के हिसाब शे ने, परह् ओकी के होंस्ले शे तुवाँरे पियार की सच्चाई की परख खे बुलू।

⁹ तुँऐं अमाँरे प्रभू यीशू मसीया की कृपा जाँणों ऐ, के से धनी-सेठ हऐयों भे तुँवारी ताँईऐं कंगाल बणे, जू तिनके कंगाल हणों शे तुँऐं सैठ बंणी ज़ाँव।

¹⁰ ईयों बातो दी मेरी ऐजी सलाह् असो: के तुँओं खे ऐजो आछो असो; के तुँऐं पाछ़ली साल दाँण देंणों की हिछ़या दे, भे सोभी शे आगे थिऐ, अरह् दाँण देणों खे भे सोभी शे आगे हुऐ चेंई।

¹¹ ईन्देंखे ऐबे ऐजी टह्ल पुरी करह्, के जैष्णी दाँण देणों की हिछ़या दे तुँऐं तियार थिऐ; तैष्णी ही आप्णी आँम्दणी के हिसाब शी पुरी करह्।

¹² किन्देंखे के जे मंन की हिछ़या हों, तअ दाँण तिन्दें के मुताबिक धारण भी करो ज़ाँव, जुण्जों तैस कैई असो ऐ, ना के तिन्दें के मुताबिक जुण्जो तैस कैई आथी ने।

¹³ अमाँरा मतल्ब ऐजा ने आथी, के ओकी की भलाई की ताँईऐं आपु खे दु:ख-कल़ेष खड़े करह्, परह् अमाँरा मतल्व ऐजा असो, के बादे लोग बराबर ऐक भाँत्ते बंणों,

¹⁴ ऐसी बख्ते तअ तुँवारी बड़ोत्री तिनकी जरूरत पुरी कर्णो खे बैजाऐ असो; परह् कोद्दी ऐशो ने हईयों के तुवाँरे भे जरूरत पड़ो, अरह् से भे तुँवारी सहाऐता करह्, तबे तुऐं दुईने ढूंग ऐक-भाँते बराबर हंदे।

¹⁵ जैष्णों पबित्र-ग्रन्थों दो लिखी थोह्, “जेने बैजाऐ सलाव तैसी भे भहितों ने भेंटी; अरह् जेने ठिक्को सलाव तैस्के भे कम्मीं पड़ी ने।”

तीतुस के सेवकाऐ

¹⁶ पंण्मिश्वर का धन्यबाद हों, जिन्ऐं सेजा होंस्ला तीतुस के सासो दा पाऐ थिया।

¹⁷ के तेने अमाँरा संम्झाँणा माँनी पाया, परह् बैजाऐ खुशी हऐयों से आप्णी हिछ़या शा तुँओं कैई आया।

¹⁸ आँमें तैस्की गईलो तैसी भाऐ भे डियाल़ी थुवा; जैस्को नाँव खुषख्बरी के बारे दो बादी कलीसियों दो फईलो अंदा असो;

¹⁹ अरह् ऐत्ती ने, परह् से कलीसियों दा जाँणा-गीणा असो; के ऐसी दाँण की काँम-काज़ खे अमाँरी गईलो डियाल़ा ज़ाँव। आँमें ऐजी सेवा ईन्देंखे करह्, के प्रभू के बड़ियाऐ अरह् सहाय्ता-मंद्दत कर्णो खे अमाँरे मंन की तियारी भे पर्गट हऐ ज़ाँव।

²⁰ आँमें ईयों बातो दे चक्क्ष रंह्, के ऐजी अछाई की टह्ल-काम के बारे दी जिनकी सेंवा आँमें करह्, कुँऐं आँमों गाशी दोष-ईल़जाम ने लाँव।

²¹ किन्देंखे के जुण्जी बातो सिर्फ प्रभू ही के नंजीक ने, परह् आदमी के साम्णें भी भली असो, आँमें तिन्दे का फिकर करह्।

²² आँमें तैस्की गईलों आप्णा भाऐ भे डियाल़ी थुवा, जैसी आँमें बार-बार पर्खियों भहिती बातों दा होंस्लै दा भरा अंदा पाया; परह् ऐबे तुँओं गाशी तैस्के बैजाऐ भूर्षा असो, ईन्देंखे से बैगेही होंस्ले दा असो।

²³ जे कुँऐं तीतुस के बारे दो पुछो, तअ से मेरा साथी अरह् तुँवारी ताँईऐं मेरा साजी असो; अरह् जे अमाँरे भाऐ के बारे दो पुछो, तअ से कलीसियों के डियाल़े अंदे, अरह् मसीया की बड़ियाऐ असो।

²⁴ तअ: आप्णों पियार अरह् अमाँरे तारीफ जू तुवाँरे बारे दे असो, कलीसियों के साम्णें साच्चा करियों तिन कैई शा दे:खाव।