2 कुरिन्थियों 6 - Sirmouri

¹ आँमें जू पंण्मिश्वर के साजी असो, ऐजो भे सम्झों ऐ, के तिन्की कृपा जू तुँओं गाशी हऐ, तियों बै-कार ने ज़ाणों दियों

² किन्देंखे के से बुलो, “आप्णी खुशी के बख्ते मुँऐं तेरी शुणी थई, अरह् छुट्कारे के देसे मुँऐं तेरी सहाऐता-मंद्दत करी” दे:खो, हेभी ऐजा खुशी का बख्त असो; दे:खो, हेभी छुट्कारे को देस असो।

³ आँमें कोसी भी बातो दी ढेस-ठूकर लागणों का मुक्का ने देंदे, जू अमाँरी सेवा दा किऐ दोष-ईल़जाम ने लागो।

⁴ परह् हर बातो दे पंण्मिश्वर के दासो की जिऐ आप्णें आछे गुण पर्गट करह्, बैजाऐ सबेर शे कल़ेष दे गरीब दे, कष्टो दे,

⁵ कोड़े खाँणों दे, कय्द हंणों दे, हारकुँण्जी दे, मेहन्त्त दे, बीऊँजी रंहणों दे, बरत कर्णो दे,

⁶ पबित्रता दे, ज्ञाँन दे, सबेर दे, कृपा दे, पबित्र-आत्त्मा दे,

⁷ साच्चे पियार दे, सच्चाई के बचन दे, पंण्मिश्वर की शक्त्ति दी, धार्मिक्त्ता के शाँन्द्रो शे जू सुऐं-डेरे हाथों दे असो,

⁸ आदर अरह् निरादर दे, बुरे नाँम अरह् आछे नाँम दे। मतल्व भरमाँणों-दुर्तांणों वाल़े जैष्णें असो, तबे भे साच्चै असो;

⁹ अजाँण्दे जैष्णें असो, तबे भे जाँने-माँने असो; मरे अंदे जैष्णें असो, अरह् दे:खों ऐशो जाँणियों के जींऊँदे असो; माँर खाणों वाल़े जिऐ असो, परह् जीयाँन-पराँण दे मारे ने ज़ाँदे;

¹⁰ शोक मंनाँणों वाल़े जिऐं असो, परह् सदा आँनन्द करह्; कंगाल जिऐं असो, परह् ओकी भी भहिते धनवाँन बंणाँऐ दियों; तैष्णें असो, जैष्णों आँमों कैई किऐ ने आथी, तबे भे सब-कुछ थह्।

¹¹ हे कुरिन्थियों, आँमें खुलियों तुँओं आरी बातो करी, अमाँरा मंन तुँओं खे खुला अंदा असो।

¹² तुँओं खे अमाँरे मंन दा किऐ खोट ने आथी, परह् तुवाँरे ही मंन दा खोट असो।

¹³ परह् आप्णें नहाँन्ड़िया जाँणियों तुँओं खे बुलू, के तुँऐं भे ईन्दें के बद्ल़े आप्णा मंन खुली दियों।

असमान शमाँईं दो ने जुंन्डे।

¹⁴ बै-बिश्वाषियों आरी असमाँन शमाँई दो नें जुंन्डे; किन्देंखे के धार्मिक्त्ता अरह् अ-धर्म का किऐ मेल-झुल ने आथी? के ज्योति-प्रकाष अरह् ईनाँरे को का साथ असो?

¹⁵ मसीया अरह् शैतान का मेल का असो? के बिश्वाषी आरी बै-बिश्वाषी का नाँता का असो?

¹⁶ अरह् मुर्तियों आरी पंण्मिश्वर की देऊँठी का नाँता का असो? किन्देंखे के आँमें तअ जीऊँदें पंण्मिश्वर की देऊँठी असो; जैष्णों पंण्मिश्वर बुलो, “हाँव तिनू दा बास करूबा; अरह् तिनू मुझी चाला फिरा करूबा; अरह् हाँव तिनका पंण्मिश्वर हंऊँबा; अरह् से मेरे लोग हंदे।”

¹⁷ ईन्देंखे प्रभू बुलो, “तिनू मुँझ्शे किक्ल़ो, अरह् ज़ई रंह्; अरह् बिच्की चींजो दें ने छुईऐं, तअ हाँव तुँओं कबूल करूबा;

¹⁸ अरह् हाँव तुवाँरा परमं-पिता पंण्मिश्वर हंदा, अरह् तुँऐं मेरे बैटे अरह् बैटी हंदी। ऐजा सर्वशक्त्तिमाँन प्रभू पंण्मिश्वर का बचन असो।”