2 कुरिन्थियों 4 - Sirmouri

माँटी के घड़े दो धंन

¹ ईन्देंखे के जबे आँमों गाशी ऐष्णी कृपा हऐ, के आँमों ऐजी सेवा भेटी; तअ आँमें हिम्मत्त ने च़ूड़ो।

² परह् आँमें बै-शर्मी की अरह् चुप्पी की काँम-काज़ छ़ुड़ी दिती, ना चपलुसी शे चाल्दे, अरह् ना पंण्मिश्वर के बचन दी किऐं मिलावट कर्दे; परह् सच्चाऐ पर्गट करियों, पंण्मिश्वर के साम्णें ऐक नाँम आदमी के मंन दी आप्णी भलाऐ बईठाल़ो।

³ परह् जे अमाँरी खुषख्बरी दा पड़्दा असो, तअ ऐ नाँष हंणों वाल़े खे ही पड़ी रूआ।

⁴ अरह् तिनू बै-बिश्वाषी खे, जिनकी बुद्धी ईयों संईसारी के ईश्वर ऐ शैड़ी बाँणी थऐ, जे मसीया जू पंण्मिश्वर का सरूप असो, तिन के त्तेजमंऐं खुषख्बरी का प्रकाष तिनू गाशी ने चंम्को।

⁵ किन्देंखे के आँमें आपु खे ने, परह् मसीया यीशू का प्रचार करह्, के से प्रभू असो; अरह् आप्णें बारे दो ऐजो बुलो, के आँमें यीशू के जाँणें तुवाँरे दास असो।

⁶ किन्देंखे के पंण्मिश्वर ही असो, जिन्ऐं बुलो, “ईनाँरें मुँझ्शी ज्योत्ति-चंम्को,” अरह् सेही अमाँरे सासो दी चंम्की, के पंण्मिश्वर की बड़ियाऐ की पंछ़याँण की चंम्क यीशू मसीया के मुँख्ड़े शी प्रकाषमाँन हऐ।

⁷ परह् आँमों कैई सेजो धन माँटी के घड़े दो थऐ थो, के अपार शक्त्ति अमाँरे ढबे शी ने, परह् पंण्मिश्वर की ही ढबे शी बंणों।

⁸ आँमें चौऊँ ढबे शे दु:ख-कल़ैष तअ भुगो ऐ, परह् संक्षटी दे ने पड़्दे; बिना ऊपाऐ के तअ असो ऐ, परह् निराष ने हंदी;

⁹ सताऐ तअ ज़ाव ऐ, परह् छुड़े ने ज़ाँदे; रिड़ोऐ तअ ज़ाँव ऐ, परह् आँमें नाँष ने हंदे।

¹⁰ आँमें प्रभू यीशू की मऊँत आप्णी देह्-शरीर दी हर बख्त लऐयों फिरो, के प्रभू यीशू का जीवन अमाँरी देह्-शरीर दा पर्गट हों।

¹¹ किन्देंखे के आँमें जींन्दे जीऊँ सदा यीशू के जाँणें मंऊँती के हाथो दे दिऐ ज़ाँव, के यीशू का जीवन भी अमाँरे नाँष बाँन देह्-शरीर दा पर्गट हों।

¹² ऐशा दाँई मंऊँत्त आँमों गाशी असर पाँव, अरह् जीवन तुँओं गाशी।

¹³ ईन्देंखे के आँमों दी सेजी ही बिश्वाष की आत्त्मा असो, जिन्दें के बारे दो पबित्र-ग्रन्थों दो लिखी थुओ, “मुँऐं बिश्वाष करा, ईन्देंखे मुँऐं बुलो।” तअ: आँमें भे बिश्वाष करह्, ईन्दी खे बुलो।

¹⁴ किन्देंखे के आँमें जाँणों ऐ, के जिन्ऐं प्रभू यीशू जियाल़े, सेही आँमों भे प्रभू यीशू के साथी जाणियों ऊबे जियाल़्दे, अरह् तुँवारी गईलो आप्णें साम्णें हाजिर कर्दें।

¹⁵ किन्देंखे के बादी चींजो तुँओं खे असो, जू कृपा भहिते के जाँणें बैजाऐ हऐयों पंण्मिश्वर की बड़ियाऐ खे धन्यबाद भी बढ़ाव।

¹⁶ ईन्देंखे आँमें हिम्मत ने च़ूड़्दे; ना तअ अमाँरा दे:खावे की ईन्साँनिय्त नष्ट हंदी ज़ाँदी, तबे ही अमाँरी अंन्त्तर-आत्त्मा हर देसे नंऐं हंदी ज़ाँव।

¹⁷ किन्देखे के अमाँरा ऐगड़ी का दाँणिंक जिया कल़ेष आँमों खे बैजाऐ प्रभू यीशू के अरह् हमेशा की बड़ियाऐं पय्दा करदा ज़ाँव जिन्दें बरा-बरी ने करी ज़ादी;

¹⁸ अरह् आँमें तअ दे:खी अंदी चींजो ने, परह् बिना दे:खी चींजो दे:ख्दें रंह्; किन्देंखे के दे:खी अंदी चींजो ठीक्के ही देसो की असो, परह् बिना दे:खी चींजो हमेंशा बंणी रंह्दी।