2 कुरिन्थियों 12 - Sirmouri

संत्त-पौलुस का दिव्यदर्षण अरह् कंम्मजूरी

¹ मतल्व घमन्ड करणा मुँखे ठीक ने आथी, तबे भे करणा पड़ो; ईन्देंखे हाँव प्रभू के दिऐ गुऐ दिब्यदर्शणों अरह् प्रकाष्णों की चरचा बखाँण करूबा।

² हाँव मसीया का ऐक भगत्त जाँणू, जेसी च़ौऊँदो साल आगे च़ींज़ै स्वर्गो तोड़ी ऊबा टीपा गुवा; देह्-शरीर दा के बिना देह्-शरीर का; ऐजो हाँव ने जाँण्दा, परह् पंण्मिश्वर जाँणों।

³ हाँव तैसी आदमी के बारे दो जाँणू, के पताने तैसी स्वर्गधाम दा ऊबा टिपा, देह्-शरीर आरी, के पता बिना देह्-शरीर आरी टीपा हाँव ने जाँण्दा; परह् पंण्मिश्वर जाँणों।

⁴ स्वर्गो दा ऊबा टिपा गुवा, अरह् तेथै तेने ऐशी पबित्र बात्तो शुणीं; जिनू बातो के बारे दो किऐ बुलो ने ज़ाँदो; अरह् सेजी पबित्र बातो आदमी खे आप्णें मुँह ज़ात्ती शी बुल्णों के भे अज्ञाँ ने आथी।

⁵ ऐष्णे आदमी गाशी हाँव घमन्ड करूबा, परह् आपु गाशी आप्णी कंमजूरी के सुवाऐ, आप्णें बारे दी कोसी ओकी बातो के बारे दी आप्णी किऐ भे तारीफ ने करी सक्दा।

⁶ किन्देंखे के जे हाँव तारीफ कर्णी चहाऊँ भी तअ हाव मुरूख-ज़गर ने हंदी, किन्देंखे के साचे बुल़्णों खे; भे ढह्कनीं ज़ाँऊँ, के कद्दी ऐशो ने हईयों, जू कुँऐं मुँह दे:खो ऐ, के मेरी शुणों ऐ, से मुँह मेरे बुल़्णों शा भे जादा ने सम्झो।

⁷ ईन्देंखे के हाँव भहिते दिब्यप्रकाष्णों के जाँणें शिंयाँगिए ने ज़ाऊँ; मेरी देह्-शरीर दा ऐक काँडा चुभाऐ थुआ, मतल्व शैतान का ऐक दूत्त जू मुँदी मुकिऐं लाँव; जू हाव बैगेही ने शियाँगिऊँ।

⁸ ईन्दें के बारे दी मुँऐं प्रभू शी च़ीं बई गिड़गीड़ाऐयों बिनत्ती करी, के ऐजा काँडा मुँह शा दुरका गाडो।

⁹ परह् प्रभू ऐ मुँखे बुलो, “मेरी कृपा ताँव्खे बैजाऐ असो; किन्देंखे के तुवाँरी कंमजूरी दे ही मेरी शक्त्ति पुरे रूप शी पर्गट हों;” ईन्देंखे हाँव बड़े आँनन्द शी आप्णी कंमजूरी गाशी घमन्ड करूबा; के मसीया की शक्त्ति मुँह गाशी छया कर्दी रंह्।

¹⁰ ईन्देखे हाँव मसीया खे कंमजूरी दा, अरह् निदया दा, अरह् गरीबी दा, अरह् हारकुँण्जी दा, अरह् संकटो-असाँनीं दा खुशी असो; किन्देंखे के जबे हाँव कंंमजोर हंऊँ, तबे ही हाँव बलवाँन बंणू।

खास-चैले की पछ़्याँण

¹¹ हाँव मुरूख-ज़गर तअ बणा, परह् तुँऐं ही मुँह ऐष्णों कर्णो खे मंज्जबूर करा। तुँओं तअ तेरी तारीफ कर्णी पड़ो थी; किन्देंखे के जे हाँव किऐं भी ने आथी, तबे भे तिनू बड़े शे बड़े प्रभू यीशू के खास-चैले की बातो शा कंम ने आथी।

¹² प्रभू यीशू के खास-चैले के जिऐं भे तुँओं मुँझी सात्त-भाँत्ते धीरज आरी चींन, अरह् चंम्तकार के काम, अरह् शक्त्ति के काम भे दे:खाऐं गुऐ।

¹³ तुँऐं कियों बातो दे ओकी कलीसियों शे कंम थिऐ, सिर्फ ईन्देखे मुँऐ तुँओं गाशी आप्णा भार-बोझ़ ने पाई। मेरी ऐजी अ-नियाऐं माफ करह्।

¹⁴ दे:खो, हाँव तुँओं कैई च़ीज़ाल़िऐं आँणों खे तियार असो; अरह् हाँव तुँओं गाशी किऐ भे भार-बोझ़ ने थंह्दी, किन्देंखे के हाँव तुँवारी घरोऊँचीं ने, परह् तुँओं ही चहाँऊ। किन्देंखे के नहाँन्ड़िया माँ-बाबा खे धंन कठो ने कर्णो पड़्दो, परह् माँ-बाबा ही नहाँन्ड़िया खे धंन कठो कर्णो पड़ो।

¹⁵ हाँव तुँवारी आत्त्मा खे बैजाऐ आँनन्द शा खर्च करूबा, परह् आपु भे बिक्की ज़ाँऊबा। कियों जेतोड़ो बैजाऐ हाँव तुँओं आरी पियार करू, तेती ही कंम तुँऐं मुँह आरी पियार थह्ले?

¹⁶ तुऐं शायद ऐजो बुल्लै के सोत्तिखे से आँमों गाशी बोह्ज़ ने बंणी; परह् कुँऐ लोग मुँह कसूरबार बाँणियों ऐशो बुलो; के से दुष्ट असो; अरह् तेने आमों छ़ल़-कपट शे फशाऐ पाऐ।

¹⁷ भला, जिनू मुँऐं तुँओं कैई डियाल़े, कियो तिनू मुँझ्शो कोसी के जाँणें मुँऐं छ़ल़ करियों तुँओं कैई शो किऐ लुओ?

¹⁸ मुँऐं तीतुस समझाऐयों तैस्की गईलो ऐक ओका भे भाऐ डियाल़ा, तअ कियो तीतुस ऐ छ़ल़ करियों तुँओं कैई शो किऐ लुओ? कियों आँमें ऐकी ही आत्त्मा के चलाऐ चाले ने? कियों ऐकी ही खअ-बाटो दे चालो ने?

¹⁹ तुँऐं हेभी तोड़ी समझी रूऐ हले, के आँमें तुँओं कैई सफाऐ देऐ लऐ। आँमें तअ पंण्मिश्वर हाजिर जाँणिंयों मसीया दो बुलो; अरह् हे प्यारे, भाऐ बंईणों बादी बातो तुँवारी ही बड़ोत्री खे करह्।

²⁰ किन्देंखे के मुँह डरह् असो, कद्दी ऐशो ने हईयों के हाँव आऐयों जेष्णों चहाँऊ, तेष्णें तुँओं ने दे:खू; अरह् मुँह भी जेष्णाँ तुँऐं ने चहाँदें तेष्णा ही दे:खो; अरह् तुँओं मुंझी झगड़ा, डाह, कोरूध, बिरोध, रीष, चुगली, घमन्ड, अरह् बखैड़ा हों;

²¹ कद्दी ऐशो ने हऐयों, के जबे हाँव पाछ़ू तुओं कैई आँऊ; तअ मेरा पंण्मिश्वर मुँह हजो तुवाँरे सहाम्णें शर्मिन्दा करह्; अरह् मुँह बैजाऐ लोगो खे शोक मनाणाँ पड़ो; जिन्ऐं आगे पाप करा; अरह् आप्णीं गंन्दगी, चूरी-जारी, अरह् लुचपंण करियों आप्णा मंन बद्ल़ियों पसतावा ने करी।