1 तीमुथियुस 6 - Sirmouri

¹ जैतोड़े बैठू-दास असो, से भे आप्णे-आप्णे माँलिक बह्ड़े आदर-ईज्जत्त ज़ूगै जाँणें, जू के पंण्मिश्वर के नाँव अरह् शिक्क्षा की नीदया ने हों।

² अरह् जिनके माँलिक बिश्वाषी असो, से भे आप्णें माँलिक के बैस्त्ती ने करह्; के ऐबे तअ मेरा माँलिक भे मुँह जेष्णाँ बिश्वाषी असो, परह् से ऐबे तअ तिनकी सेंवा हंजों भे बैगेही मंन लाऐयों करह्; किन्देंखे के तिन्ऐं जियों सेवा का फ़ाऐदा लंऐ लुवा, से आपु मुँझ़ी बिश्वाषी अरह् प्यारे साथी असो, ईनही बातो का तिनखे भाष्ण देऐया करह्, अरह् तिनू संहम्झ़ाँदा रंह्।

झुठी शिक्क्षा अरह् धन का लाल़्च

³ जे कुँऐं झ़ुठी शिक्क्षा दियों, अरह् अमाँरे प्रभू यीशू मसीया के बचन ने माँनोंं, जू भगति के मुँताबिक शे असो।

⁴ तअ सेजा घमंडी हऐ रूआ, अरह् से किऐ ने जाँण्दा; परह् तेसी बाद-बिबाद शब्दो गाशी जीदिणों की बीमारी असो, जिन्दे लई डाह्, झगड़े, नीदया की बातो, अरह् बुरे-बुरे शक,

⁵ अरह् तिनू आदमी मुझी बै-कार के रगड़े-झगड़े पय्दा हों, जिनकी बुद्धी भ्रष्ट हऐ रंऐ, अरह् से सच्चाई शे अजाण्दे असो; ऐष्णें लोग ऐशो जाँणों के पंण्मिश्वर के सेवा, भगति धंनकंमाणों का ऐक जरिया असो,

⁶ परह् खुशी-आँनन्द आरी पंण्मिश्वर के सेवा-भगत्ति सोभी शी बड़ी कंमाँऐ असो।

⁷ किन्देंखे के ना आँमें किऐ संईसारी दो आँणी थई, अरह् ना किऐ आगु नींह बल़्दे।

⁸ जे आँमों कैई खाँणों खे रोटी अरह् बाँम्बणों खे खोट्णों हों, तअ आँमों तिदो आँनन्द-खुशी हंणों पड़ो।

⁹ परह् जू सेठ-धंनवाँन बण्णों चहाँव, से ऐष्णी ही परख अरह् फाँदे अरह् भहिते ब-कार अरह् नुकसाँन, लाल़्च के जाल़ौ दे फषो, जिन्दे लई आदमी बिगड़ी ज़ाँव; अरह् नाँष के संमुँन्द्रो दे डूब्बी ज़ाँव।

¹⁰ किन्देंखे के रूपिऐ का लोभ बादी बुराई की जड़ असो, जिनू पाँणों की कोशिष दी बहीते लोग बिश्वाष शे भट्कियों आपु-आप्खे कई किस्म के दु:खो लई छिनं-भीनं हऐ ज़ाँव।

तीमुथियुस खे प्रभू यीशू के सलाह

¹¹ परह् हे पंण्मिश्वर के जंण, तू ईनू बातो शा भाग, अरह् धर्म, भगत्ति, बिश्वाष, प्यार, धीरज, अरह् नंरमाँऐं पाछी पड़।

¹² बिश्वाष की आच्छ़ी कुष्ती लड़, अरह् सेजा अमर-जीवन पा, जिन्देकी ताँईऐं ताँव खास-करियों बय्दी थुवा; अरह् तुऐं भहिते गुवाह्-शाज़्त्त के सहाँणें कबूल करियों माँनी भे पाव थियों।

¹³ हाँव तुँओं खे तेसी पंण्मिश्वर का जू ऐक नाँम पराँणी जीऊँदें थंह्, अरह् यीशू मसीया तुवाँरा गुवाह्-शाज़्त्त अरह् हाजीर जाँणियों जिनिऐ हाकम-पुन्तियुस, पिलातुस के सहाँम्णें आछ़ो कबूल करियों माँनी पाव; अरह् हाँव तुओं खे ऐजी अज्ञाँ देऊँ,

¹⁴ के तुऐ अमाँरे प्रभू यीशू मसीया के पर्गट् हणों तोड़ी, ईयों अज्ञाँ दी किऐ कंम्मी ने आणों दिऐ, अरह् ईदा नीरर्दोष बंणियों चाला अंदा रंह्।

¹⁵ जैथू से ठीक बख्तो गाशी देखाँदा, जू परम-धन्य अरह् सिर्फ ऐक महाँराज अरह् राजाओं का राजा! अरह् प्रभू का प्रभू! असो;

¹⁶ अरह् सेही सिर्फ अमर असो, अरह् ना तेसी कुणिऐं देखी थई, अरह् ना तेसी कुँऐं आदमी देखी सक्दा; किन्देंखे के से आगी के भाठौ के लहयारे की सैकों कैई रंह्; तिनकी ईज्जत अरह् तिनकी शक्त्ति का परमाँण ज़ूगौ-ज़ूगौ तोड़ी रंह्दा। आमीन!

¹⁷ अरह् ऐसी ज़ुगौ की चींजो लई, जू कुँऐं सेठ-धंनवाँन बंणी रूऐ, तिनखे अज्ञाँ दे, के से घमंडी ने बंणों, अरह् ना चंचल धंन दा किऐ भूर्षा करह्, परह् पंण्मिश्वर गाशी भूर्षा थुऐ, जेने अमाँरे सु:खो खे सब-कुछ बैजाऐ दितो।

¹⁸ से भलाऐ करह्, अरह् भलाई की काँम-काज़ दे धंनवाँन बंणों, अरह् दयामाँन, अरह् ओकी की मंद्दत्त कर्णो खे तैयार रंह्।

¹⁹ ऐष्णों करियों से हजो खे स्वर्गीऐ धन कोठो करह्, मतल्व तेसी स्वर्गो दा बैजाई ईनाँम भेंट्दा; ईन्दें लई से साच्चा जीवन जीऊँला।

²⁰ हे तीमुथियुस, ताँव कैई जू देऐ थो, तिन्दे के देख-भाल़ करह्; अरह् बै-कार की संईसारीक बातो शा बंचियों रंह्, परह् तू झ़ूट्ठै ज्ञाँन के बिश्वाष शा दुरका ही रूऐ,

²¹ किन्देंखे के किऐ लोग ईनू ज्ञाँन माँनींयों बिश्वाष शे बिगड़ी गुऐ, परह् पंण्मिश्वर का कृपा तुँओं आरी सदा रंऐ चेंई।