1 तीमुथियुस 5 - Sirmouri

बिश्वाषी की ताईऐ जुमेबारी

¹ कोसी बुड़ा-खाड़ा ने फिट्के, परह् तेसी आप्णा बाबा जिया जाँणियों सम्झाऐ दे, अरह् आपु शे कंम ऊँमर के लोग भे आप्णें भाऐ जिऐ जाँणें;

² अरह् बुड़ी-खाड़ी तिरंई भे आप्णी माँ जेई जाँणें; अरह् आप्णी ऊँमर शी कंम ऊँमर की जुवाँन तिरंई भे पुरी पबित्रत्ता शी आप्णी बंऐणीं जेई जाँणें;

³ जुण्जी तिरंई सोत्तिखे जरूरत्तबंद बिध्वा असो; तिनकी मंद्त्त करियों आदर-ईज्जत्त करे;

⁴ परह् जे कोसी बिध्वा के नहाँन्ड़िया, के नात्ती-पोत्ती हों, तअ से आगे आप्णे ही कुड़बै आरी भगत्ति का बरताव करह्; अरह् आप्णें माँ-बाबा खे तिनका हंक देणाँ तिनू नहाँन्ड़िया कैई शा शिखाँव; किन्देंखे के सेजो पंण्मिश्वर के भे भाँव ऐ;

⁵ अरह् जिनू बिध्वा के सोत्तिखे मंदत्त के जरूरत्त असो, अरह् तैयारा मंद्दतगार कुँऐं ने आथी; से सिर्फ पंण्मिश्वर गाशी भुरषा थंह्, अरह् से रात्त-देस बिन्त्ती अरह् प्रार्थना दे मंगन रंह;

⁶ परह् जुण्जी बिध्वा भोग-बिलास दे पढ़ी गऐ, से जीऊँदी हंऐयों भे मँरी गंऐ।

⁷ तुऐं तिनखे ईनू बादी बातो के अज्ञाँ दिऐ, जू से भे नीर्दोष बंणीं ज़ाँव।

⁸ परह् जे कुँऐं आप्णे लोगों का अरह् खास-करियों आप्णें घराने का फिकर ने करह्, तअ तेने बिश्वाष करणाँ छ़ुड़ी दिता, अरह् से बैबिश्वाषी शा भे बुरा बंणी गुवा।

⁹ सिर्फ तियों ही बिध्वा को नाँव लिखो, जियाँरी ऊँमर षाठ साल्ह शी जादा हों; अरह् जियाँरा ऐक ही घरवाल़ा थिया।

¹⁰ अरह् जिऐं आप्णें भले काँम-काज़ लंई आपु खे नाँव कंमाँऐ थुवा हला, जिंऐ आप्णें नहाँन्ड़िया का आच्छ़ा पालना-पोष्ण करी थुवा हला; अरह् जिऐ पाँऊँणें-पंई का आच्छ़ा आदर-संत्तकार करी थुवा हला, अरह् जिऐं पबित्र लोगो के लात्त धोऐ थुऐ हंले; अरह् कोसी दींन, दु:खिया की मंद्दत्त करी थंऐ हली, अरह् जुण्जी सोभी आच्छ़ै काँम-काज़ दी मंगन रंह् हले।

¹¹ परह् जुवाँन बिध्वा के नाँव ने लिखे, किन्देंखे के जबे से मसीया का बिरूध करियों भोग-बिलास दी पढ़ी ज़ाँव, तबे से हजो शाऊरे ज़ाँणों चहाँव;

¹² से सजा ही ज़ूगी हों, किन्देंखे के तिन्ऐ आप्णा करा अंदा; आगला बाय्दा च़ूड़ी दिता,

¹³ ईन्दें के सुवाऐ से आल्सी रंहदी लागो, अरह् से घरह्-घरह् फ़िरह्, से सिर्फ आल़सी ने, परह् से ओकी के काँम-काज़ दे भे फ़ेगै पाँव; अरह् से ओकी की बुराई दे खुशी हों, अरह् से सेजी बातो बुलो; जुण्जी बातो बुल्णीं भे ठीक ने हंदी।

¹⁴ ईन्देंखे हाँव ऐजो चहाँऊ, के जुवाँन बिध्वा हजो शाऊँरे ज़ाँव; अरह् नहाँन्ड़िया हुआल़ो, अरह् आप्णों घरह्-बार देखो, अरह् तबे तिनू आप्णी नीदया कर्णों वाल़े खे आप्णें बारे दा किऐ भे बुल्णों का मुँक्का ने दियों।

¹⁵ मुँऐं ईन्देंखे बुली लो, के कंऐयों बिध्वा तअ भट्कियों शैतान पाछी चाली रंई।

¹⁶ अरह् जे कोसी बिश्वाषी कुँड़बे दे कुँऐ बिध्वा हों, तअ सेजा कुँड़बा तियारी मंद्दत्त करह्; जू सेजी तिन कागली बिध्वा, कलीसिया गाशी भार-बोझ़ ने बंणों; किन्देंखे के कलीसिया तिनकी मंद्दत्त करह्; जू सत्तिखे बिध्वा अरह् मंजबूर असो।

¹⁷ जुण्जे दाँने-माँने बुड़े-खाड़े मंजीज लोग, कलीसिया की जुँमेबारी आप्णीं ज़ाँणों; से सोत्तिखे आच्छ़ै आदर-ईज्जत्त ज़ुगे माँनें ज़ाँव, खास करियों सेजै लोग जुण्जे बचन शुँणाँणें, अरह् शिक्क्षा देणों का काँम-काज़ कर्णो खे मेंह्नंत्त करह्।

¹⁸ किन्देंखे के पबित्र-ग्रन्थों दो ऐजो भे लिखों गुओं: के “बोंणों वाल़े बुल़्दों को मुँह ने बाने” किन्देंखे के “धियाड़ूवा खे आप्णी धियाड़ी लणों का हंक-अधिकार हों।”

¹⁹ जे किऐ दोष-कसूर कोसी बुड़े-मंजीज आदमी गाशी लाया ज़ाँव, तअ बिना दू-च़ी गुवाह्-शाज़्त्त की शाक्क्षी के बिना ने शुँणें।

²⁰ पाप कर्णो वाल़ा आदमी सोभी के सहाँम्णें सम्झाऐ दिऐं, जिन्दें लंई के ओके लोग भे डरी ज़ाँव।

²¹ पंण्मिश्वर, अरह् मसीया यीशू अरह् छाँटे अंदें स्वर्गदूत्तो के सहाँम्णें ताँव कैई ऐजी जुँमेंबारी देऊँ; के बिना कोसी अप्णोंट के ईनू अज्ञाँ का पाल़्ण करे, परह् अप्णोंट के भाव शो किऐ ने कोरो ज़ाँव।

²² कोसी गाशी भे शिघा आप्णा हाथ ने थुऐ, अरह् ना कोसी के पाप का भागीदार बंणें, अरह् आपु आप्खे पबित्र बंणाँऐयों शुँच़ाशाँख्ल़ा रूऐ।

²³ जिन्दगी भर सिर्फ पाँणी पिणों वाल़ा ने बणे, परह् आप्णे पेटो के अरह् आप्णे बार-बार बीमार हणों के कारण दाँणीक-दाँणीक दाखरंस भे लऐया करह्।

²⁴ कुछ लोगो के पाप सपष्ट रूप शे पर्गट हऐ ज़ाँव, अरह् नियाँव खे आगे ही पऐची ज़ाँव; परह् कुछ लोगो के पाप पाछे पर्गट हों।

²⁵ तेष्णें ही कुछ आच्छै भले काँम-काज़ भे सपष्ट रूप शे पर्गट् हऐ ज़ाव; अरह् जुण्जे पर्गट ने हंदे, सेजे भे छ़ुपाऐ ने ज़ाँदे।