1 तीमुथियुस 4 - Sirmouri

झुठे शिक्क्षक

¹ परह् पबित्र-आत्त्मा ऐ साफ-साफ बुलो, के आँणो वाल़े बख्ते कैतोड़े लोग भरमाँणो वाल़ी आत्त्माओं के शिक्क्षाओं गाशी आप्णा मंन लाऐयों बिश्वाष शे भट्की ज़ादे।

² ऐष्णों तिनू झूठे पार्खण्डी लोगो के जाँणें होंदो, जिनका मंन माँनों ताते लोहे की डाम्णी लई डाँमी थईला,

³ से तुँओं सोभी लोगो खे ऐजी मंत्त-शिख्ह देंदे, के तुँऐं जाज्ड़े ने बाँणें, अरह् किऐ खाँणों-पिणों की चींजो भे छाँट्दे के तुँऐं ईनू भे ने खाऐ, किन्देंखे के पंण्मिश्वर ऐ बादी खाँणों की चींजो खाँणों खे ही बाँणीं थई, ईन्देंखे के बिश्वाषी अरह् संच्चाई की पछ़याण कर्णो वाल़े ईनू चींजो खे धन्यबाद देऐयों खाँव।

⁴ किन्देंखे के पंण्मिश्वर की रंची-बणाँई अंदी बादी ऐक नाँम चीज शुद्ध असो, ऐक चीज भे छुड़णों ज़ूगी आथी ने; परह् ऐजो जरूरी असो, के बादी चींजो पंण्मिश्वर का धन्यबाद करियों खाई ज़ाँव।

⁵ किन्देंखे के से पंण्मिश्वर के बचन अरह् प्रार्थना के जाँणें शुद्ध-पबित्र हऐ ज़ाँव।

मसीया प्रभू यीशू का आछा दास

⁶ जे तू कलीसिया के लोगों कैई शी ईनू बातो चित्ते कराँऐ, तअ तू मसीया यीशू का आछा दास बंणला; जेस्का पालण-पोष्ण, बिश्वाष के कारण, अरह् तेसी ही साच्ची शिक्क्षा के कारण हंला; जेसी तुँऐं माँनी थुवा।

⁷ संसारी की गाँद्दी अरह् बिना मंतल्व की मंन-घड़त्त कथा-कहाँणीं शे दुर रूऐ, परह् तुऐं आपु खे पंण्मिश्वर की भगत्ति के निय्म दे डंटै रूऐ।

⁸ किन्देंखे के देह्-शरीर के कसरत्त थोड़े देसो खे हों, अरह् ईन्दें लंई किऐ फ़ाय्दा ने हंदा; परह् पंण्मिश्वर की भगत्ति का लाभ सोभी बातो दा जीवन खे हिम्मत्त दियों; ऐसी बख्त्ते अरह् आँणों वाल़े जीवन का बाय्दा भे ईन्दीखे असो।

⁹ ऐजी बात साच्ची, अरह् हर ढंग शी माँनणों ज़ूगी असो।

¹⁰ किन्देंखे के आँमें मेह्न्त अरह् कोशिष ईन्दी खे करह्, के अमाँरा भूर्षा तेसी जीऊँदे पंण्मिश्वर गाशी असो; जू बादे आदमी का अरह् खास-करियों बिश्वाषियों का छ़ुट्कारा करह्।

¹¹ ईनू बादी बातो के अज्ञाँ दे, अरह् ईन्दी के बारे दे शिक्क्षा ऐजी ही असो।

¹² कुँऐ भे तेरी जुवाँनी छ़ुटी ने जाँणों, परह् बचन, अरह् चाल-चल्ण, अरह् प्यार, अरह् बिश्वाष, अरह् पबित्रत्ता, दा बादे बिश्वाषी भाई-बंईणों खे ऐक आच्छ़ा-नंमुँना बंणी ज़ाऐ।

¹³ जाँव तोड़ी हाँव ने आँऊ, ताँव-तोड़ी तू पबित्र-ग्रन्थों के पाठ पढ़दे अरह् शिक्क्षा देंदा; अरह् संहम्झ़ाँदा लागा अंदा रंह्।

¹⁴ ताँव कैई जुण्जा दाँण-बरंदाँण असो, जुण्जा के ताँव्खे बरंम्बाँणी के जाँणें, कलीसिया के दाँनें-माँनें पुराँणिऐं लोगो के हाँथ ताँव गाशी थंणों लंई भेंटा थिया; तू तेसी बरंदाँन सुवाँ करियों तिन्दी ही लंई सेंवा करे।

¹⁵ ईनू ही अज्ञाँयों गाशी खास-ध्याँन दिऐ, अरह् ईन्दी ही लींन-मंगन हंऐ ज़ाऐ; के तेरी बड़ोत्री सोभी लोगों गाशी पर्गट हंऐ ज़ाँव;

¹⁶ आप्णीं तरफ़ शा आप्णें भाष्ण दा च़ौक्क्ष रूऐ, अरह् ईनू ही बातो गाशी पाक्का भे रूऐ; किन्देंखे के जे तू ऐष्णों ही करदा रंईला, तअ तू आप्णाँ अरह् तेरी बातो शुँण्णों वाल़े लोगों खे भे ऐक आच्छ़ा-नंमुँना बंणला।