1 तीमुथियुस 1 - Sirmouri

नंमष्कार

¹ संत्त-पौलुस के ढबे शा, जू अमाँरे मुँक्त्ति देणों वाल़े पंण्मिश्वर, अरह् अमाँरे भुर्षें के मुँताबिक शा मसीया यीशू की अज्ञाँ शा खास-चैला बंणी रूआ,

² तीमुथियुस, के नाँम जू बिश्वाष दा मेरा साच्चा बैटा असो: परंम-पिता पंण्मिश्वर अरह् अमाँरे प्रभू यीशू मसीया की ढबे शी ताँव्खे कृपा, अरह् दया-रंय्म अरह् शाँण्त्ति भेंट्दी रंह्।

झूट्ठै शिक्क्षा देणों वाल़े के बारे दी चिताँव्णी

³ जैष्णों मुँऐंं मकीदुनिया खे ज़ाँदी बई ताँव कैई शो सम्झाँव थियों, के इफिसुस दो रऐयों कुछ लोगो खे अज्ञाँ दिऐ के ऊक भाँती शिक्क्षा ने दिऐ,

⁴ अरह् तिनू कथा-काँणियों अरह् चाली अंदी गड़ी-पिड़ी की बातो दा आप्णाँ मंन ने लाऐ, जिन्दे लई बाद-बिबाद हों, अरह् अमाँरे छुट्कारे खे पंण्मिश्वर ऐ जुण्जी योजना बाँणीं थंऐ; से तियों आगे ने बड़णों देंदी, जू बिश्वाष के मुँताबिक शो असो, तैष्णों ही हजो भे बुलू।

⁵ अज्ञाँ का मंतल्व ऐजा असो, के शुद्ध मंन अरह् आछे बरताव, अरह् बिना कऊँट्ल़े बिश्वाषों लई प्यार पय्दा हों।

⁶ ईनू बातो छुड़ियों कैतोड़े लोग बकबाद की ढबे भट्की गुऐ,

⁷ ऐ ऋषी-मूसा का निय्म-रूवाज के शिखाणें वाल़े तअ बंण्णों चहाँव, परह् जूण्जो किऐ ईन्ऐं बुली लो; अरह् जिनू बातो गाशी ईन्ऐं जोर देऐयों बुली लई, ईनू बातो ऐ आपु भे सम्झोंदे ने।

⁸ परह् आँमें जाँणों ऐ, के जे कुँऐं ऋषी-मूसा खे भेटे गुऐ अज्ञाँ के मुँताबिक ठीक-ढंग शे माँनींयों तिन्दे चालो, तअ से आछो असो।

⁹ ऐजो जाँणियों के ऋषी-मूसा खे भेटे गुऐ अज्ञाँ-निय्म के मुँताबिक, धरंमाँत्त्मा लोगो खे ने, परह् गुवाँर, निकारे, नाँसतिक, पापियों, अ-पबित्र, अरह् अ-शुद्ध आदमी, माँ-बाबा के घात कर्णो वाल़े हतियारे,

¹⁰ बिच्के, चोर-जार, मर्दों की गईलो कू-कर्म कर्णो वाल़े, आदमी के बिक्णों वाल़े, झुठो बोल्णो वाल़े, अरह् झुठी षौ-कस्मी खाणों वाल़े, अरह् ईन्दें के अलावा आछे शिक्क्षा के बादे खिलाफ़्त्त दे रंहणों वाल़े खे बाँणी थंई।

¹¹ ऐजी शिक्क्षा पंण्मिश्वर की बड़ियाऐ की खुषख्बरी के मुँताबिक शी असो, अरह् हर प्रकार के कृपा देंणों वाल़े, महाँन परंम-पिता पंण्मिश्वर शी भेंटी रंह्, जू मुँह कैई देऐ थऐ।

कृपा खे धन्यबाद

¹² हाँव आप्णे प्रभू मसीया का जिन्ऐं मुँखे शक्त्ति देऐ थऐ, धन्यबाद करू, के तिन्ऐ मुँह बिश्वाष ज़ूगा सम्झियों आप्णी सेंवा कर्णो वाल़ा बाँणा।

¹³ हाँव तअ आगे पंण्मिश्वर की नीदया कर्णो वाल़ा, सताणों वाला, अरह् अ-नियाँई कर्णो वाल़ा थिया; तबे भे तिन्ऐ मुँह गाशी दया-रंय्म करी, किन्देंखे के अ-बिश्वाष की दशा दा बिना सुच्चै-संमझे हाँव ऐजी काँम करू थिया।

¹⁴ अरह् अमाँरे प्रभू के बैजाऐ बड़ी कृपा, बिश्वाष अरह् प्यार आरी जू मसीया यीशू दा असो, से बैजाऐ भहिती हऐ।

¹⁵ ऐजी बात साच्ची, अरह् माँन्णों ज़ूगी असो, के मसीया यीशू पापियों का मुँक्त्ति देंदे दुनियाँ दे आऐ, जिनू पापी मुझी हाँव सोभी शा बड़ा असो।

¹⁶ परह् मुँह गाशी ईन्देंखे दया-रंय्म करी, के मुँह सब शे बड़े पापी दी यीशू मसीया ऐ आप्णी असीम सहय्नशीलता देखाऐ, जू लोग तिनू गाशी अमर-जीवन पाणों खे बिश्वाष करह्, जू हाँव तिनू लोगो खे ऐक नँमूना बंणू।

¹⁷ ऐबे सदा का राजा मतल्व अ-बिनाषी, अनाँथों: खे, सिर्फ ऐक पंण्मिश्वर का आदर अरह् बड़ियाऐ ज़ूगौ-ज़ूगौ तोड़ी हंदी रंह्। आमीन।

¹⁸ हे बैटा, तीमुथियुस, तिनू बरंमबाँणीं के मुँताबिक शा जू आगे तेरे बारे दी बुली गऐ थी, हाँव ऐजी अज्ञाँ देऊँ, के तू तिन्दे के मुँताबिक आच्छ़ी लड़ाऐ लड़दा रंह्,

¹⁹ अरह् बिश्वाष अरह् तेसी आछे सभाव-बरताव, थाँम्ड़ा अंदा थुऐ, जेसी दूर कर्णो के जाँणें कैतोड़े लोगो के बिश्वाषो का छ:त्तियाँनाँष हुआ।

²⁰ तिनू ही मुँझ शा भाऐ-हुमिनीयुस अरह् भाऐ-सिकन्दर असो, जिनू मुँऐ शैतान खे देऐ थुऐ, के से पंण्मिश्वर की नीदया कर्णी ने शिखो।