1 थिस्सलुनीकियों 3 - Sirmouri

तीमुथियुस डेयाल़ा गुआ

¹ ईन्देंखे जबे अमाँरे हजो ठहरी ने, तअ आँमें ऐजो जाँणीं पाव के एथेन्स नंगर दो ऐकली रंहणों पड़दो;

² अरह् आँमें तीमुथियुस, जू मसीया की खुषख्बरी दा अमाँरा भाऐ अरह् पंण्मिश्वर का दास असो; तेसी ईन्देंखे डेयाल़ा के से तुँओं पाक्के करह्, अरह् तुवाँरे बिश्वाष के बारे दे तुँओं सम्झाँव।

³ के कुँऐं ईनू कल़ेषो के जाँणें डगमंगाई ने ज़ाँव; किन्देंखे के तुँऐं आपु भे जाँणोऐं के आँमों ईन्दी की ताँईऐ थऐ थुऐ।

⁴ किन्देंखे के आगे ही, जबे आँमें तुवाँरे कागी थिऐ, तअ तुँओं खे बुलिया करह् थिऐ, के आँमों दु:ख्ह सहंणा पड़दा, अरह् तेष्णों ही हुओ, जेष्णों के तुँऐं भे जाँणों ऐ।

⁵ ईन्देंखे के जबे मेरे ठहरी ने, तअ तुवाँरे बिश्वाष के बारे दो जाँण्णों की ताँईऐ तीमुथियुस डेयाल़ा, के कद्दी ऐशो ने हईयों के पर्ख्णों वाल़े ऐ तुँवारी परख करी हली, अरह् अमाँरी मेंह्न्त बै-कार हऐ गऐ हली।

तीमुथियुस के जाँणें शुज़ा भेटा

⁶ परह् हेबी तीमुथियुस ऐ, जू तुँओं कैई शा ईथै आऐ रूआ, ऐने तुवाँरे बिश्वाष अरह् प्यार का समाँचार शुँणाँया, अरह् ऐजी बात भे शुँणाई के तुँऐं बादे प्यार शे आँमों चित्ते करह्; अरह् आँमों देखणों की हिछ़या करह्, जेष्णी आँमें भे तुँओं देखणों के हिछा करह्।

⁷ ईन्देंखे हे भाऐ-बंईणों, आँमों भे आप्णे बादे दु:ख्ह, कल़ेष दी तुवाँरे बिश्वाष के जाँणें शाँण्त्ति भेंटी।

⁸ किन्देंखे के जे ऐबे तुँऐं प्रभू यीशू दे पाक्कै रंह्, तअ आँमें जीऊँदे असो।

⁹ अरह् जेष्णी खुशी आँमों तुवाँरें जाँणें आप्णे पंण्मिश्वर के सहाँम्णें असो, तिन्दे के बद्ल़े केशा दाँई आँमें तुवाँरें बारे दा पंण्मिश्वर का धन्यबाद करह्?

¹⁰ आँमें रात्ती देसो बैजाऐ प्रार्थना करह्, के आँमें तुवाँरा मुँह देखो अरह् तुवाँरे बिश्वाष की कंम्मी पुरी करह्।

¹¹ ऐबे अमाँरा पंण्मिश्वर अरह् पिता आपु ही अमाँरा प्रभू यीशू आपु ही तुँओं कैई आँणों खे आँमों कैई शी बाट् देखाँव;

¹² अरह् प्रभू ऐशो करह् के जेष्णों आँमें तुँओं शो प्यार करह्, तेष्णों ही तुवाँरो प्यार भे आपु मुँझी बादे आदमी की गईलो बड़ो च़ेंई, अरह् बड़दो रूओ च़ेंई।

¹³ जू से तुवाँरा मंन ऐशा पाक्का करह्, के जबे अमाँरा प्रभू यीशू आप्णे पबित्र लोगो आरी आँव, तअ से अमाँरे पंण्मिश्वर अरह् पिता के सहाँम्णें पबित्रता दे नीर्दोष-बंणों।