1 थिस्सलुनीकियों 2 - Sirmouri

संत्त-पौलुस की प्रचारो के काँम

¹ हे भाऐ-बंईणों, तुँऐं आपु भे जाँणो ऐ के अमाँरो तुँओं कैई आँणों बै-कार ने गई।

² परह् तुँऐं आपु ही जाँणो ऐ, के आगे फिलिप्पी दा दु:ख्ह भुगणें अरह् कल़ेष सुँहणों गाशी भे अमाँरे पंण्मिश्वर ऐ आँमों खे ऐशी दीड़-हिम्मत दिती, के आँमें पंण्मिश्वर की खुषख्बरी का बैजाऐ बिरूध हंदे भे तुँओं कैई शी शुँणाँऐ।

³ किन्देंखे के अमाँरी शिक्क्षा ना तअ धोखे शी आथी, अरह् ना गंन्दगी शी, अरह् ना छ़ल़ आरी आथी;

⁴ जैष्णें पंण्मिश्वर ऐ आँमों ईन्दें ज़ुगे जाँणियों आँमों कैई ऐजी खुषख्बरी दित्ती, अरह् आँमें तेष्णा ही बखाँण भे करा, आँमें लोगो खुशी कर्णो की कोशिष ने कर्दे, परह् आँमें तअ तेसी पंण्मिश्वर खुशी करह्, जू अमाँरे मंन का भैद् जाँणियों पर्खोऐ।

⁵ किन्देंखे के तुँऐं जाँणोंऐं के आँमें ना तअ कद्दी चाप्पलुसी की बातो करह् थिऐ, अरह् ना लोभ-लाल़्च खे भाने बाँणों थिऐ, ईन्देका पंण्मिश्वर गुवाह्-शाज़्त्त असो;

⁶ आँमें लोगो कैई शा किऐ माँन-समाँन ने चहाँदे, ना तुँओं कैई शा, ना कोसी ओकी कैई शा, आँमें मसीया के खास-चैले के रूप दा आप्णा हंक-अधिकार चलाऐ सको थिऐ;

⁷ परह् जेष्णाँ माँ-बाबा आप्णे नहाँन्ड़िया का पालण-पोष्ण करह्, तेष्णा ही आँमें भे तुँओं मुँझी रंह्ऐयों नरमाँऐं देखाऐ थई;

⁸ अरह् तैष्णी ही आँमें भे तुँवारी हिछ़या कर्दें ना सिर्फ पंण्मिश्वर की खुषख्बरी गाशी आप्णे-आप्णे प्राण भे तुँओं खे देणों खे तैयार थिऐ, ईन्देंखे के तुँऐं अमाँरे प्यारे ज़ाऐ रूऐ थिऐ।

⁹ किन्देंखे के, हे भाऐ-बंईणों, तुँऐं अमाँरो छियाँईतोंण अरह् चरी चित्ते करह्; आँमें रात-देस काँम कर्दे तुँओं मुझी पंण्मिश्वर की खुषख्बरी शुँणाँऐं के तुँओं कोसी गाशी भी आँमें बोझ़ ने बंणों।

¹⁰ तुँऐं आपु ही गुवाह्-शाज़्त्त असो, अरह् पंण्मिश्वर भे गुवाह्-शाज़्त्त असो, के तुँऐं बिश्वाषी मुँझी अमाँरा बरताव केष्णा पबित्र, धार्मिक अरह् नीर्दोष रूवा।

¹¹ तुँऐं जाँणो ऐ के बाबा केष्णाँ आप्णे नहाँन्ड़िया की गईलो बरताव करह्, तेष्णा ही आँमें भे तुँओं मुँझ्षा, ऐकी नाँम खे शिक्क्षा दियों, अरह् शाँण्ति देंदे सम्झाँव थिऐ

¹² के तुँवारी चाल-ढाल पंण्मिश्वर ज़ूगी हों, जुण्जे तुँओं आप्णे राज अरह् बड़ियाई खे बईदो।

¹³ ईन्देंखे आँमें भे पंण्मिश्वर का धन्यबाद सदा कर्दे रंह्, के जबे अमाँरे जाँणें पंण्मिश्वर की खुषख्बरी का बचन तुँओं कैई पईचा, तअ तुँऐं तेसी आदमी का ने; परह् पंण्मिश्वर का बचन जाँणा, (अरह् सत्तिखे ऐ ऐष्णों ही असो) तुँऐं भे माँनों; अरह् से तुँओं बिश्वाषी मुँझी जू बिश्वाष थंह्, ऐक दब-दबा बंणा अंदा रंह्।

¹⁴ ईन्देंखे तुँऐं, हे भाऐ-बंईणों, पंण्मिश्वर की तिनू कलीसियों की जेऐ चाल-चालदे लागे, जू यहूदिया दे मसीया प्रभू दी असो, किन्देंखे के तुँऐं भे आप्णे लोगो मुझी जैष्णें दु:ख्ह झेले, तेष्णें ही तिन्ऐं भे यहूदी लोगो मुँझी झेले थिऐ;

¹⁵ जिन्ऐं प्रभू यीशू अरह् ओके ऋषी भे माँरी दिते, अरह् आँमों भे सताऐ, अरह् पंण्मिश्वर तिन शा खुशी ने आथी, अरह् से बादे आदमी का बिरूध करह्।

¹⁶ अरह् से गऐर यहूदी खे खुषख्बरी की बातो शुँणाँणों शे आँमों रूकी दियों, जू तिनू लोगो खे मुँक्त्ति ने भेंटो, अरह् सदा तिनके पाप का घह्ड़ा भरा अंदा रंह्; अरह् तिनू गाशी पंण्मिश्वर का भयानक कोप-कुरूध आऐ पंईचा।

कलीसिया आरी भेंटिणों के हिछ़या

¹⁷ हे भाऐ-बंईणों, जबे आँमें ऐगड़ी खे तुँओं आरी शे बिछ़ड़ी गुऐ थिऐ, सोंच-बिचारो शे ने परह् सिर्फ देह्-शरीर शे; परह् आँमें तुँओं आरी भेंटिणों खे काऊँल़ी रंह्, आँमें बैगेही पराऊँणी रंह्।

¹⁸ ईन्देंखे आँमें (मतल्व मुँऐ पौलुस ऐ) ऐकी बई ने परह् दू बई तुँओं कैई आँणों चहाँव, परह् शैतान आँमों रूकदा रूआ।

¹⁹ तुँऐं बुलो, अमाँरा भूर्षा के खुशी के बड़ियाऐ को मुँकुट का असो? कियों अमाँरे प्रभू यीशू के सहाँम्णें तिन के आँणों के बंख्त्ते तुऐ हंदी ने?

²⁰ तेथै तुँऐं ही अमाँरी बड़ियाऐं अरह् खुशी हंदी।