1 थिस्सलुनीकियों 1 - Sirmouri

नंमष्कार

¹ संत्त-पौलुस अरह् सिलवानुस अरह् तीमुथियुस के ढबे शे थिस्सलुनीकियों की कलीसिया के नाँव, दी परंम-पिता पंण्मिश्वर अरह् जुण्जे प्रभू यीशू मसीया दे असो: कृपा अरह् शाँण्त्ति तुँओं भेंटदी रंह्।

थिस्सलुनीकियों का बिश्वाष

² आँमें आप्णी प्रार्थना दे तुँओं सदा चींत्ते करह्, अरह् तुँओं सोभी के बारे दा पंण्मिश्वर का धन्यबाद करह्,

³ अरह् आप्णें परंम पिता-पंण्मिश्वर के सहाँम्णें तुवाँरे बिश्वाष के काँम-अरह् प्यारों के मेंहन्त्त अरह् अमाँरे प्रभू यीशू मसीया दे अटल भोर्षे के धिरज दे हमेशा चींत्ते थंह्।

⁴ हे भाऐ-बंईणों, पंण्मिश्वर के प्यारे लोगो, आँमें जाँणो, ऐ के तुँऐं चूणें-छाँटे अंदे लोग असो।

⁵ किन्देंखे के अमाँरी खुषख्बरी तुँओं कैई सिर्फ शब्द मात्र ही ने आथी, परह् शक्त्ति अरह् पबित्र-आत्त्मा दे, अरह् पाक्कै इरादे आरी पऊँची रंऐ; जेष्णों तुँऐं जाँणों ऐ के आँमें तुँवारी ताँईऐ तुँओं मुझी कैष्णें बंणी रंह् थिऐ।

⁶ तुँऐं बड़े कल़ेष दे पबित्र-आत्त्मा के मंजे आरी, बचन माँनींयों अमाँरी अरह् प्रभू की जैष्णी चाल चाल्दे लागे।

⁷ ऐथै तोड़ी के मकिदुनिया अरह् अख़ेया के बादे बिश्वाषी खे तुँऐं ऐक जाने-माँने बंणो।

⁸ किन्देंखे के तुवाँरे कागी शा ना के मकीदुनिया अरह् अख़ेया दा प्रभू का बचन शुँणाँया गुआ, परह् तुवाँरा बिश्वाष की जू पंण्मिश्वर गाशी असो, ढिको ऐजी ही चर्चा फऐली गऐ, के आँमों बुल्णों के जरूरत ही ने हई।

⁹ किन्देंखे के से आपु ही अमाँरे बारे दो बुलो, के तुँओं कैई अमाँरो आँणों केष्णों हुओ; अरह् तुँऐं केशे मुर्त्तियाँ छ़ुड़ियों पंण्मिश्वर के ढबे फिरे, जू जीऊँदे अरह् साच्चै पंण्मिश्वर की सेवा करह्।

¹⁰ अरह् तेसके बैटे का स्वर्गो शी आँणों की ताक दे रंह्, जेसी तिन्ऐं मँरे अंदे मुझ शा जीयाल़ा, मतल्व प्रभू यीशू, जू आँमों पंण्मिश्वर के तियों सजा शे बंचाव जू संभी पापी गाशी पढ़णों वाल़ी असो।