1 पतरस 2 - Sirmouri

जीऊँदा अट्ल़ पाथर अरह् पबित्र परजा

¹ ईन्देंखे बादी साँत्त-भाँत्ती बुराई अरह् बईर भाव, छल़-कप्ट, जल़्ण-डाह्, अरह् नीदया-चुगली आपु शी दुर्की करह्,

² जेष्णें नुऐं जन्में नहाँन्ड़िया के दूधो की हिछ़या हों, तेष्णीं ही तुँऐं भे शुद्ध आत्त्मिक दूध की हिछ़या करह्; तिन्दे लई तुँवारी बड़ोत्री अरह् छूट्कारा हों।

³ तुँओं कैई पता लागी रूआ, के प्रभू कैत्रा भला असो।

⁴ प्रभू यीशू मसीया के नंजीक आओ। से जीऊँदा पाथर जेष्णाँ असो। तिनू संईसारी के लोगे निकारा बाँणा, परह् जू पंणमिश्वर खे किम्मत्ती असो, अरह् जिनू तिन्ऐं आपु चूंणी-छ़ाँटी थुऐ।

⁵ तुँऐं भे जीऊँदें पाथरो जेष्णें बंणों, के आत्त्मिक देऊँठी के जेष्णें बंणाऐं ज़ाव; जू ऐक ऐशा पबित्र याजकों का समाज बंणियों सेवा करी सको, जिनका फर्ज ऐशे ऐशे आत्त्मिक बल़ीदाँण चढा़ऐया करह्, जू प्रभू यीशू मसीया के जाँणें पंणमिश्वरो के भाँव।

⁶ किन्देंखे के पबित्र-ग्रन्थों दो लिखी थो: “दे:खो, मुँऐं सिय्योन दा ऐक कुँणें कंडवारे का पाथर थऐ लुवा, जू चुणाँ-छाटा अंदा अरह् किम्त्ति पाथर असो: अरह् जू कुँऐं तिनू गाशी बिश्वाष करला, से कद्दी भे शर्मिन्दा ने हंदी।”

⁷ तअ: तुँओं लोगो खे जू बिश्वाष करह्, सेजा पाथर बैजाऐ किम्त्ति असो, परह् जू विश्वाष ने कर्दे तिनखे, पबित्र-ग्रन्थों दो ऐशो बुलो, के “बाड़िऐ जेसी पाथर निकाँमा बाँणीं थुवा थिया, सेजा ही पाथर कुँणे का कंडवारा बंणा,”

⁸ अरह् से बंणा: “ऐक पाथर जिन्दे शा लोगो के ढैस लागो, अरह् ऐशी कऐड़ जिन्दे गाछ़ै लोग ऊँदे रंड़को;” लोगो के ढैस लागो, किन्देंखे के से पंणमिश्वर के बचन का पाल़्ण ने कर्दे, अरह् बस ऐजो ही तिनखे बाँणी थो।

⁹ परह् तुँऐं ऐक चुणा-छाटा अंदा बंष अरह् राज-पाट लुऐं अंदे याजकों का समाज, अरह् पबित्र लोग, अरह् (पंणमिश्वर) की प्रभू यीशू के आप्णी परजा असो, ईन्देंखे के जिन्ऐं तुँओं ईनाँरे मुझ्शे आप्णी चंम्तकारी प्रकाष दे बय्दी थुऐ, तिनके गुण पर्गट करह्।

¹⁰ ऐक बख्त थिया, जबे तुँऐं पंणमिश्वर की परजा ने थी; परह् ऐबे तुँऐं पंणमिश्वर के परजा असो। आगे तुँओं गाशी दया-रंय्म ने करी थई थी; परह् ऐबे तुँओं गाशी दया-रंय्म करी थऐ।

मसीया की जुम्मेबारी

¹¹ हे प्यारों, हाँव तुँओं शी अरज करू के तुँऐं आपु खे प्रदेशी अरह् मुसाफर जाँणियों ईयों संईसारी की बुरी हिछ़या शे दुर्के रूऐ; जू तुँवारी आत्त्मा आरी ज़ूद्ध करह्।

¹² अ-बिश्वाषी आरी तुवाँरा चाल-चल़्ण आछा हों; जू जिन-जिन बातो दे से तुँओं कू-कर्मी जाँणियों बदनाँम करह्, से तुँवारी भली काँम-काज़ दे:खियों तिन्दी के जाँणें कृपा दृष्टी के देसे पंणमिश्वर की बड़ियाऐ करह्।

हाक्मों के बषं दे रंह्

¹³ प्रभू खे ऐक नाँम आदमी हाक्मों के बष दे रूऐ,

¹⁴ राजा के बष दे ईन्देंखे, के से सोभी गाशी बड़ा माँना ज़ाँव। अरह् राज्यपाल के बष दे ईन्देंखे, के से कू-कर्णी कर्णो वाल़े खे सजा देंदा, अरह् आच्छ़ी कर्णी कर्णो वाल़े की तारीफ करदा तेसी राजा ऐ डियाल़े थुवा।

¹⁵ किन्देंखे के पंणमिश्वर के हिछ़या ऐजी असो, के तुँऐं भली आच्छ़ी काँम-काज़ के जाँणें मुरूख बै-अकले लोगो की बै-अकली बातो बंद करह्।

¹⁶ आपु-आप्खे अजाद जाँणों, परह् आप्णी अजादी बुराई कर्णो के आड़ ने बंणाँव; परह् आपु-आप्खे पंणमिश्वर के दास जाँणों।

¹⁷ सोभी की आदर करह्, बिश्वाषी भाऐ आरी पियार थुऐ, पंणमिश्वर दे डरे, राजा का आदर करह्।

मसीया अमाँरे गुरू असो

¹⁸ हे दासों, साँत्त-भाँत्ते डर-भऐ, आरी आप्णें स्वामियों के बंष दे रंह्, ना सिर्फ तिनके जू भले, अरह् निम्ताई वाल़े हों, परह् तिनके भे जू कुठूर हों।

¹⁹ किन्देंखे के जे कुँऐं पंणमिश्वर का बिचार करियों अ-नियाऐं शा दु:ख भूगदे कल़ेष सह्दा रंह् तअ ऐजो आछो असो।

²⁰ किन्देंखे के जे तुँऐं पाप करियों घूसै-मुँकिऐं खाई, अरह् सबैर मारा, तअ तिन्दी किऐ बड़ी बात ने आथी; परह् जे भली काँम-काज़ करियों कुँऐं दु:ख भूगौ, अरह् सबैर माँरो तअ ऐजो पंणमिश्वर के भे भाँव ऐ।

²¹ अरह् तुँओं ईन्देखे बय्दी थुऐं, किन्देंखे के मसीया भे तुँवारी ताँईऐं दु:ख भूगियों तुँओं खेे ऐक शीख देऐ थऐ, के तुँऐ भे तिनके नंक्क्षे-कदम गाशी चालो।

²² ना तअ तिन्ऐ पाप करा, अरह् ना तिनकी मुँह ज़ात्ती शी छल़-कप्ट, की बातो नीकल़ी।

²³ से गाल़ी शुणियों गाल़ी ने दियों थिऐ, अरह् दु:ख भूगियों कोसी खे धम्मकी ने दियों थिऐ, परह् आपु-आप्खे साच्चै नीयाऊँच़ू के हाथो दा देऐ दिता।

²⁴ से आपु ही अमाँरे पाप आप्णे देह्-शरीर दे निईयों शुँल़ी-फ़ाँशी हुटे, जिन्दे लई आँमें पापो खे मरियों धार्मिक्त्ता खे जीवन बिताँव: तिन्ही की ही मार खाँणों शे आँमें चाँगे हुऐ।

²⁵ किन्देंखे के तुँऐं आगे तअ भट्की अंदी भैढ़ो जेष्णें थिऐ, परह् ऐबे आप्णी आत्त्मा के रख्वाल़े अरह् बड़े हाक्मों कैई पाछू आऐ रूवे।