1 यूहन्ना 5 - Sirmouri

संईसारी जीत्ती पाँणी

¹ जैस्का ऐजा बिश्वाष असो, के प्रभू यीशू ही मसीया असो, तअ सेजा पंण्मिश्वर की अलाद असो; अरह् जुण्जा कुँऐं आप्णें परमं-पिता पंण्मिश्वर शो पियार करह्, तअ से तैस्की अलादी आरी भे पियार करह्।

² पंण्मिश्वर के अलाद हंणों का ऐजा परमाँण असो, के आँमें तिनशो पियार करह्; अरह् सेजो पियार तिनकी अज्ञाँ का पाल़्ण कर्णो के ही जाँणें पुरा हों।

³ पंण्मिश्वर की अज्ञाँ का पाल़्ण करणा ही पंण्मिश्वर शो पियार कर्णों का परमाँण असो, परह् तिनकी अज्ञाँ कठींण ने आथी;

⁴ जुण्जा पंण्मिश्वर शा पय्दा हऐ रूवा, से संईसारी गाशी जीत्त पाँव; ऐजी जीत्त जुण्जी संईसारी गेशी जीत्ती रंऐ, से ऐजी असो: मतल्व अमाँरा बिश्वाष ही जीत्त असो।

⁵ कुँण असो सेजा जू संईसारी गाशी जीत्त पाँव? कियों सेजा ही आथी ने जू ऐजा बिश्वाष करह्, के प्रभू यीशू मसीया ही पंण्मिश्वर का बैटा असो?

प्रभू यीशू मसीया के बारे दी गुवाऐ-शाज़्त

⁶ से सेजा ही असो, जू पाँणी अरह् लह्ऊँ के जाँणें पर्गट हुऐ, मतल्व प्रभू यीशू मसीया: तिनकी आँवणीं सिर्फ पाँणी लई ने परह् पाँणी अरह् लह्ऊँ दुई के जाँणें हऐ, जिन्दें की गुवाह्-शाज़्त पबित्र-आत्त्मा असो, किन्देंखे के पबित्र-आत्त्मा ही सच्चाऐ असो।

⁷ सच्चाऐ तअ ऐजी असो, के गुवाह्-शाज़्त च़ींन असो:

⁸ पबित्र-आत्त्मा, जल-पाँणी, अरह् लह्ऊँ, ऐजे च़ीन ऐक मत्त दे सहऐमंत्त असो।

⁹ जे आँमें आदमी की गुवाऐ-शाज़्त माँनी पाँव, तअ तबे पंण्मिश्वर के गुवाऐ-शाज़्त तअ तिन्दे शी आछ़ी अरह् बड़ी असो; किन्देंखे के ऐजी पंण्मिश्वर के गुवाऐ-शाज़्त असो, जुण्जी तिन्ऐं आप्णें बैटे के बारे दी देऐ थऐ।

¹⁰ जुण्जा कुँऐं पंण्मिश्वर के बैटे गाशी बिश्वाष करह्, तैस्दी ऐजी गुवाऐ-शाज़्त तैस्के सासो भीत्री चुप्पी हों, अरह् जैस्का बिश्वाष पंण्मिश्वर दा ने आथी, तेने तिनू झूठे बंणाँऐं दिते, किन्देंखे के तेने पंण्मिश्वर के सेजी गुवाऐ-शाज़्त जुण्जी तिन्ऐं आप्णें बैटे के बारे दी दिती थी, तियों गुवाऐ-शाज़्त गाशी तेने बिश्वाष ने करी।

¹¹ सेजी गुवाऐ-शाज़्त ऐजी असो: के पंण्मिश्वरे आँमों खे अमर-जीवन देऐ थुवा, किन्देंखे के सेजा अमर-जीवन तिनके बैटे दा असो।

¹² जैस्दा पंण्मिश्वर के बैटे का बास असो, तैस कैई अमर-जीवन असो; अरह् जैस्दा पंण्मिश्वर के बैटे का बास ने आथी, तैस कैई अमर-जीवन भी ने आथी।

सदा-सदा का जीवन

¹³ मुँऐ तुँओं खे ऐजो सब-कुछ ईन्देंखे लिखी थो, के तुँऐं जुण्जे पंण्मिश्वर के बैटे के नाँव अरह् हंक-अधिकार गाशी बिश्वाष करह्, से ऐजो जाँणी पाँव, के हमेशा खे सदा-सदा का अमर-जीवन तुवाँरा ही असो।

¹⁴ पंण्मिश्वर के बारे दा अमाँरा बिश्वाष ऐजा असो: के जबे आँमें तिनकी हिछ़या के मुताबिक किऐ बिनती ढाल-अरज करह्; तअ से बैटे के नाँव शी शुणी पाँव।

¹⁵ तअ जबे आँमें ऐजो जाँणो, के आँमें जू भी किऐं तिनकी हिछ़या शो माँगो, सेजो से आँमों खे देऐ दियों, तअ आँमें ऐजो भे जाँणों ऐ, के आँमें जुण्जो किऐ बिश्वाष शो माँगो, सेजो आँमों भेटी ज़ाँव।

¹⁶ जे कुँऐं आप्णा बिश्वाषी भाऐ के बईण ऐशा पाप कर्दे दे:खो, जिन्दें का नंतीजा मंऊँत्त ने हों; तअ तुँऐं तेसी भाई के बंईणी खे प्रार्थना करह्, तबे ही पंण्मिश्वर तिनखे जीवन देले, अरह् जिन्ऐं किऐ ऐष्णा पाप करी थुवा, जिन्दें का नंतीजा मंऊँत्त ने आथी, परह् ऐक ऐशा भे पाप असो, जिन्दें का नंतीजा सिर्फ मंऊँत्त ही असो, ऐष्णें पाप कर्णो वाल़े खे हाँव तुँओं खे प्रार्थना कर्णो खे ने बुल्दा।

¹⁷ ऐक नाँम अ-धर्म पाप असो, परह् ऐक ऐशा भे पाप असो, जिन्दे का नंतीजा सिर्फ मंऊँत्त ही असो।

¹⁸ आँमें जाँणों ऐ, के जू कुँऐं पंण्मिश्वर शा पय्दा हऐ रूवा, से पाप ने करदा रंह्दा; परह् पंण्मिश्वर का बैटा तैसी बंचाऐयों थंह्, अरह् सेजा शैतान तेसी छूई भे ने सक्दा।

¹⁹ आँमें जाणो ऐ, के आँमें पंण्मिश्वर के असो; अरह् बादी संईसारी तैसी शैतान के बष दी असो।

²⁰ आँमें ऐजी सच्चाऐ जाँणों ऐ, के पंण्मिश्वर का बैटा आऐ, अरह् आँमों खे ऐजी संम्झ दिती जू सच्चाऐ असो, आँमें तियों जाँणों, अरह् तिन्दें अट्ल़ पाक्के मंन दे बंणें रंह्, जू सच्चाऐ असो, मतल्व तिनके बैटा मसीया प्रभू यीशू शे ही सोतिखे पंण्मिश्वर अरह् सदा-सदा का अमर-जीवन असो।

²¹ हे प्यारे नहाँन्ड़िया, आपु आप्खे मुँर्तियों शे भचाऐयों थुऐ।