1 यूहन्ना 4 - Sirmouri

आत्त्माँओं की परख

¹ हे प्यारों, सोभी आत्त्मा का बिश्वाष ने करे, परह् आत्त्मा के परख करह्, के सेजी आत्त्मा पंण्मिश्वर की असो ऐ, के आथी ने; किन्देंखे के बैजाऐ झूठे ऋषी संईसारी दे ऋषी बंणियों चाल पड़े।

² पंण्मिश्वर की आत्त्मा तुँऐं ऐशी दाँई पछ़याँणी सको: के जुण्जी आत्त्मा ऐजो माँनी पाँव, के प्रभू यीशू मसीया स्वर्गो शे देह्-धारी आदमी का रूप धारियों संईसारी दे आऐ रूऐ; तअ सेजी ही पबित्र-आत्त्मा पंण्मिश्वर के आत्त्मा हों।

³ तैस्णी ही जुण्जी आत्त्मा, मसीया प्रभू यीशू ने माँन्दी, सेजी आत्त्मा पंण्मिश्वर की आत्त्मा ने आथी; सेजी आत्त्मा मसीया के बिरोधी बईरी की आत्त्मा असो, अरह् जिन्दें के चर्चा तुँऐ शुणी थऐ, के प्रभू आँणों वाल़े असो, अरह् ऐभी भी संईसारी दे ही असो।

⁴ हे प्यारे नहाँन्ड़िया, तुँऐं पंण्मिश्वर के असो, झूठे ऋषी तुँऐं हराऐ पाऐ; किन्देंखे के जुण्जा तुओं दा बास करह्, से तैच़्छ़ा बड़ा असो; जुण्जा संईसारी दा असो।

⁵ जुण्जे लोग संईसारी के हों, तिनकी बात-चीत्त भे संईसारी की ही हों, अरह् संईसारी भे तिनकी ही बातो दा आप्णा मंन लाँव।

⁶ आँमें पंण्मिश्वर के असो, अरह् जुण्जे कुँऐं पंण्मिश्वर जाँणों, से अमाँरी शुणो; परह् जुण्जें कुँऐं पंण्मिश्वर ने जाँण्दें, से अमाँरी भे शुण्दें ने। ईन्दी ही लई आँमें साच्ची अरह् झुठी आत्त्मा की पछ़याँण करी सको।

पंण्मिश्वर पियार असो

⁷ हे प्यारों, आँमें आपु मुँझी पियार थंह्; किन्देंखे के पियार पंण्मिश्वर शो भेटो। अरह् जू कुँऐं पियार करह्, से पंण्मिश्वर की अलाद असो, अरह् से पंण्मिश्वर जाँणों ऐ।

⁸ परह् जैस्दो पियार ने आथी, से पंण्मिश्वर शा अजाँण्दा असो, किन्देंखे के पंण्मिश्वर पियार असो।

⁹ आँमों मुँझी पंण्मिश्वर को पियार ऐशो दाई पर्गट हुवो; के पंण्मिश्वरे आप्णें ऐकलोता बैटा भे ईयों संईसारी दे ईन्देंखे डियाल़े, के आँमों तिनकी जाँणें अमर-जीवन भेटो।

¹⁰ पियार किऐ चींज ने आथी; पियार हों ऐ: पंण्मिश्वर आँमों शो पियार के जाँणें आप्णा बैटा अमाँरे पापों की पसतावे खे कुरबाँण बल़ी कराँणों खे डियाल़े—तिनू ईन्देंखे ने डियाल़ी, के आँमें पंण्मिश्वर शो पियार करी थो।

¹¹ हे प्यारों, जबे पंण्मिश्वर आँमों आरी ऐष्णों पियार करह्, तअ आँमों भे आपु मुँझी ऐष्णों ही पियार थंणों पड़ो।

¹² पंण्मिश्वर कद्दी भे कुँणिऐं ने दे:खी थई; जे आँमें आपु मुँझी पियार करह्, तअ पंण्मिश्वर आँमों दा बास करह्, अरह् तिनके पियार दे आँमें बिलकुल शुरे-पुरे संम्लित हऐ गुऐ।

¹³ ईन्दें लई ऐजो जाणी ज़ाँव के आँमें तिन्दा अरह् से आँमों दा बास करह्; किन्देंखे के तिन्ऐं आप्णी आत्त्मा आँमों खे देऐ थऐ।

¹⁴ आँमें ऐजो दे:खी थो, अरह् ईन्दें के गुवाऐ-शाज़्त भे असो, के पिता ऐ बैटा ईन्देंखे संईसारी दे छुट्कारे मंतल्व मुँक्त्ति देंदे डियाल़ी थुऐ थिऐ।

¹⁵ जुण्जा कुँऐं ऐजो मानी पाँव के प्रभू यीशू मसीया ही पंण्मिश्वर का बैटा असो, तअ से पंण्मिश्वर दा अरह् पंण्मिश्वर तैस्दा बास करह्।

¹⁶ आँमें आप्णें बारे दो पंण्मिश्वर को पियार जाँणी पाँव, अरह् तिन्दा बिश्वाष भे करह्, के पंण्मिश्वर पियार असो; अरह् जुण्जा कुँऐं पियार का पाक्का अट्ल असो, से पंण्मिश्वर दा भे पक्का अट्ल बंणा अंदा रंह्दा।

¹⁷ तअ आँमें नियाँव के देसो दी नींडरता मतल्व दीड़-हिम्मत हों; के संईसारी दा अमाँरा सभाव मसीया के सभाव के जैष्णा हों, जिन्दें का नंतीजा अमाँरा आपसी पियार संम्पुरता दा पक्का अट्ल़ हऐ रूवा।

¹⁸ प्यारों दा डर-भऐ ने हंदा, परह् साच्चो पियार डर-भऐ निकाल़ी दियों; किन्देंखे के डर-भऐ का ताल-मेल सजा शा हों, अरह् जू डर-भऐ दे हों, से पियार शे अजाद ने हऐ रंई।

¹⁹ आँमों दा पियार-भाव ईन्देंखे असो; के आगे तिन्ऐं आँमों आरी पियार करी थो।

²⁰ जे कुँऐं ऐशो बुलो, के “हाँव पंण्मिश्वर शो पियार करू” अरह् से आप्णे बिश्वाषी भाई-बंईणों दा शगाँऐयों तिनू आरी बईर करह्, तअ से झूठा असो; किन्देंखे के जेने आप्णे बिश्वाषी भाई-बंईणों दे:खियों भे तिनू आरी पियार ने करी, तअ पंण्मिश्वर शो जेसी तेने दे:खी ने थई, तैच़्छ़ौ से पियार करी सक्दा।

²¹ ऐजी अज्ञाँ आँमों तिन्ही कैई शी भेटी रंऐ, के जुण्जे पंण्मिश्वर आरी पियार करह्, से आप्णें बिश्वाषी भाई-बंईणों आरी भे पियार करह्।