1 यूहन्ना 2 - Sirmouri

मसीया अमाँरा साथी असो

¹ मेरे प्यारे नहाँन्ड़िया, हाँव ऐजी बातो तुँओं खे ईन्देंखे लिखू, के तुँऐं पाप ने करह्; अरह् जे कुँऐं किऐ पाप करह्, तअ स्वर्गो के परमं-पिता पंण्मिश्वर के साम्णें अमाँरे पापो शा बचाव कर्णो वाल़ा ऐक असो; अरह् सेजा असो धर्मी प्रभू यीशू मसीया।

² अरह् से ही अमाँरे पापो खे ऐक बल़ीदाँण असो, सिर्फ आँमों खे ही ने; परह् बादी संईसारी के पापो खे।

³ पंण्मिश्वर के अज्ञाँ का पाल़्ण करणा ईयों बातो का प्रमाँण असो, के आँमें पंण्मिश्वर जाँणी संम्झी पाया।

⁴ जू कुँऐं ऐजो बुलो, के “हाँव तिनू जाँणूऐं,” अरह् तिनकी अज्ञाँ ने से माँन्दा, तअ से झुठा असो; अरह् तैस्दी किऐ सच्चाऐ ने आथी;

⁵ परह् जू कुँऐं तिनके बचन दे चालो, तअ तैस्दो सोतिखे पंण्मिश्वर को पियार साचो हुओ। ईन्दी लई आँमें जाँणी पाँव, के आँमें तिन्दे बंसे अंदे असो:

⁶ जू कुँऐं ऐजो बुलो, के हाँव पंण्मिश्वर दा पाक्का असो, तअ तेसी प्रभू यीशू जैष्णाँ जीवन जीऊँणा पड़ो।

नंऐं अज्ञाँ

⁷ हे प्यारों, हाँव तुँओं खे किऐ नंऐं अज्ञाँ ने लिख्दा, परह् सेजी ही पुराँणी अज्ञाँ जू शुरू शी तुँओं भेटी रऐ; ऐजी पुराँणी अज्ञाँ सेजा बचन असो, जेसी तुँऐ शुणी थुवा।

⁸ तबे भे हाँव तुँओं खे नंऐं अज्ञाँ लिखू, अरह् ऐ तिन्दी अरह् तुँओं दी साची बंण्दी; किन्देंखे के ईनाँरो खत्त्म होंदो, अरह् सच्चाई का प्रकाष ऐबे चम्कोंदा लागा।

⁹ जुण्जा कुँऐं ऐजो बुलो, के हाँव ज्योत्ति-प्रकाष दा असो, अरह् तबे भे से आप्णें भाऐ बंऐणीं दा शंगाऐयों तिनशो बईर करह्, तअ से हेबी तोड़ी भे ईनाँरे दा ही असो।

¹⁰ जुण्जा कुँऐं आप्णे बिश्वाषी भाऐ बंऐणों आरी पियार करह्, से ज्योत्ति-प्रकाष दा रंह्, अरह् तैस्दी कद्दी भे ठूकर ने लागदी, अरह् ना से कद्दी धोखा खाँदा।

¹¹ परह् जुण्जा कुँऐं आप्णे बिश्वाषी भाई-बंईणों दा शंगाँव से ईनाँरे दा असो, अरह् से ईनाँरे दा चालो, किन्देंखे के तैस्के ईनाँरे आगु ने दे:खिंदो अरह् तैस कैई ऐजा भे पता ने लागदा के से कैशे खे ज़ाँदा लागा,

¹² हे प्यारे नहाँन्ड़िया, हाँव तुँओं खे ईन्देंखे लिखू, के प्रभू यीशू मसीया के नाँव शे तुवाँरें पाप माँफ हऐ रूऐ।

¹³ हे पुराणियों, हाँव तुँओं खे ईन्देंखे लिखू, के जू ज़ूगौ शो ऊबो असो, सेजो तुँऐं जाँणों ऐ। हे जुवाँनों, हाँव तुँओं खे ईन्देंखे लिखू, के तुँऐं तैसी शैतान गाशी जींत्त पाँऐ थऐ। हे प्यारे नहाँन्ड़िया, मुँऐं तुँओं खे ईन्देखे लिखी थो, के तुँऐं स्वर्गो के पिता के बारे दो जाँणी थो।

¹⁴ प्रभू दे नुऐं पय्दा हुऐं नहाँन्ड़िया, हाँव तुँओं खें ईन्देंखे लिखू, के तुँऐं पिता जाँणों ऐ, अरह् तुँऐं जुण्जे देह्-धारी पिता असो, तुँओं खे ईन्देंखे लिखू, के तुँऐं तिनू जाँणों ऐ, जुण्जे जूगौ शे आदि शे असो, तुँऐं जुण्जे जुवाँन असो, तुँओं खे ईन्देंखे लिखू, के तुँऐं तागतबर असो, पंण्मिश्वर के बचन तुँओं दा आप्णा बास करह्, जिन्दें लई तुँऐं शैतान हराऐ दिता।

संईसारी शो पियार ने करे

¹⁵ तुँऐं ना तअ संईसारी शो, अरह् ना संईसारी की कियों भी चींजो शो, पियार थुऐ। जे कुँऐं संईसारी शो पियार थंह्, तअ तैस्दो स्वर्गो के पिता को पियार ने आथी।

¹⁶ किन्देंखे के जुण्जो किऐ संईसारी दो असो, मतल्व देह्-शरीर की बुरी हिछ़या, अरह् आ:खी की बुरी हिछ़या, अरह् जीऊँणों का घमन्ड, से स्वर्गो के पिता की ढबे शा ने परह् संईसारी की ही ढबे शो हों।

¹⁷ संईसारी अरह् तिन्दे की हिछ़या दुईनें मिटी ज़ाँव, परह् जुण्जा पंण्मिश्वर की हिछ़या गाशी चालो, से सदा-सदा पंण्मिश्वर दा बंणा अंदा रंह्दा।

मसीया के बिरोधी शे च़क्क्ष

¹⁸ प्रभू दे पय्दा हुऐ नुऐं प्यारे नहाँन्ड़िया, ऐजा आखरी बख्त असो; अरह् जैष्णों तुँऐं शुणी थो, के मसीया का बिरोधी पर्गट हंणो वाल़ा असो; तिन्दे के मुताबिक ऐजो जाँणी पाव के ऐबे आखरी बख्त असो।

¹⁹ मसीया का बिरोधी आँमों ही मुँझ्शा असो, परह् से सोतिखे अमाँरा साथी ने, किन्देंखे के जे से सोतिखे अमाँरा साथी हंदा, तअ अमाँरी गईलो रंह्दा। परह् तेने आँमों छुड़ी दिते, जू से ऐजो दे:खाऐ सको, के तिन मुँझ्शा कुँऐं भे सोतिखे अमाँरा साथी ने आथी।

²⁰ परह् तुवाँरा राज-तिंलक तअ तेसी पबित्र मसीया प्रभू यीशू के जाँणें हऐ रूवा, जिन्दें के बारे दो तुऐं सुची भे ने थंई।

²¹ मुँऐं तुँओं खे ईन्देंखे ने लिखी थई, के तुँऐं सच्चाई ने जाँण्दे, परह् ईन्देंखे लिखी थो, के तुँऐं ऐजो जाणोंऐं, के झूठो, दी किऐ भे सच्चाऐ ने हंदी।

²² झूठा कुँण असो? सिर्फ सेजा जू ऐजो बुलो, के प्रभू यीशू मसीया आथी ने? अरह् मसीया का बिरोधी सेजा ही असो; जुण्जा स्वर्गो के पिता को अरह् बैटे को माँनणों दा भाजी ज़ाँव।

²³ जुण्जा कुँऐं बैटे को ने माँन्दा, तैस कैई स्वर्गो का पिता भे आथी ने: परह् जुण्जा कुँऐं बैटे को माँनी पाँव, तैस कैई स्वर्गो का पिता भे असो ऐ।

²⁴ ईन्दें का ख्याल थुऐ, के तुँओं दी सेजी ही शिक्क्षा पाक्की रंऐ च़ेंई, जुण्जी तुँऐं आगे शुभी शुणीं थऐ, अरह् जे तुँऐं तियों ही शिक्क्षा दे पाके अट्ल़ रंह्ले; तअ तुँऐं बैटे अरह् स्वर्गो के पिता दे भे बंणें अंदे रंह्दे।

²⁵ सदा-सदा का अमर-जीवन का बाय्दा भे तिनके ही जाँणें आँमों आरी करा गुवा थिया।

²⁶ ऐजो सब-कुछ मुँऐं तुँओं खे तबे लिखी थो, के कुँऐं तुँओं सच्चाई की बाटो शे भट्काणों के कोशिष करह्;

²⁷ परह् तुवाँरा राज तिलक जुण्जा तिनके जाँणें करा गुवा, सेजा तुँओं दा पाक्का अट्ल़ रंह; अरह् तेसी राज तिलक के असर लई, ऐजो जरूरी असो, के कुँऐ तुँओं खे किऐ ओकी शिक्क्षा ने दियों; किन्देंखे के जुण्जी शिक्क्षा तुँओं खे देऐ थऐ, अरह् जुण्जो तुँओं कैई शो शिखाऐ थो; सेजो साच्चो असो, अरह् तुँऐं तियों ही शिक्क्षा के मुँताबिक मसीया दे पाके अट्ल़ रंह।

पंण्मिश्वर की अलाद

²⁸ हे प्यारे नहाँन्ड़िया, तिन्दी पाक्के बंणें अंदे अट्ल़ रूऐ, के जबे प्रभू पर्गट हों, तअ आँमें निडर हुऐ चेंई, अरह् तिनके आँव्णों गाशी आँमें शर्मिन्दें ने हुऐ चेंई।

²⁹ जे तुँऐं ऐजो जाँणों ऐ के तुँऐं प्रभू दे धरमाँत्त्मा असो, तअ ऐजो भे जाँणीं पाव, के ऐक नाँम धरमाँत्त्मा आदमी भे तिन शे ही पय्दा हऐयों तिनकी ही अलाद असो।