1 यूहन्ना 1 - Sirmouri

नंमष्कार

¹ जीवन देणों वाल़े तेसी बचन के बारे दो, जुण्जा बचन आदी शा ऊबा थिया, जेसी बचन आँमें शुँणा, अरह् जेसी आँमें आप्णी आ:खिऐ मतल्व सुवाँ करियों दे:खा, अरह् जेसी आँमें आप्णें हाथे छुवाँ।

² जबे सेजा जीवन पर्गट हुआ, अरह् आँमें तेसी दे:खा, अरह् तिन्दे की गुवाऐ-शाज़्त दियों, अरह् तुँओं खे सेजा सदा-सदा का अमर-जीवन की खुषख्बरी दियों, जू सर्गो के परमं-पिता पंण्मिश्वर की गईलो थिया, अरह् जुण्जा आँमों गाशी पर्गट करा गुवा।

³ जू किऐ आँमें दे:खो, अरह् शुणी थुओ, तिन्दे की खुषख्बरी तुँओं खे भे दियों, ईन्देंखे के तुँऐं भे अमाँरी गईलो अमाँरे साजी बंणों; अरह् अमाँरो ऐजो साथ सर्गो के परमं-पिता पंण्मिश्वर अरह् तिनके बैटे प्रभू यीशू मसीया आरी असो।

⁴ अरह् ऐजी बातो आँमें ईन्देंखे लिखो, के अमाँरी खुशी पुरी हऐ ज़ाँव।

प्रकाष दो चाल्णों

⁵ जुष्जी खुषख्बरी आँमें तिन कैई शी शुणी थऐ, अरह् सेजी ही खुषख्बरी आँमें तुँओं कैई शी शुणाँव, से ऐजी असो, के पंण्मिश्वर प्रकाष असो, अरह् तिन्दो किऐ भे ईनाँरों ने आथी।

⁶ जे आँमें बुलो, के तिनकी गईलो आँमें साजी असो, अरह् तबे भे आँमें ईनाँरे दे चालो, तअ आँमें झूठे असो, अरह् आँमें सच्चाई दे ने चाल्दे;

⁷ परह् जे जैष्णें से प्रकाषो दे असो, तैष्णें ही आँमें भे प्रकाषो दे चालो, तअ ओका ओकी का साजी बंणों, अरह् पंण्मिश्वर के बैटे प्रभू यीशू को लह्ऊँ आँमों सोभी पापो शे शुद्ध करह्।

⁸ जे आँमें ऐजो बुलो, के आँमों दो किऐ पाप ने आथी, तअ आँमें आपु आपू खे धोखा दियों; अरह् आँमु दी किऐ सच्चाऐ ने आथी।

⁹ जे आँमें आप्णे पाप कबूल करियों मानी पाँव, तअ से अमाँरे पाप माँफ करियों अरह् आँमों सोभी अ-धर्मो शे शुद्ध कर्णो खे प्रभू यीशू बिश्वाष ज़ूगै अरह् धर्मी असो।

¹⁰ जे आँमें बुलो के आँमें किऐ पाप ने करी थई, तअ आँमें तिनू झूठे बाँणों; अरह् तिनका बचन आँमों दा बसा अंदा ने आथी।