1 कुरिन्थियों 9 - Sirmouri

प्रभू यीशू के खास-चैले के हंक अरह् फर्ज

¹ कियों हाँव अजाद आथी ने? कियों हाँव प्रभू यीशू का खास-चैला आथी ने? कियों मुँऐ यीशू जुण्जा अमाँरा प्रभू असो दे:खी ने थई? कियों जुण्जी मुँऐं प्रभू खे मेंह्नत करी कियों तुऐं तिन्दें का फल़ आथी ने?

² जे हाँव ओकी खे प्रभू यीशू का खास-चैला ने आथी, तबे भे हाँव तुँओं खे तअ जरूर असो; किन्देंखे के तुँऐं प्रभू खे तिन्दें का सबुत असो।

³ जुण्जे मुँह परखो, तिनखे मेरा ऐजा ही जबाब असो।

⁴ तुँओं कैई शी किऐ मदत माँगणी अमाँरा हंक-अधिकार आथी ने?

⁵ कियों आँमों खे ऐजा हंक-अधिकार आथी ने, के कोसी मसीही धियाँन्टी आरी बियाह-शादी करियों तियों आरी रिटो-फिरंह्, जेष्णों के ओके प्रभू यीशू के खास-चैले अरह् प्रभू के भाऐ, अरह् कैफा करह्?

⁶ कियो सिर्फ मुँह अरह् बरनबास खे हंक-अधिकार आथी ने के कमाऐ कर्णी छुड़ी दियों।

⁷ ऐष्णा कुँण्जा फऊँजी असो, जू फऊँजी के सेंवा कर्दें आप्णा खर्च आपु करो? अरह् ऐष्णा कुँण जीम्मदार हला, जू दाख्ह-अंगुरोह् को खैच़ तअ लाँव ऐ, परह् तेसी खैच़ों का फल़ ने खाँदी? अरह् ऐष्णा कुँण भैड़वाल़ा, के गुवाल़ा, बकराल़ा हला, जू आप्णें लाई-सूई बईच़ी बुणेंरो को दूध ने पियों?

⁸ कियों मुँऐं ऐजी बातो आदमी हऐयों बुली लई? कियों निय्म दो भे ऐजो ही बुल्दे ने?

⁹ किन्देंखे के ऋषी-मूसा के निय्मों दो ऐजो लिखी ने थई, के “दाँव्ड़ी दे जुँडे अंदें बुल़्दो के ज़ात्ती दो छाबो ने लाऐ।” तअ कियो पंणमिश्वर सिर्फ बुल़्दो का ही फिकर करह्?

¹⁰ कियो तिन्ऐं अमाँरी ताँईऐं ऐजो बुली ने थई। होर, ऐजो आँमों खे ही लिखी थो, किन्देंखे के ऐजो जरूरी असो, के गाँवणों वाल़ा अरह् दाँव्ड़ी दा हाँड्णों वाल़ा ऐसी भुर्षें दे हों के आँमों भे ईन्दें शो किऐ भेट्दो ऐ।

¹¹ तअ: जबे के आँमें तुँओं खे आत्त्मिक चींजो बऐ थई, तअ कियो ऐजी किऐ बड़ी बात असो, के आँमें तुँओं कैई शी अमाँरी शारीरिक जरूरतो पुरी कर्णी चाँव।

¹² जबे ओकी का तुँओं गाशी ऐजा हंक-अधिकार असो, तअ कियों अमाँरा तुँओं गाशी इन शा जादा हंक-अधिकार आथी ने? परह् आँमें ऐजा हंक-अधिकार जताँदे ने; परह् आँमें सब-कुछ सह्ऐन करह्, के अमाँरे कारण मसीया की खुषख्बरी दी किऐ रूकाव्ट ने आँव।

¹³ कियो तुँऐं जाँण्दे ने, के जू कुँऐं देऊँठी दी सेंवा करह्, से देऊँठी की ही आऊँद्णी शो ही खाँव; अरह् जू कुँऐं पूजों की सेंवा करह्, से पूजों की आऊँद्णी दा भागी हिस्सेदार हों?

¹⁴ ऐष्णों ही प्रभू ऐ भे फरमाँऐं थों, के जुण्जे लोग खुषख्बरी शुणाँव, तिनका गुजारा भे तियों ही खुषख्बरी शुणाँणों शा हों।

¹⁵ परह् मुँऐ तुँओं गाशी ऐजा किऐ हंक-अधिकार के जताई, अरह् ना मुँऐं ऐसी मतल्व शी ऐजी पत्री लिखी थई; के तुँऐं मेरी ताँईऐं किऐ करह्, ईन्दें शो आछो तअ मेरो मरी ज़ाणों ही भलो असो; के कुँऐं मेरा ऐजा तुँओं गाशी हंणों वाल़ा तारीफ बैकार बंणाँव।

¹⁶ जे हाँव खुषख्बरी शुणाँऊँ, तअ ईन्दी किऐ बड़ी बात ने आथी; किन्देंखे के ऐजो तअ मुँखे जरूरी ही असो, जे हाँव खुषख्बरी ने शुणाँऊ तअ मेरो जीऊँणों बै-कार असो!

¹⁷ किन्देंखे के जे हाँव आप्णी हिछ़या शी खुषख्बरी प्रचार करू, तअ मुँह तिन्दे का प्रत्तिफल़ भेट्दा; अरह् जे हाँव आप्णी हिछ़या शा प्रचार ने करदा, तबे भे ऐजी मेरी जुमेंबारी असो।

¹⁸ तअ मुँखे कुँण्जा प्रत्तिफल़ असो? ऐजा के खुषख्बरी शुणाँणों खे प्रभू यीशू मसीया का प्रचार हाँव ऐई मुँझी मुफ्त शुणाँऊ; ऐथै तोड़ी के खुषख्बरी शुणाँणों का जू मेरा हंक-अधिकार असो, कियों हाँव सेजा भे सुवाँ करियों शुणाँऊ ने।

¹⁹ किन्देंखे के हाँव कोसी के बंष दा ने आथी, अजाद असो; तबे भे हाँव सोभी का दास-बैठू बंणाँ; किन्देंखे के हाँव भहिते लोग खीचियों लियाँऊ।

²⁰ हाँव यहूदी लोगो खे यहूदी जिया बंणा, जू हाँव यहूदी लोग जीत्तियों आँणू। अरह् जुण्जे लोग यहूदी-निय्मों के बष दे असो, तिनकी ताईऐं हाँव यहूदी-निय्मो के बष दा रूऐ बिना भे यहूदी-निय्मो दा रूवा, के तिनू खींचियों लियाँऊ।

²¹ जुण्जे ऋषी-मूसा खे भेटे गुऐ, अज्ञाँ-निय्म के बष दे ने आथी, हाँव तिन्खे पंणमिश्वर के निय्म शा अजाद ने, परह् मसीया के निय्म के बष दा असो; तबे भे तेष्णा बंणा, जू तिनू खीचियों आँणी सकू।

²² कंमजूरो खे कंंमजोर बणा, जू हाँव तिनू कंंमजोर लोग भे खींचियों लियाँऊ। हाँव सोभी आदमी खे सब-कुछ बंणा के कैशे ही दाँई भे हाँव कोसी ऐक खे छ़ूट्कारा देयाऐ सकूँ।

²³ हाँव ऐजो सब-कुछ खुषख्बरी की ताँईऐं करू, के ओकी आरी भे खुषख्बरी का हिस्सेदार बंणी ज़ाऊँ।

मसीही दौड़

²⁴ कियों तुँऐं जाँण्दे ने के रेस-दऊँड़ दे तअ बैजाऐ दऊँड़ो, परह् ईनाँम ऐके झोंणाँ नियों? परह् तुँऐं भे तियों रेस-दऊँड़ दे तिऐं दऊड़ो जू जित्ती ज़ाँव।

²⁵ ऐक नाँम माल मालिऐ दे बादे दाव लाँव, सेजे भे तेसी ताजो की ताँईऐं जू नाँष बाँन असो; परह् आँमें तअ तियों माँली जित्तणों खे दाव लाँव जू जीवन को मुँकुट-ताज असो, अरह् ना कोद्दी नाष होंदो।

²⁶ हाँव बिना तारगैट के आदमी जेष्णाँ ने दऊँड़्दा; हाँव बागुरी दी मुँकिऐ ने लाँदा।

²⁷ परह् हाँव आप्णी देह्-शरीर खे कष्ट देऐयों तियों आप्णें बष दी थंऊँ; के कोदी ऐशो ने हईयों के हाँव ओकी खे प्रचार करियों अरह् आपु तेसी प्रचारो के प्रत्तिफल़ शा बाँईडा ने होऊँ।