1 कुरिन्थियों 8 - Sirmouri

मुर्त्तियों खे चड़ाया गुवा भोग-भोजन के बारे दो

¹ ऐबे मुर्त्तियों के साम्णें चड़ाई अंदी बल़ी, के बारे दो आँमें जाँणों के आँमों सोभी कैई ज्ञाँन असो। अरह् ज्ञाँन लई तारीफ पय्दा हों; परह् पियारो लई आप्णी बड़ोत्री हों।

² जे कुँऐं ऐशो जाँणों के हाँव किऐ जाँणू ऐ, तअ जेष्णों तेने जाँणों चेंई, तैष्णों से हेभी तोड़ी ने जाँण्दा।

³ परह् जे कुँऐं पंणमिश्वर आरी पियार करह्, तअ पंणमिश्वर तेसी जाणों ऐ।

⁴ अरह्: मुर्त्तियों के साम्णें बल़ी करी अंदी चीजो खाणों के बारे दो, आँमें जाणों ऐ, के मुर्त्ती संईसारी दी किऐ चीज ने आथी; अरह् ऐकी के सुवाऐं कुँऐं ओका पंणमिश्वर ने आथी।

⁵ तबे भे अस्माँनों अरह् धर्ती गाशी बैजाऐ ईश्वर माने ज़ाँव, जैष्णे के बैजाऐ ईश्वर अरह् बैजाऐ प्रभू असो

⁶ परह् आँमों खे तअ ऐक ही पंणमिश्वर असो: मतल्व परंम-पिता पंणमिश्वर जिनके जाँणें बादी चींजो असो, अरह् आँमें तिनके ही असो। अरह् ऐक ही प्रभू असो, मतल्व प्रभू यीशू मसीया जिनके जाँणें बादी चींजो बंणी, अरह् आँमें तिन्हीं के जाँणें असो।

⁷ परह् सोभी कैई ऐजा ज्ञाँन ने आथी, परह् कुँऐं लोग तअ हेभी भी मुर्त्तियों खे बल़ी करी अंदी चीजो खाँव, अरह् तिनके बिचार कंंमजोर हंणों के जाँणें अशुद्ध गाँन्दे हऐ ज़ाँव।

⁸ भोजन आँमों पंणमिश्वर के नंजीक ने नींदा। जे आँमें खाँव ने तअ अमाँरा किऐ नुकसाँन ने आथी, अरह् जे आँमें खाँव तअ तिन्दें लई किऐ फाय्दा ने आथी।

⁹ परह् च़ौक्क्ष रूऐ! कद्दी ऐशो ने हऐयों, के तुँवारी ऐजी अजादी कोसी कंंमजोर आदमी खे ठोकर-ढैस का कारण ने बंणों।

¹⁰ किन्देंखे के जे कुँऐं तुँओं ज्ञाँनी आदमी मुर्त्तियों की देऊँठी दे, भोजन कर्दे दे:खो, अरह् से कुँऐं कंंमजोर बिचार का आदमी हों, तअ कियो तैस्के बिचारो दी मुर्त्तियों के साम्णें बल़ी करी अंदी चिजो खाणों के हिम्मत हंदी ने।

¹¹ ऐशा दाँई तेरे ज्ञाँन के जाँणें सेजा कंंमजोर बीचार वाल़ा भाऐ के बंईण जिनकी ताँईऐं मसीया मरे, तेसी आदमी को छत्तिया नाँष हंदी ने।

¹² ऐशा दाँई भाऐ के बंऐणीं के बिरूध पाप कर्णो खे अरह् तिनके कंंमजोर बिचार खे चोट पहुचाँणों, शी तुँऐं मसीया के बिरूध दा पाप करी ने।

¹³ ईन्देंखे जे भोजन के जाँणें मेरे भाऐ के बंऐणीं के ढैस-ठोकर लागो, तअ हाँव कद्दी भे कोसी कारण शा माँस ने खाँदी, कद्दी ऐशो ने हईयों के मेरे भाऐ की बंऐणी दी ढैस-ठोकर ने लागो, अरह् हाँव तिनके पाप का भागी ने बंणू।