1 कुरिन्थियों 3 - Sirmouri

कलीसिया दी गुट-बाजी की भरमार

¹ हे मेरे भाऐ बंईणों, हाँव तुँओं आरी तैष्णी बातों ने करी सकी जैष्णी की आत्त्मिक लोगो आरी करी ज़ाँव, परह् मुँऐं तैष्णीं बातो करी जैष्णी बै-बिश्वाषी लोगो आरी करी ज़ाँव, अरह् तिनू आरी करी ज़ाँव जुण्जे मसीया दे नहाँन्डिया जिऐ असो।

² मुँऐ तुँओं कैई शो दूध पियाव, नाँज ने खियाई; किन्देंखे के तुँऐं नाँज पचाऐं नें बल़ो थिऐ, परह् हेभी तोड़ी भे तुँऐं नाँज पचाऐं ने बल़्दे,

³ किन्देंखे के तुँऐं ऐभी तोड़ी भे बै-बिश्वाषी असो। हेबी भी तुँओं मुँझी डाह, झगड़े असो, तअ कियों तुँऐं हेभी तोड़ी भे आप्णा पाप मंऐं बिचार दे आथी ने? अरह् कियों तुँऐं हेभी भी आदमी के अज्ञाँ-निय्म दे चाल्दे ने?

⁴ किन्देंखे के जबे ऐक बुलो, के “हाँव पौलुस का खास-चैला असो,” अरह् ओका बुलो, के “हाँव अपुल्लोस का खास-चैला असो,” तअ कियों तुँऐं बिलकुल आदमी आथी ने?

⁵ अपुल्लोस कुँण असो? अरह् पौलुस का असो? सिर्फ पंणमिश्वर के दास, जिनके जाँणें तुँऐं बिश्वाष करा, जैष्णी के सेवा कर्णो के जुम्मेबारी प्रभू ऐ आँमों खे दिती।

⁶ मुँऐं लाया, अरह् अपुल्लोस ऐ तेसी पाँणी लई सिंजा, परह् सेजा बचन का पौद्धा पंणमिश्वरे बड़ाया।

⁷ ईन्देंखे ना तअ कुँऐं लाणों वाल़ा आथी, अरह् ना कुँऐं सिज्णों वाल़ा किऐ आथी, परह् सिर्फ पंणमिश्वर ही सब-कुछ असो, जू बड़ाणों वाल़ा असो।

⁸ बोणों वाल़ा, अरह् सिज्णों वाल़ा, दुईनें ऐक ही असो; परह् ऐक नाँम आदमी आप्णी ही मेंह्नत के हिसाब शा प्रत्ति-फल़ पाँदे।

⁹ किन्देंखे के आँमें तअ पंणमिश्वर आरी साथी काँम-काज़ कर्णो वाल़े असो, अरह् तुँऐं पंणमिश्वर की खेत्ती अरह् पंणमिश्वर की देऊँठी असो।

¹⁰ पंणमिश्वर की तियों कृपा के मुताबिक जुण्जा मुँखे दिता गुवा, मुँऐंं संम्झदार बाढ़ई की जेऐ पह्-नींव पाँऐ, अरह् ओका तिन्दें गाशी रंद्दा लाँव। परह् ऐक नाँम आदमी च़ौक्क्ष रूऐ के से तिन्दें गाशी केष्णा रंद्दा लाँव।

¹¹ किन्देंखे के तियों पह्-नींव के सुवाऐ जू आगे ही पाँऐ थऐ, अरह् से प्रभू यीशू मसीया असो, तिन्दे गाशी कुँऐं ओकी पह्-नींव ने पाँऐ सक्दा।

¹² जे कुँऐं ईयों पह्-नींव गाशी सुनौ-चाँदी के किम्त्ती पाथर के लाकड़ी के घास-भुस का रंद्दा थंह्,

¹³ तअ ऐकी नाँमों की काँम-काज़ का पत्ता लागदा; किन्देंखे के सेजो देस तेस्खे बुल्दो ऐ, ईन्देंखे के सेजो देस आगी आरी पर्गट होंदो, अरह् सेजी आग ऐकी नाँमों की काँम-काज़ के जाँच परख कर्दी के कैष्णी असो।

¹⁴ जेस्की काँम-काज़ तियों पह्-नींव गाशी पाक्की हली; तेसी ही प्रत्ति-फल़ भेट्दा।

¹⁵ जे कोसी की करियोंदी टह्ल बै-कार हंली तअ से जल़ी ज़ाँदी, अरह् तेस्का घाटा हंदा; परह् से आपु तअ बंच्ची ज़ाँदा; जेष्णाँ अगयाव मुँझ्शा जल़्दे-जल़्दे बंचो।

¹⁶ कियों तुँऐं जाँण्दे ने के तुँऐं पंणमिश्वर के देऊँठी असो; अरह् पंणमिश्वर के आत्त्मा तुँओं दी बास करह्?

¹⁷ जे कुँऐं पंणमिश्वर की देऊँठी नष्ट करला, तअ पंणमिश्वर तेसी नष्ट करला; किन्देंखे के पंणमिश्वर के देऊँठी पबित्र असो, अरह् सेजे तुँऐं असो।

¹⁸ कुँऐं आपु-आप्खे धोखा ने दिऐं, किन्देंखे के जे तुँओं मुझ्षा कुँऐं, ईयों संईसारी दा आपु-आप्खे ज्ञाँनी जाँणों, तअ तुँऐं संईसारी की नंजरी दे ज़ोगर मुरूख बोंणों, जू तुँऐं पंणमिश्वर की नंजरी दे ज्ञाँनी बंणले।

¹⁹ किन्देंखे के ईयों संईसारी का ज्ञाँन पंणमिश्वर की नंजरी दा मुरूख्ता असो, जैष्णों के पबित्र-ग्रन्थों दो लिखी थो, के “पंणमिश्वर ज्ञाँनी लोग तिनकी ही चलाकी दे फशाँऐं दियों”

²⁰ अरह् तबे, “प्रभू ज्ञाँनियों के बिचार जाँणों ऐ, के से बै-कार असो।”

²¹ ईन्देंखे कुँऐं नाँषबान आदमी गाशी तारीफ ने करे, किन्देंखे के सब-कुछ तुवाँरो असो:

²² का पौलुस, का अपुल्लोस, का कैफा, का संईसारी, का जीवन, का मंरण, का ऐजो जू होंदो लागो, अरह् का सेजो जू हंणों वाल़ो असो; ऐजो सब-कुछ तुवाँरो असो,

²³ अरह् तुँऐं मसीया के असो, अरह् मसीया पंणमिश्वर का असो।