1 कुरिन्थियों 16 - Sirmouri

यरूशलेम के बिश्वाषियों खे दाँण

¹ ऐबे तेसी दाँण-चाँन्दें के बारे दो जू पबित्र लोगो खे कठा करा ज़ाँव, जैष्णी अज्ञाँ मुँऐ गलातियों की कलीसियों खे देऐ थऐ, तैष्णों ही तुँऐं भे करे।

² हफ्ते के आगले देसे तुँओं मुँझ्शे ऐक नाँम आदमी आप्णी आऊँद्णी के हिसाब शो किऐ आपु कैई थुऐ, के तुँओं मेरे आँवणों गाशी चाँन्दा ने कठा करणा पड़ो।

³ अरह् जबे हाँव आँऊबा, तअ जिनू तुँऐं चहाले तेसी कैई हाँव पत्री डियाल़ी देऊँबा के से तुवाँरा दाँण यरूशलेम दा पंहिचाल़ो।

⁴ जे मेरो ज़ाँणों ठीक हुओं, तअ से मेरी गईलो ज़ाँदे।

संत्त-पौलुस के यात्रा के सूची सम्झी तियारी

⁵ हाँव मकिदुनिया बाटी तुँओं कैई आँऊबा, किन्देंखे के मेरे मकिदुनिया बाटी ज़ाँणों ही ऐ।

⁶ परह् हऐ सको के हाँव तुवाँरे ही कागी ठहरी ज़ाँऊ, अरह् शैल़े के देसो हीऊँदों तुँवारी ही कागी काटू, अरह् तबे जबे हाँव किऐ खे ज़ाँणों चहाँऊ, तअ तुँऐं मुँह तेथै खे पह्ऊँचाऐ दिऐ।

⁷ किन्देंखे के ऐबे हाँव तुँओं कैई शो बाटो पुडो भेटिणों ने चहाँदा; परह् मेरे भूर्षा असो, के जे प्रभू चहाँव तअ कुछ बख्तों तोड़ी हाँव तुँवारी गईलो रंह्दा।

⁸ परह् हाँव पिन्तेकुस्त तियारो तोड़ी इफिसुस दा रंह्दा,

⁹ किन्देंखे के मुँखे तेथै ऐक खास जरूरी सेंवा कर्णों का मोंका भेटी रूवा; अरह् तेथै मेरे कंऐयों बिरोध कर्णो वाल़े भे बैजाऐ असो।

¹⁰ जे तीमुथियुस आऐ ज़ाव, तअ दे:खे के से तुँवारी गईलो निडर रंह्; किन्देंखे के से मेरी जेऐ प्रभू के काँम-काज़ करह्।

¹¹ ईन्देंखे कुँऐं तेसी छूटा ने जाँणें, परह् तेसी सुवाँ करियों तेसी ढबे पहूचाल़ी दिऐ, के से मुँह कैई आऐ ज़ाँव; किन्देंखे के मुँऐ तेस्की बाट-बाट दे:खी लऐ, के से बिश्वाषी भाऐ आरी आँव।

¹² भाऐ अपुल्लोस शी मुँऐ बैजाऐ ढाल-अरज करी थऐ, के तुँओं कैई बिश्वाषी भाऐ आरी ज़ाँव; परह् तेने ऐसी बख्ते ज़ाँणों की किऐ भे हिछा ने करी थई, परह् जबे मुँका भेट्ला तअ से आऐ ज़ाँदा।

आखरी अज्ञाँ अरह् आशिर्बाद

¹³ बीऊँजी रूऐ, बिश्वाषो दे पाकै रूऐ, हिम्मत करह्, तागतबर बंणों।

¹⁴ जुण्जो किऐ करह् सेजो पियार शो करह्।

¹⁵ हे भाऐ बंईणों, तुँऐं स्तिफनास के घराना जाँणों ऐ, के से अखया ईलाके दे प्रभू गाशी बिश्वाष कर्णो वाल़े आगले फल़ असो, अरह् से पबित्र लोगो की सेवा कर्णो खे तियार रंह्।

¹⁶ ईन्देंखे हाँव तुँओं खे ढाल-अरज करू, के ऐष्णे के बष दे रूऐ, परह् तिनू ऐकी नाँमों के जू ईयों काँम-काज़ कर्णो खे मेंह्नत्त अरह् साजी असो।

¹⁷ हाँव स्तिफनास अरह् फूरतूनातुस अरह् अखइकुस के आँणों शा खुशी असो, किन्देंखे के तिनू ऐ तुँवारी कमी-घटी पुरी करी थऐ।

¹⁸ तिनू ऐ मेरी अरह् तुँवारी आत्त्मा खे चऐन दिती, ईन्देंखे ऐष्णे माँनी ऐ।

¹⁹ आसिया के कलीसिया की ढबे शी तुँओं खे नमंष्कार; अक्विला अरह् प्रिस्का का अरह् तिनकी घर की कलीसिया खे भे तुँओं खे प्रभू दा बैजाऐ-बैजाऐ नमंष्कार!

²⁰ बादे भाऐ बंईणों का तुँओं खे नमंष्कार। पबित्र खुप्टी देऐयों आपु मुँझी नमंष्कार करह्।

²¹ मुँऐं पौलुस ऐ आप्णे हाथे नमंष्कार लिखी थुवा।

²² जे कुँऐं प्रभू शो पियार ने करह्, तअ से निर्भाग असो। हे अमाँरे प्रभू आव!

²³ प्रभू यीशू की कृपा तुँओं गाशी हंदी रंह्।

²⁴ मेरो पियार मसीया यीशू दो तुँओं सोभी आरी रंह्। आमीन।