1 कुरिन्थियों 15 - Sirmouri

मसीया दुज़ाल़िऐं ऊबे जीऐ

¹ हे भाऐ, बंईणों, ऐबे हाँव तुँओं कैई शी सेजी ही खुषख्बरी शुणाँऊ, जुण्जी मुँऐं आगे भे शुणाँऐं थऐ, अरह् तुँऐं तियों खुषख्बरी माँनी भे थऐ, अरह् तुँऐं तिन्दें अट्ल़ भे असो।

² तियों ही खुषख्बरी के जाँणें तुवाँरे मुँक्त्ति भे हों; अरह् जे तुँऐं तियों ही खुषख्बरी दे अट्ल़ हों, जुण्जी मुँऐ तुँओं कैई शी शुणाऐ थऐ, तअ तुवाँरा बिश्वाष बै-कार ने ज़ाँदी।

³ ईन्देंखे मुँऐं आगे तुँओं कैई शी सेजी ही बात शुणाँऐ, जुण्जी आगे मुँह कैई शी शुणाँऐ गई; के पबित्र-ग्रन्थों के बचन के मुँताबिक मसीया अमाँरे पापो की ताँईऐं मारे गुऐ;

⁴ अरह् दाबी दिते, अरह् पबित्र-ग्रन्थों के हिसाब शे से च़ींज़े देसे ऊबे जीऊँदें हुऐ,

⁵ अरह् आगे से कैफा कैई शे अरह् तबे से तिनू बहारी खास-चैले कैई शे देखिऐं।

⁶ तबे से पाँच षौ शे जादा बिश्वाषी भाऐ बंईणों कैई शे ऐक साथ देखिऐ; जिन मुझ्शे ऐत्लो भे कऐयों लोग जींऊँदी असो, अरह् कऐयों लोग मरी गुऐ।

⁷ तबे याकूब कैई शे देखाईऐ, अरह् तबे से बादे प्रभू यीशू के खास-चैले कैई शे देखिऐं।

⁸ तिनू सोभी पाछी प्रभू यीशू मुँह कैई शे भे देखिऐं; जू हाँव सत्वाँसी का जिया असो।

⁹ किन्देंखे के तिनू प्रभू यीशू के खास-चैले मुँझ्शा हाँव सोभी शा छुट्टा असो, अरह् प्रभू यीशू के खास-चैला बुल्णों ज़ूगा भे हाँव आथी ने, किन्देंखे के मुँऐं पंणमिश्वर की कलीसिया सताऐ थऐ।

¹⁰ परह् हाँव जू किऐ भे असो ऐ, से पंणमिश्वर की कृपा शा असो; तिनकी कृपा जू मुँह गाशी हऐ से बै-कार ने गई; परह् मुँऐं तिनू सोभी शी जादा मेंह्न्त भे करी; तबे भे मेंह्न्त कर्णो वाल़ा हाँव ने परह् पंणमिश्वर असो, जिनकी कृपा मेरी गईलो रऐ।

¹¹ ईन्देंखे हाँव असो, भाँव सेजे ओके प्रभू यीशू के खास-चैले असो, आँमें बादे लोग ऐजी ही ऐक खुषख्बरी का प्रचार करह्, अरह् ईन्दा ही तुऐ बिश्वाष भे करी थुवा।

आँमें भे मरियोंं ऊबे जीऊँदे

¹² ईन्देखे जबे मसीया का ऐजा प्रचार करा ज़ाँव, के मसीया मरे अंदे मुझ्शे ऊबे जीऐ, तअ तुँओं मुझ्शे कुऐं लोग कैई बुलो, के मरे अंदे मुझ्शे कुँऐं जीऊँदे ने हंदी?

¹³ जे मरे अंदे ऊबे ही ने जीऊँदे, तअ मसीया भे जीऊँदे हई ने;

¹⁴ अरह् जे मसीया ऊबे ने जींऐं, तअ अमाँरा प्रचार करणा भे बै-कार असो, अरह् तुवाँरा बिश्वाष करणा भे बै-कार असो।

¹⁵ परह् आँमें पंणमिश्वर के झुठे गुवाह्-शाज़्त बंणें; किन्देंखे के आँमें पंणमिश्वर के बारे दी ऐजी गुवाह्-शाज़्त दिती, के मसीया ऊबे जीयाल़े गुऐ, ना तअ जीयाल़ी ने थई, जे मरे अंदे ऊबे ही ने जीऊँदे।

¹⁶ जे मुँड़्दे जीऊँदें ने, तअ मसीया भे जीऊँदें हई ने;

¹⁷ अरह् जे मसीया ने जींऐं, तअ तुवाँरा बिश्वाष भे बै-कार गुवा, अरह् तुँऐं हेभी तोड़ी भे आप्णें पापो दे फशे अंदे असो,

¹⁸ तअ जुण्जे मसीया दे बिश्वाष करियों हेबी तोड़ी मरी गुऐ, से भे नंष्ट हऐ गुऐ।

¹⁹ जे आँमें सिर्फ ऐसी ही जीवन दा मसीया का भूर्षा करह्, तअ आँमें सोभी आदमी शे जादा नींरभाग असो।

²⁰ परह् मसीया सत्तिखे मरे अंदे मुझ्शे ऊबे जियाल़ी थुऐ, अरह् ऊबे जियाल़े अंदे मुंझ्शे से आगला ही फल़ असो।

²¹ किन्देंखे के जबे आदमी के जाँणें मंऊँत्त आऐ, तअ आदमी ही के जाँणें मरे अंदे ऊबे भी जीयाल़े गुऐ।

²² अरह् जेष्णें आदम दे बादे नाँष बाँन देह्-शरीर दे मरी ज़ाँव, तेष्णें ही आँमें आत्त्मिक देह्-शरीर दे मसीया आरी ऊबे भे जियाल़े ज़ाँदे।

²³ परह् ऐक नाँम आप्णी बारी शे: आगला फल़ मसीया, तबे मसीया के आँणों गाशी तिनके लोग हंदे।

²⁴ तबे अंन्त्त हंदा। तेसी बख्ते सेजे बादे हाक्म, अधिकार, अरह् शक्त्ति का अंन्त्त करियों राज परमं-पिता पंणमिश्वर के हाथो दा देऐ देंदे।

²⁵ किन्देंखे के जाँव तोड़ी से आप्णे बादे बऐरी आप्णी लातो थाँई ने पाव, ताँव-तोड़ी प्रभू यीशू मसीया को राज कर्णो जरूरी असो।

²⁶ सोभी शा पाछे ही पाछे जुण्जा बऐरी नाँष करा ज़ाला, सेजी मंऊँत्त असो।

²⁷ किन्देंखे के “पंणमिश्वरे सब-कुछ तिनके लातो थाँई करी थो,” परह् जबे से बुलो, के सब-कुछ मेरे बष दो करी थों, तअ ऐजो जाँणों चग्रो असो के जिन्ऐं सब-कुछ तिनकी बष दो करो, से आपु तिन्दें शे ज़ई असो।

²⁸ अरह् जबे सब-कुछ तिनके बष दो करो, तअ बैटा आपु भे तिनके बष दा हंदा, जिन्दें लई सब-कुछ तिनके बंष दो करी दितो; जू सोभी दा पंणमिश्वर ही सब-कुछ हों।

²⁹ ना तअ जुण्जे लोग मरे अंदे खे नहाँण-नहाँव से का कर्दें? अरह् जे मुड़दे जीऊँदे हंदे ही ने, तअ तबे तिन्की ताँईऐं नहाँण कैई नहाँव?

³⁰ अरह् आँमें भी कैई हर बख्ते आप्णी जीयाँन खत्रे दी पाँव?

³¹ हे मेरे भाऐ बंईणों, मुँह तेसी तारीफ की शौह्, जू अमाँरे प्रभू यीशू मसीया दा हाँव तुवाँरे बारे दा करू, के हाँव रोज मंरू।

³² जे हाँव आदमी के हिसाब शा इफिसुस दा जानबरो आरी लड़ा तअ मेरे का फाय्दा हुआ? जे मुड़दे ऊबे ने जीयाल़े ज़ाव, “तअ आओ खाव-पीयों, किन्देखे के दोत्ती तअ मरी ही ज़ाँणों।”

³³ धोखा ने खाऐ, “बुरो साथ-हाथ आछा चाल-चल्ण बिगाड़ी दियों।”

³⁴ धर्म की ताँईऐं ऊबे बीऊँजो अरह् पाप ने करह्; किन्देंखे कोंऐ ऐशे भे असो, जू पंणमिश्वर जाँण्दें ही ने। हाँव तुँओं शर्मिन्दें कर्णो खे ऐजो बुलू।

ऊबे जियोंणों के देह्-शरीर

³⁵ ऐबे कुँऐं ऐजो बुलो, के “मुँड़्दे किऐ-किऐ ऊबे जीऊँदे, अरह् कैष्णी देह्-शरीर दे पाछू आँदे?”

³⁶ ओ बै-अक्ले! जुण्जो किऐ तू जीम्मी दो बंई, जाँव तोड़ी से मरी ने ज़ाव, ताँव-तोड़ी से ऊबो ने जाँम्दो।

³⁷ अरह् जू तू बोऐ ज़ाँव, से सेजी देह्-शरीर ने आथी, जू पय्दा हंणों वाल़ी असो, परह् से ऐक नाँजों को गुल़टू हों, भाँव गींऊँ को भाव कोसी ओकी नाँजो के हों।

³⁸ परह् पंणमिश्वर आप्णी ही हिछ़या के मुँताबिक तेस्खे देह्-शरीर दियों, अरह् ऐक नाँम बीज़ो खे तिनका ही ऐक खास सरूप दिया ज़ाँव।

³⁹ बादी देह्-शरीर ऐक भाँत्ती ने आथी: आदमी की देह्-शरीर ओकी असो, अरह् पोशु-बईच़ी की देह्-शरीर ओकी असो, अरह् पक्क्षी की देह्-शरीर ओकी असो; अरह् माँछी की देह्-शरीर ओकी असो।

⁴⁰ स्वर्गो के देह्-शरीर ओकी असो, अरह् नाँष बाँन देह्-शरीर ओका। परह् स्वर्गीऐ देह्-शरीर का तेज-प्रकाष असो, अरह् नाँष बाँन देह्-शरीर का तेज-प्रकाष ओका असो।

⁴¹ सूर्जो का तेज-प्रकाष ओक-भाँता हों, अरह् चाँद-टीकी का तेज-रूष्णी ओक-भाँती हों, अरह् तेष्णा ही तारे-गंण का तेज-प्रकाष भे साँत्त-भाँत्ता हों, किन्देंखे के ऐकी तारे का ओकी तारे के तेज-प्रकाश दा भे फरक हों।

⁴² मुड़दे को ऊबो जीऊँणों भी तैष्णों ही असो; देह्-शरीर नाँष बाँन दषा दी बऐ ज़ाँव, अरह् अ-बिनाँषी रूप दी ऊबी जींयों।

⁴³ तियों बिना आदर दी बऐ ज़ाँव, अरह् त्तेज-प्रकाषो आरी ऊभी जींयों; अरह् कंम्जूरी आरी बऐ ज़ाँव अरह् से शक्त्ति आरी ऊबे जींयों।

⁴⁴ नाँष बाँन आँम देह्-शरीर बऐ ज़ाँव, अरह् आत्त्मिक देह्-शरीर ऊभी जींयों: जबे नाँष बाँन देह्-शरीर असो, तअ आत्त्मिक देह्-शरीर भे जरूर असो।

⁴⁵ पबित्र-ग्रन्थों दो लिखी भे थो, के “आगला आदमी, मतल्व आदम जीऊँदा जींव बंणा” अरह् आखरी आदम जीवन देणों वाल़ी आत्त्मा बंणी।

⁴⁶ परह् आगला आदमी आत्त्मिक ने थी; परह् आँम आदमी थिया, ईन्दें पाछी आत्त्मिक बंणा।

⁴⁷ आगले आदमी आदम की रंच्णाँ धर्ती की माँटी लई करी गऐ; परह् दुज़ा आदमी स्वर्गो का थिया।

⁴⁸ अरह् जेष्णाँ आगला आदमी माँटी का थिया, तेष्णें ही ईयों सईसारी के बादे लोग भे माँटी के असो; जेष्णाँ ओका आदमी स्वर्गो का थिया, तेष्णे ही सेजे भे असो, जू आत्त्मिक सर्गो के असो।

⁴⁹ अरह् जेष्णाँ आँमें तेस्का रूप धारण करा, जू सेजा माँटी का थिया, तेष्णा ही तिनू स्वर्गो वाल़े का रूप भे आँमें धारण कर्दे।

⁵⁰ हे मेरे भाऐ बंईणों, हाँव ऐशो बुलू, के माँस अरह् लह्ऊँ पंणमिश्वर के राज्य को हंकदार ने हऐ सक्दो; अरह् ना नाँष-वाँन, अ-बिनाँषी का हंकदार बंणी सक्दा।

⁵¹ दे:खो, हाँव तुँओं कैई ऐक राज भेद् की बात बुलू: आँमें बादे ने मर्दे परह् बादे बद्ल़ी ज़ाँदे,

⁵² अरह् ऐजो पल्क-झप्कदे ऐगड़ी खे होंदो, अरह् आखरी तुरही-रंणशिन्गों फुक्रो ज़ालो, अरह् तियों तुरही-रंणशिंगों फुकर्दे ही मुड़्दे अभिनाँषी देह्-शरीर की दषा दे ऊबे बीऊँदे, अरह् आँमें बादे बद्ल़ी ज़ाँदे।

⁵³ किन्देंखे के ऐजो जरूरी असो, के सेजी नाँष बाँन देह्-शरीर, अभिनाँषी देह्-शरीर धारण करह्, अरह् ऐजी मंर्णों वाल़ी देह्-शरीर अमर हंणों वाल़ी देह्-शरीर धारण करह्।

⁵⁴ अरह् जबे ऐजी नाँष बाँन देह्-शरीर अभिनाँषी देह्-शरीर धारण करी पाली, अरह् जबे ऐजी मंर्णों वाल़ी देह्-शरीर अमर हंणों वाल़ी देह्-शरीर धारी पाली, तअ सेजा बचन जू पबित्र-ग्रन्थों दा लिखी, थुवा से पुरा हऐ ज़ाँदा: “जींवन ऐं मंऊँत्त भे घुटी पाँऐ।

⁵⁵ हे मऊँत्त, तेरी जींत्त केथै रंऐ? ओ मंऊँत्त तेरा डंक केथै रूआ?”

⁵⁶ मंऊँती का डंक पाप असो, अरह् पाप के तागत ऋषी-मूसा खे भेटे गुऐ, अज्ञाँ-निय्म असो।

⁵⁷ परह् पंणमिश्वर का धन्यबाद हों, जू अमाँरे प्रभू यीशू मसीया के जाँणें आँमों जींताँव भेटा।

⁵⁸ ईन्देंखे हे मेरे प्यारे भाऐ बंईणों पाके, अट्ल़, डटेअंदे रूऐ, अरह् तुऐं प्रभू की काँम-काज़ कर्णो खे बड़दे ज़ाव, किन्देंखे के तुँऐं ऐजो जाँणों ऐ, के तुऐं जू प्रभू खे मेंह्नत्त करी लऐ से बै-कार ज़ाँदी ने।