1 कुरिन्थियों 13 - Sirmouri

पियार सोभी शो जादा आछो असो

¹ जे हाँव आदमी अरह् स्वर्गदूत्तो की बुली बुलू, परह् पियार ने करू, तअ हाँव ठंणठणाँदों पीतल, अरह् छण-छणाँदी खाँजरी असो।

² अरह् जे हाँव बरंम्बाणीं करी सकू, अरह् बादे भैद् अरह् साँत-भाँते ज्ञाँन जाँणू सम्झू, अरह् मुँह ऐथै तोड़ी पुरा बिश्वाष हों, के हाँव धार-टिम्बड़ी भे हटाऐ देऊँ, अरह् हाँव पियार ने करू, तअ हाँव किऐ ने आथी।

³ जे हाँव आप्णी बादी घरोवची कंगाल-गरीबो कैई शी खियाऐं देऊँ, के आप्णी देह्-शरीर जल़ाणों खे देऐ देऊँ, अरह् पियार ने करू, तअ मेरा किऐ फाय्दा ने आथी।

⁴ पियार सबैर असो, अरह् कृपा कर्णो वाल़ा असो; पियार डाह्-जल़्ण ने करदा; पियार आप्णी बड़ियाऐं ने करदा, अरह् शियाँगिन्दा ने आथी,

⁵ से गलत चाल ने चाल्दा, से आप्णी भलाऐ ने चहाँदा, से घिप्दा-काँणिंदा ने, से बुरो ने माँन्दा।

⁶ पियार की खुशी कू-कर्म दी नें, परह् सच्चाई दी असो।

⁷ से बाद्दी बातो सऐन करह्, सोभी बातो का बिश्वाष अरह् सोभी वातो का भोर्षा करह्, अरह् सोभी बातो दा सबैर मारो।

⁸ पियार कद्दी-कद्दी भे टल़्दो ने; भर्मबाँणी हों, तअ से खत्त्म हंदी; भाषा हों, तअ से भे ज़ाँदी रंह्दी; अरह् जे ज्ञाँन हों, तअ से भे मिटी ज़ाँदा।

⁹ किन्देंखे के अमाँरा ज्ञाँन आधा-अ-धुरा असो, अरह् अमाँरी, बरंम्बाणीं भे आधी-अ-धुरी असो;

¹⁰ परह् जबे सर्वसिद्ध आले, तअ आधो-अ-धुरो सब पुरो-शुरो हंदो।

¹¹ जबे हाँव बालक थिया, तअ हाँव बालक जिया बुलाँऊ थिया, मेरा बालक का जिया मंन थिया, मेरी बालक की जेऐ संम्झ थी; परह् जबे हाँव बड़ा हऐ गुआ, तबे मेरी बालक की जेऐ आद्त छुटी गई।

¹² हेभी अमाँरे सीसे दो झाँमंरो दे:खियों, परह् तेसी बख्ते आँम्णें-सहाँम्णें दे:ख्दे: ऐसी बख्ते मेरा ज्ञाँन आधा-अ; धुरा असो, परह् तेसी बख्ते सुवाँ करियों पछ़याँणुबा, जेष्णाँ मुँह पछ़याँणा गुवा।

¹³ परह् ऐबे बिश्वाष, भूर्षा, अरह् पियार, ऐजे चींन्ने अट्ल़ असो, परह् ईन्दों सोभी शो जादा पियार बोढ़ो असो।