1 कुरिन्थियों 11 - Sirmouri

¹ तुँऐं मेरी जेऐ चाल-चालो, जेष्णी हाँव मसीया की जेऐ चाल चालू।

तिरंई अराधना दो मूँड खट्णों पड़ो

² हे भाईयों-बंईणों, हाँव तुँओं खे शबाषी देऊँ, के बादी बातो दा तुँऐं मुँह चीते थंह्; अरह् जुण्जे भुवार मुँऐं तुँओं कैई शे शुणाँऐं थुऐ, तुँऐं तिन्दे का ही पालन करे।

³ परह् हाँव ऐजो चहाँऊ, के तुँऐं ऐजो जाँणी पाव, के ऐक नाँम मंर्दो को मुँढ मसीया असो, अरह् ऐक नाँम तिरंई को मुँढ मरोद् असो; अरह् मसीया को मुँढ पंणमिश्वर असो।

⁴ जू मरोद् मूँड खटियों प्रार्थना के बरंम्बाणीं करह्, से आप्णें मुँढों के बैस्त्ती करह्।

⁵ परह् जुण्जी तिरंई नाँगी मुँडे प्रार्थना के बरंम्बाणीं करह्, से आप्णे मुँढों के बैस्ती करह्, किन्देंखे के से खुरमुँडी के जैष्णी हंदी।

⁶ जे तिरंई आप्णें मुँढों गाशी चुनी के ढाँठू ने लाँव, तअ से आप्णे बाल़ भे लुणाँऐयों खुरमुँडी बाँणों, अरह् जे से बाल़ लुणाँणें के खुरमुँडी बाण्णों दी आप्णी बैस्ती जाँणों, तअ से आप्णें मूँडो गाशी चुन्नी के ढाँठू लाँव।

⁷ होर, मर्दो खे मूँड खट्णों ठीक ने आथी, किन्देखे के से पंणमिश्वर का सरूप अरह् बड़ियाऐ असो; परह् तिरंई मर्दों की बड़ियाऐ असो।

⁸ किन्देंखे के मरोद् तिरंई शे ने पय्दा हऐ रंई, परह् तिरंई मर्दों शी पय्दा हऐ रंई;

⁹ अरह् मर्दों के रंच्णा तिरंई की ताँईऐं ने करी थई, परह् तिरंई के रंच्णा मर्दों की ताँईऐ करी थऐ।

¹⁰ ईन्देखे स्वर्गदूत्त हाजिर जाँणियों तिरंई खे ऐजो ठीक असो, के से आप्णा हंक-अधिकार आपु आप्णें बष दा थो। चींन ऐजा ही थंह् के आप्णें मूँडो गाशी ढाँटू के चूँनी लाँव।

¹¹ तबे भे प्रभू दी नाँ तअ तिरंई मंर्दो के बीना किऐ आथी; अरह् नाँ मंरोद् बीना तिरंई के किऐ आथी।

¹² किन्देंखे के जैष्णी नाँरी मर्दों शी पय्दा हऐ, तेष्णें ही पुरूष भे तिरंई शे पय्दा हुऐ; परह् सचाऐ तअ ऐजी असो, के सब-कुछ बादी चिजो पंणमिश्वर शी ही पय्दा हऐ रंई।

¹³ तुँऐं आपु सुचों: कियों नाँगें मुँडे तिरंई पंणमिश्वर शी प्रार्थना कर्दें आच्छ़ी लागो?

¹⁴ कियो तुँऐं ऐई भे जाँण्दें ने, के पुरूष खे लाँम्बें बाल़ थंणें बैस्त्ती सरमी की बात आथी नें?

¹⁵ तिरंई लाँम्बे बाल़ थऐयों शुभाल़ी लागो; किन्देंखे के सेजे बाल़ तियों खे ढाँटू चूँनी जैऐ असो,

¹⁶ परह् जे कुँऐं ईयों बातो गाशी बाद-बिबाद करह्, तअ ऐजो जाँणी पाँव के ना तअ अमाँरे अरह् ना किऐ पंणमिश्वर की कलीसियों के ऐजा रूवाज आथी।

प्रभू भोज के बारे दो

¹⁷ परह् ऐजी अज्ञाँ देऐयों हाँव तुँओं खे शवाषी ने देंदा, तुवाँरे कठै हणों शी भलाऐ ने परह् बुराऐ हों।

¹⁸ किन्देंखे के आगे तअ हाँव ऐजो शुणू थिया, के जबे तुँऐं कलीसिया दे कठै हों, तअ तुँओं मुँझी फूट पड़ो, अरह् हाँव भे ईदा दाँणिक-दाँणिक बिश्वाष करू।

¹⁹ होर, ऐजो साचो असो, के तुवाँरे बीचो दी जरूर गुट-बाजी हों; किन्देंखे के जुण्जे लोग तुओं मुँझी आच्छै असो, से पर्गट हंदें।

²⁰ तअ तुऐं जू ऐकी जागे दे कंट्ठै हों, तअ ऐ प्रभू भोज खाणों खे ने हंदे।

²¹ तेसी प्रभू भोज खाँन्दें जबे तुऐं कंट्ठे हों, तअ तुऐं तेसी भोज खाँन्दें च़ूटियों पड़ो; अरह् कुँऐं ओका ओकी ठल़्दा नें लाग्दा, परह् आप्णा-आप्णा खाँणा खाँव, अरह् तिन्दें का नंतिजा ऐजा हों, के कुँऐं छक्की ज़ाँव, अरह् कुँऐं भूखी रंह्; अरह् कुँऐं माँचियों मंतवाल़ा हऐ ज़ाँव।

²² कियो खाँणो-पीणों खे तुवाँरे आप्णों घर आथी ने? ईन्देंखे तुँऐं पंणमिश्वर की कलीसिया तुछ़-छूटी जाँणों, अरह् जिन कैई खाँणा नें आथी; कियों तुऐं तिनकी बै-ईज्जती कर्दें ने? तअ कियो ईनू बातो दी हाँव तुँओं खे शबाशी देऊँ; ना, हाँव बिलकुल भे तुँओं खे शबाशी नें देंन्दी।

²³ जुण्जों मुँह प्रभू कैई शो भेटी रोह्, सेजो ही मुँऐ तुँओं खे दितो: प्रभू यीशू ऐ, जियों रात्ती तिनू थह्बड़ाऐं गुऐ, तियों रात्ती प्रभू ऐ रोटी करी,

²⁴ अरह् धन्यबाद करियों, च़ूड़ी अरह् बुलो, “ऐजी मेरी देह्-शरीर असो, जू तुँओं खे असो: मुँह चितोंणों खे ऐष्णों ही करिया करह्।”

²⁵ तेष्णा ही बियाल़ी खाँणों पाछी तिन्ऐं बैलुवा करा, अरह् बुलो, “ऐजा बैलुवा मेरे लह्ऊँ दा नुवाँ बाय्दा असो: जबे कद्दी पीयों; तअ मुँह चितोंणों खे ऐष्णों ही करिया करह्।”

²⁶ किन्देंखे के जबे कद्दी तुँऐं ऐजी रोटी खाँव, अरह् ऐसी बैलुऐ, शो पीयों, तअ प्रभू की मंऊत जाँव तोड़ी से आपु ने आँव प्रचार कर्दें रूऐ।

²⁷ किन्देंखे के जे कुँऐं, गलत ढंग शी प्रभू की रोटी खाँव; के प्रभू के बैलुऐ शो पियों, तअ सेजा आदमी प्रभू की देह्-शरीर अरह् तिनके लह्ऊँ का अपराधी-कसूरबार बंण्दा।

²⁸ ईन्देंखे जे कुँऐ भे आदमी तिरंऐ, के मंरोद् ऐजी रोटी खाँव; के तेसी बैलुऐ शो पीयों; तअ से आगें आप्णी जाँच परख आपु करह्।

²⁹ किन्देंखे के जुण्जा कुँऐं खाँदें-पींदें बख्ते प्रभू के देह्-शरीर ने पछ़याँण्दा, से ऐसी खाँणों-पीणों लई आपु आपु गाशी पंणमिश्वर के सजा पाँदा।

³⁰ ईन्देखे तुँओं मुँझी बैजाऐ भहीते कंंमजोर, अरह् रूगी असो, अरह् बैजाऐ भहीते मरी भे गुऐ।

³¹ जे आँमें आप्णी परख आपु कर्दे तअ आँमें ऐजी सजा ने पाँदे।

³² परह् प्रभू आँमों सजा देऐयों संम्झाँव, जू आँमें ईयों संईसारी की गईलो दुषी कसूरबार ने बंणों।

³³ ईन्देंखे, हे मेरे भाईयों, बंईणों, जबे तुँऐं खाँणों खाँदे कठै हों, तअ ओका ओकी ठल़्दा रंह्;

³⁴ अरह् जे कुँऐं आप्णीं भूख सह्ऐन ने करी सको, तअ से आप्णे घरे शा खाऐ-पियों आँव, जू कोद्दी ऐशो ने हईयों के तुवाँरो कोठों हणों तुँओं खे सजा का जाँणें ने बंणों, बाकी बादी बातो हाँव आऐयों ठीक करूबा।