1 कुरिन्थियों 1 - Sirmouri

नंमष्कार

¹ हाँव पौलुस बुलू जुण्जा के पंणमिश्वर के हिछ़्या शा प्रभू यीशू मसीया का खास-चैला बण्णों खे बईदा गुवा, अरह् अमाँरे भाऐ सोस्थिनेस की ढबे शा,

² पंणमिश्वर की तियों कलीसिया खे जुण्जी कुरिन्थिस नगर दे असो, मतल्व तिनखे भे जुण्जे मसीया यीशू दे पबित्र करे गुऐ, अरह् पबित्र हंणों खे बईदे गुऐ; अरह् तिनू सोभी खे भे जुण्जे हर जागें दी अमाँरे प्रभू अरह् तिनके प्रभू यीशू मसीया के नाँव शी प्रार्थना करह्।

³ अमाँरे परंम-पिता पंणमिश्वर अरह् प्रभू यीशू मसीया की ढबे शी तुँओं खे कृपा अरह् शाँण्त्ति भेंट्दी रंह्।

मसीया दा आशिर्बाद

⁴ हाँव तुवाँरे बारे दा आप्णे पंणमिश्वर का धन्यबाद सदा करदा रंह्ऊँ, ईन्देंखे के पंणमिश्वर के ऐजी कृपा तुँओं गाशी प्रभू यीशू मसीया के जाँणें हऐ

⁵ के तिन्दें संमाऐयों तुँऐं हर बातों दे मतल्व बादे बचन दे अरह् साँत्त-भाँत्ते ज्ञाँन दे धनवाँन बंणाऐं गुऐ

⁶ के मसीया के गुवाऐ-शाज़्त तुँओं दे पाक्की नींक्ल़ो

⁷ अरह् जाँव तोड़ी तुऐं अमाँरे प्रभू यीशू मसीया के पर्गट हणों के बाट जुह्दें रंह्, ताँव-तोड़ी तुवाँरें कस्सी भी आत्त्मिक बर्दांन की कमी ने हों।

⁸ हमाँरे प्रभू यीशू मसीया तुँओं आखरी बख्तो तोड़ी पाक्के कर्ले, किन्देंखे के तुँऐं तिनके आँणों के देसो तोड़ी निर-दोष बंणें रंह्।

⁹ पंणमिश्वर बिश्वाष कर्णो ज़ूगा असो जिन्ऐं तुँओं आप्णे बैटे अमाँरे प्रभू यीशू मसीया की संगत्ति दे बऐदी थुऐ।

कलीसिया दी फूट

¹⁰ हे मेरे भाऐ बंईणों, हाँव तुँओं शी अमाँरे प्रभू यीशू मसीया के नाँव शी ढाल-अरज करू, के तुँओं मुझी फुट् ने पड़ो, तुऐं ऐक ही मंन अरह् ऐक ही बात अरह् ऐक ही मत्त दे मिली-झुलियों रंह्।

¹¹ किन्देंखे के हे मेरे भाऐ बंईणों, खलोऐ के घराने के लोगे मुँह कैई तुवाँरे बारे दो बुलो, के तुँओं मुझी झगड़े हंदें लागे।

¹² मेरे बुल्णों का मतल्व असो, के तुँओं मुझ्शे कुँऐं तअ आपु खे “पौलुस का खास-चैला बुलो” अरह् कुँऐं “अपुल्लोस का,” अरह् कुँऐं “कैफा का,” अरह् कुँऐं आपु खे “मसीया का खास-चैला बुलों।”

¹³ कियों मसीया बंडी गुवा? कियो पौलुस तुँवारी ताँईऐं शुँल़ी-फ़ाँशी चड़ाया गुवा? के तुँऐं पौलुस के नाँव को नहाँण-नहाँऐ थो?

¹⁴ हाँव पंणमिश्वर का धन्यबाद करू, के क्रिस्पुस अरह् गयुस के सुवाऐ मुँऐ तुँओं मुझ्शो कोसी को भे नहाँण ने कराऐ थई।

¹⁵ कद्दी ऐशो ने हईयों के कुँऐं बुलो के ताँव्खे मेरे नाँव गाशी नहाँण भेटी रूओ।

¹⁶ अरह् होर, मुँऐ स्तिफनास के घराने को भी नहाँण कराऐ थो; तिनके सुवाऐ हाँव ने जाँण्दा के मुँऐं कोसी ओकी को नहाँण कराऐं थो।

¹⁷ किन्देंखे के मसीया ऐ मुँह नहाँण-नुहाँणों खे ने, परह् पंणमिश्वर की खुषख्बरी शुणाँदा डियाल़ी थुवा, अरह् सेजा भे शब्दो के ज्ञाँन के मुताबिक ने, ऐशो ने हईयों के मसीया के शुँल़ी-फ़ाँशी कुरबाँणी बै-कार ज़ाँव।

मसीया पंणमिश्वर का ज्ञाँन अरह् शक्त्ति असो

¹⁸ किन्देंखे के मसीया के शुँल़ी-फ़ाँशी के बल़ी-कुरबाँणीं की खबर नष्ट हंणों वाल़े लोग बैकार जाँणों, परह् आँमों मुँक्त्ति पाणों वाल़े खे पंणमिश्वर के शक्त्ति असो।

¹⁹ किन्देंखे के पबित्र-ग्रन्थों दो लिखी थो, के “प्रणमिश्वर बुलो, के हाँव ज्ञाँनियों का ज्ञाँन नष्ट करूबा, अरह् सम्झदारो की सम्झ तुछ़ करी देऊँबा।”

²⁰ केथै असो, ज्ञाँनवान? अरह् केथै रूआ यहीदू बिद्धवाँन? केथै रूआ संईसारी का बक्बादी? कियो पंणमिश्वरे संईसारी का ज्ञाँन मुरूख्ता बंणाऐ ने थई?

²¹ किन्देंखे के जबे पंणमिश्वर के ज्ञाँन के मुँताबिक संईसारी के लोगे ज्ञाँन शा पंणमिश्वर ने जाँणी, तअ पंणमिश्वर के ऐजो आछो लागो, के ऐसी प्रचार के जाँणें जेसी लोग मुरूख्ता जाँणो, ईन्दें के जाँणें बिश्वाष कर्णो वाल़े लोगो खे मुँक्त्ति दियों।

²² यहूदी लोग तअ चींन-चम्तकार चहाँव, अरह् यूनानी लोग ज्ञाँन के खोज दे असो,

²³ परह् आँमें तअ तेसी शुँल़ी-फ़ाँशी कुरबाँण हुऐ मसीया का प्रचार करह्, जू यहूदियों लोगो खे ढैस-ठूकर का कारण अरह् ओकी गऐर यहूदी लोगो खे मुरूख्ता असो;

²⁴ परह् जू बईदे अंदें असो, भाँव यहूदी भाव यूनानी, तिनखे मसीया पंणमिश्वर की शक्त्ति अरह् पंणमिश्वर का ज्ञाँन असो।

²⁵ किन्देंखे के पंणमिश्वर के मुरूख्ता आदमी के ज्ञाँन शी ज्ञाँनवान असो, अरह् पंणमिश्वर के कंमजूरी आदमी की तागत्ती शी बैजाऐ तागतबर असो।

²⁶ हे भाऐ बंईणों, आप्णे बईद्णों के बारे दो सुचो; के ना लोगों के मुताबिक जाँने-माँने ज्ञाँन-वाँन लोग, अरह् ना बैजाऐ शक्तिशाली, अरह् ना बैशुमाँर बड़ी खान-दाँनी दे पय्दा हुऐ लोग बईदी।

²⁷ परह् पंणमिश्वरे तिनू लोग चूंणें-छाँटे, जिनू संईसारी के लोग मुरूख-ज़गर जाँणों थिऐ; किन्देंखे के तिनू दे:खियों संईसारी के ज्ञाँन-वाँन लोग सरमाँऐं ज़ाँव; अरह् पंणमिश्वरे तिनू लोग चूणें-छ़ाँटे जिनू संईसारी के लोग कंंमजोर जाँणों थिऐ; किन्देंखे के तिनू दे:खियों सेजे संईसारी के बल़्वान लोग भे सरमाँऐं ज़ाँव;

²⁸ अरह् पंणमिश्वर ऐ सेजे लोग जुण्जे संईसारी के लोगो की नंजरी दे नींच छुटे, अरह् बैकार थिऐ, तिनू पंणमिश्वरे चूणें-छाँटे, किन्देंखे के जुण्जे किऐ लोग आपु-आप्खे बड़े बंणों संम्झों थिऐ, तिनके सेजे बैकार बिचार खत्त्म हऐ ज़ाँव।

²⁹ जू कुँऐं पराँणीं पंणमिश्वर के साम्णें आप्णी बड़ियाऐ ने करी सको।

³⁰ परह् तेस्की ही ढबे शे तुँऐं मसीया यीशू के असो, जू पंणमिश्वर की ढबे शा आँमों खे ज्ञाँन बंणा, मतल्व धर्म, अरह् पबित्रता, अरह् मुँक्त्ति;

³¹ जेष्णों पबित्र-ग्रन्थों दो लिखी थो, तैष्णों ही हों, “जू तारीफ करह्, से प्रभू दा तारीफ करह्।”